ഉത്തരാഖണ്ഡ് ചാമോലിയിൽ തുരങ്കം തകർന്ന് അപകടം. മായാപൂരിലെ (പിപാൽക്കോട്ടി) THDC പദ്ധതിയുടെ ഭാഗമായി നിർമ്മാണത്തിലിരുന്ന തുരങ്കത്തിലേക്ക് അവശിഷ്ടങ്ങളും വെള്ളവും ഇരച്ചുകയറിയതിനെത്തുടർന്ന് തൊഴിലാളികളടക്കം കുടുങ്ങി. ഇന്ന് വൈകിട്ടോടെയാണ് അപകടം ഉണ്ടായത്. അവശിഷ്ടങ്ങളും വെള്ളവും തുരങ്കത്തിലേക്ക് പ്രവേശിക്കുമ്പോൾ 18 മുതൽ 19 വരെ തൊഴിലാളികൾ ഉള്ളിലുണ്ടായിരുന്നുവെന്നാണ് പ്രാഥമിക വിവരം. സംഭവം നടന്ന ഉടൻ തന്നെ തിരച്ചിൽ-രക്ഷാപ്രവർത്തനങ്ങൾ ആരംഭിച്ചു. ഇതുവരെ 16 തൊഴിലാളികളെ സുരക്ഷിതമായി രക്ഷപ്പെടുത്തിയെന്നും, തുരങ്കത്തിനുള്ളിൽ കുടുങ്ങിക്കിടക്കുന്ന മറ്റുള്ളവരെ പുറത്തെത്തിക്കാനുള്ള ശ്രമങ്ങൾ തുടരുകയാണെന്നും ചമോലി ജില്ലാ മജിസ്ട്രേറ്റ് ഗൗരവ് കുമാർ അറിയിച്ചു.
ടിഎച്ച്ഡിസി (THDC)-യുടെ ജലവൈദ്യുത പദ്ധതിക്കായി നിർമ്മിച്ചുകൊണ്ടിരിക്കുന്ന തുരങ്കമാണിത്. വൈകുന്നേരം 6:30-ഓടെയോ 6:45-ഓടെയോ വലിയ അളവിൽ അവശിഷ്ടങ്ങളും വെള്ളവും തുരങ്കത്തിനുള്ളിലേക്ക് ഇരച്ചുകയറി. അപ്പോൾ ജോലിയിലുണ്ടായിരുന്ന തൊഴിലാളികൾ ഉള്ളിൽ കുടുങ്ങിപ്പോവുകയായിരുന്നു. കുടുങ്ങിക്കിടക്കുന്നവരെ രക്ഷിക്കാനായി എൻഡിആർഎഫ് (NDRF), എസ്ഡിആർഎഫ് (SDRF) സംഘങ്ങളും സ്ഥലത്ത് തുടരുകയാണ്. അടുത്ത ഏതാനും മണിക്കൂറുകൾക്കുള്ളിൽ എല്ലാവരെയും രക്ഷപ്പെടുത്താൻ കഴിയുമെന്ന് ഞങ്ങൾക്ക് പ്രതീക്ഷയുണ്ട്, ഗൗരവ്കുമാർ പറഞ്ഞു.
സംഭവത്തെത്തുടർന്ന് ഉത്തരാഖണ്ഡ് മുഖ്യമന്ത്രി പുഷ്കർ സിംഗ് ധാമി ആശങ്ക പ്രകടിപ്പിക്കുകയും, യുദ്ധകാലാടിസ്ഥാനത്തിൽ രക്ഷാപ്രവർത്തനം നടത്താൻ അധികൃതർക്ക് നിർദേശം നൽകുകയും ചെയ്തു.വേഗത്തിലുള്ള രക്ഷാപ്രവർത്തനം ഉറപ്പാക്കുന്നതിനായി ജില്ലാ ഭരണകൂടവും ബന്ധപ്പെട്ട എല്ലാ വകുപ്പുകളും ഏകോപിപ്പിച്ച് പ്രവർത്തിക്കണമെന്നും അദ്ദേഹം നിർദേശിച്ചു. സാഹചര്യം നേരിട്ട് നിരീക്ഷിച്ചുവരികയാണെന്നും, മുതിർന്ന ഉദ്യോഗസ്ഥരുമായി നിരന്തരം ബന്ധപ്പെട്ട് രക്ഷാപ്രവർത്തനങ്ങളെക്കുറിച്ചുള്ള വിവരങ്ങൾ അപ്പപ്പോൾ അറിയുന്നുണ്ടെന്നും ധാമി പറഞ്ഞു.
Story Highlights : Hydro tunnel collapses in Uttarakhand’s Chamoli