അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.രാമായണത്തില് രാമന് തനിക്കു ലഭിക്കേണ്ടിയിരുന്ന രാജകീയ സുഖസൗകര്യങ്ങള് ത്യജിച്ച് വനവാസത്തിനു പോയതും, ഒപ്പം സീതയും ലക്ഷ്മണനും അനുഗമിച്ചതും ഇന്നും മറക്കാനാവാത്ത വായനാനുഭവങ്ങളാണ്. അന്നും ഇന്നും രാമന് സുഖസൗകര്യങ്ങളൊന്നും ആസ്വദിക്കാനായില്ല എന്നതാണ് വസ്തുത. അയോധ്യയിലെ രാമക്ഷേത്രത്തിലെ കൊള്ളയും ഇതാണ് വെളിവാക്കുന്നത്. അന്ന് രാമനെ കുടുംബക്കാര് ചതിച്ചെങ്കില് ഇന്ന് രാമനെ വിശ്വാസികളാണ് ചതിക്കുന്നത്. രാമന്റെ സ്വത്തുക്കള് സൂക്ഷിക്കാന് ഏല്പ്പിച്ചവര് ക്ഷേത്രത്തില് നിന്നു കട്ടെടുത്ത് ആഡംബര ജീവിതം നയിച്ചെന്നാണ് കണ്ടെത്തല്. പുരാണത്തില്, രാമന് തന്റെ പത്നി സീതയ്ക്കായി ഒന്നും കൊടുക്കാന് കഴിയാതെ ജീവിച്ചപ്പോള്, ഇന്ന് രാമന്റെ ക്ഷേത്രത്തില് നിന്ന് കട്ടെടുത്തതില് നിന്ന് തന്റെ പെണ് സുഹൃത്തിന് ഐ.ഫോണ് വാങ്ങി നല്കുന്നവരെയാണ് കാണുന്നത്. അപ്പോഴും രാമന്റെ ജീവിതം നരകവും വാര്ത്തകളില് വിവാദവുമായി കത്തി നില്ക്കുന്നു.
അയോധ്യയിലെ രാമക്ഷേത്രത്തില് നടന്ന കാണിക്ക കൊള്ളക്കേസിലെ പ്രതി അവിനാശ് ശുക്ല ആഡംബര ജീവിതമാണ് നയിച്ചിരുന്നതെന്ന് പ്രത്യേക അന്വേഷണ സംഘം കണ്ടെത്തിയിരിക്കുകയാണ്. കുംഭമേളക്ക് പിന്നാലെ 19 ലക്ഷം രൂപ സുഹൃത്തുക്കള്ക്കായി ചെലവഴിച്ചിട്ടുണ്ട്. പെണ്സുഹൃത്തിന് ഐ.ഫോണ് വാങ്ങി നല്കി. സഹോദരന്റെ വിവാഹത്തിന് അടുത്തിടെ 10 ലക്ഷം രൂപ ചെലഴിച്ചെന്നും എസ്ഐടി കണ്ടെത്തിയിട്ടുണ്ട്. ജോലി കഴിഞ്ഞതിന് ശേഷം അവിനാശ് പലപ്പോഴും കയ്യില് പണവുമായി യോഗ കേന്ദ്രത്തില് പോകുന്നത് കണ്ടിരുന്നതായി സഹോദരന് അഭിഷേക് പറഞ്ഞു. ഇതിനെക്കുറിച്ച് ചോദിച്ചപ്പോള് കൃത്യമായ മറുപടി നല്കിയില്ല. പിന്നീട് അനുല്പിനോട് ചോദിച്ചപ്പോള്, ഭക്തര് സന്തോഷത്തോടെ നല്കുന്ന പണമാണിതെന്നും, ദര്ശനത്തിന് സഹായിക്കുന്നതിന് പകരമായി ആളുകള് പണം തരാറുണ്ടെന്നുമാണ് പറഞ്ഞത്. ഇനി ഇതിനെക്കുറിച്ച് സംസാരിക്കരുതെന്നും അവിനാശ് വിലക്കിയിരുന്നു.
അയോധ്യ പൊലീസ് ഈ കാര്യങ്ങളിലെ സത്യാവസ്ഥയെക്കുറിച്ച് വിശദമായ അന്വേഷണം നടത്തുകയാണ്. പ്രതിയുടെ ബാങ്ക് ഇടപാടുകള്, പണമിടപാടുകള്, ഇയാളുമായി ബന്ധമുള്ളവര് എന്നിവരെ കേന്ദ്രീകരിച്ചാണ് അന്വേഷണം പുരോഗമിക്കുന്നത്. കാണിക്കപ്പണം മോഷണം പോയ പശ്ചാത്തലത്തില് രാമക്ഷേത്രത്തിലെ സുരക്ഷാ ക്രമീകരണങ്ങളില് വലിയ മാറ്റങ്ങള് വരുത്തിയിട്ടുണ്ട്. ഇനി മുതല് മേശപ്പുറത്തും കസേരയിലിരുന്നും നോട്ട് എണ്ണാന് പാടില്ല. തറയില് മെത്തയും പ്ലൈവുഡും വിരിച്ചാണ് ഇനി പണം എണ്ണുക. പണം എണ്ണുന്ന സമയത്ത് ജീവനക്കാര് പരസ്പരം സംസാരിക്കാന് പാടില്ല. ഇടയ്ക്കിടെ ബാത്ത്റൂമില് പോകുന്ന ജീവനക്കാരെ പ്രത്യേകമായി നിരീക്ഷിക്കും. കാന്റീനില് കൂടുതല് സമയം ചിലവഴിക്കാന് അനുവദിക്കില്ല. പണം എണ്ണുന്ന മുറി മുഴുവനായും സി.സി.ടി.വി ക്യാമറകളുടെ കര്ശന നിരീക്ഷണത്തിലായിരിക്കും.
