അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സൗദി അറേബ്യയുടെ തെക്കന് മേഖല ലക്ഷ്യമാക്കി യമനിലെ ഹൂതി വിമതരുടെ ബാലിസ്റ്റിക് മിസൈല് ആക്രമണം. എന്നാല് സൗദി വ്യോമപ്രതിരോധ സേന ഈ ആക്രമണം വിജയകരമായി പ്രതിരോധിച്ചതായി പ്രതിരോധ മന്ത്രാലയം ഔദ്യോഗികമായി അറിയിച്ചു. മന്ത്രാലയ വക്താവ് മേജര് ജനറല് തുര്ക്കി അല് മാലിക്കിയാണ് ഇക്കാര്യം വ്യക്തമാക്കിയത്. ആക്രമണത്തെ തുടര്ന്ന് സൗദിയിലെ അബഹ, ജിസാന് വിമാനത്താവളങ്ങളിലെ വിവിധ വിമാന സര്വീസുകള് റദ്ദാക്കി. ആക്രമണ ഭീഷണിയെത്തുടര്ന്ന് സുരക്ഷാ മുന്കരുതലിന്റെ ഭാഗമായി സൗദിയുടെ തെക്കന് മേഖലയിലെ നാല് പ്രധാന വിമാനത്താവളങ്ങള് താല്ക്കാലികമായി അടച്ചു.
അബഹ, ജിസാന്, നജ്റാന്, ഷറൂറ എന്നീ വിമാനത്താവളങ്ങളാണ് അടച്ചത്. യമന് തലസ്ഥാനമായ സന്ആയില് സൗദി സഖ്യസേന നടത്തിയ ആക്രമണത്തിന് തിരിച്ചടിയായാണ് ഈ മിസൈല് ആക്രമണമെന്ന് ഹൂതി വിമതര് അവകാശപ്പെട്ടു. ഇന്നലെ രാത്രിയോടെയാണ് യമന് അതിര്ത്തിയോട് ചേര്ന്നുള്ള സൗദിയിലെ പ്രവിശ്യകളിലേക്ക് ഹൂതികള് ആക്രമണം നടത്തിയത്. ബാലിസ്റ്റിക് മിസൈല് പ്രതിരോധിച്ചെങ്കിലും പല ഭാഗത്തും ഇവയുടെ ഭാഗങ്ങള് പതിച്ചു. അബഹ വിമാനത്താവളം ലക്ഷ്യം വെച്ച് ആക്രമണമുണ്ടായതോടെ വിമാന സര്വീസുകള് പലതും റദ്ദാക്കി. കണക്ഷന് വിമാനങ്ങളില് കേരളത്തിലേക്ക് അവധിക്ക് വരാനിരുന്ന പല മലയാളികളും ഇതോടെ കുടുങ്ങി.
ഹൂതി നിയന്ത്രണത്തിലുള്ള സന്ആയിലെ വിമാനത്താവളത്തില് സൗദി പിന്തുണയുള്ള യമന് സൈന്യം ആക്രമണം നടത്തിയതോടെയാണ് സംഘര്ഷങ്ങളുടെ തുടക്കം. യമന്റെ ഈ പഴയ തലസ്ഥാനം ഉള്പ്പെടെ ഇപ്പോള് ഹൂതി നിയന്ത്രണത്തിലാണ്. ബാക്കി ഭാഗങ്ങള് സൗദി പിന്തുണയുള്ള ഭരണകൂടമാണ് നയിക്കുന്നത്. ഇറാനില് നിന്ന് ഹൂതികളുടെ പ്രതിനിധി സംഘം കഴിഞ്ഞ ദിവസം മടങ്ങിയിരുന്നു. ഇവരെത്തിയ വിമാനം ലാന്റ് ചെയ്യും മുമ്പേ യമന് സൈന്യം സന്ആയിലെ റണ്വേയില് വ്യോമാക്രമണം നടത്തി. സൗദി പിന്തുണയുള്ള ഭരണകൂടമായതിനാല് ഇതിന് പിന്നില് സൗദിയാണെന്ന് ആരോപിച്ചാണ് ഹൂതികള് പ്രത്യാക്രമണം നടത്തിയത്.
വിമാനത്താവളം യമന് ഭരണകൂടത്തിന്റേതാണെന്നും അവിടെ വിമതരായ ഹൂതികള് വിദേശ ശക്തിയായ ഇറാന്റെ സ്വാധീനം വര്ധിപ്പിക്കുന്നത് അംഗീകരിക്കാനാകില്ല എന്നാണ് യമനിലെ ഔദ്യോഗിക ഭരണകൂട നിലപാട്. യമന് യുദ്ധം അവസാനിച്ച നിലയിലായിരുന്നു നിലവിലെ സ്ഥിതി. സൗദിയും ഹൂതികളും ഏറെക്കുറെ സമാധാന വഴിയിലായിരുന്നു. എന്നാല് ഇറാന് യുദ്ധത്തിനിടെ ഇതാദ്യമായാണ് ഹൂതികള് സൗദിക്ക് നേരെ ആക്രമണം നടത്തുന്നത്. ഇതോടെ മേഖലയില് അശാന്തിക്ക് വഴിയൊരുങ്ങുമെന്ന് യമനിലേക്കുള്ള യുഎന്നിന്റെ പ്രത്യേക ദൂതന് മുന്നറിയിപ്പ് നല്കി.
