അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സംസ്ഥാനത്ത് കാലാവസ്ഥാ വകുപ്പിന്റെ മഴ മുന്നറിയിപ്പ് പരിഗണിച്ച് വിനോദ സഞ്ചാര വകുപ്പിനും ഡിറ്റിപിസികള്ക്കും പ്രത്യേക നിര്ദേശം. ഓറഞ്ച് അലേര്ട്ട് നിലവിലുള്ള ജില്ലകളില് വെള്ളച്ചാട്ടം, ജലാശയങ്ങളുമായി ബന്ധപ്പെട്ട മറ്റ് വിനോദ സഞ്ചാര കേന്ദ്രങ്ങള് എന്നിവയ്ക്ക് നിയന്ത്രണം ഏര്പ്പെടുത്തണമെന്നാണ് അറിയിപ്പ്. മുന്നറിയിപ്പുകള് പിന്വലിക്കുന്നതുവരെ നിയന്ത്രണങ്ങള് തുടരണം. മണ്ണിടിച്ചില്, ഉരുള്പൊട്ടല് സാധ്യതയുള്ള മലയോര മേഖലകളിലും മഴ അവസാനിക്കുന്നതുവരെ നിയന്ത്രണങ്ങള് ഏര്പ്പെടുത്തണം. ഇത്തരം സ്ഥലങ്ങളിലേക്കുള്ള റോഡുകളില് മണ്ണിടിച്ചില് സാധ്യത ഉള്ളയിടങ്ങളില് സുരക്ഷാ ബോര്ഡുകള് സ്ഥാപിക്കുകയും ആവശ്യമായ യാത്രാ നിയന്ത്രണങ്ങള് ഏര്പ്പെടുത്തുകയും വേണമെന്നും നിര്ദേശമുണ്ട്. ഇതര സംസ്ഥാനങ്ങളില് നിന്നും മറ്റു രാജ്യങ്ങളില് നിന്നും കേരളത്തില് എത്തിയിട്ടുള്ള സഞ്ചാരികളിലേക്കും മുന്നറിയിപ്പ് എത്തുന്നുണ്ട് എന്നുറപ്പാക്കണം.
സഞ്ചാരികള് അപകടത്തില്പ്പെടുകയോ ഒറ്റപ്പെട്ടുപോവുകയോ ചെയ്താല് ബന്ധപ്പെടേണ്ട അടിയന്തര നമ്പറുകള് വ്യാപകമായി ടൂറിസ്റ്റുകള്ക്കിടയില് പ്രചരിപ്പിക്കാന് നടപടിയെടുക്കണമെന്നും നിര്ദേശത്തിലുണ്ട്. മുന്നറിയിപ്പ് അവസാനിക്കുന്നതുവരെ 24 മണിക്കൂറും പ്രവര്ത്തിക്കുന്ന പ്രത്യേക കണ്ട്രോള് റൂമുകള് ആരംഭിക്കണം. വിനോദ സഞ്ചാര കേന്ദ്രങ്ങളില് ഏര്പ്പെടുത്തുന്ന നിയന്ത്രണങ്ങള് സംബന്ധിച്ച് മാധ്യമങ്ങളിലും സാമൂഹിക മാധ്യമങ്ങള് വഴിയും പ്രചാരണം നടത്തണം. പൊലീസ്, ദുരന്ത നിവാരണം, അഗ്നിശമന രക്ഷാസേന എന്നിവയുടെ കണ്ട്രോള് റൂമുകളിലേക്കും നിയന്ത്രണങ്ങള് സംബന്ധിച്ച അറിയിപ്പുകള് ലഭ്യമാക്കേണ്ടതുണ്ടെന്ന് നിര്ദേശത്തില് പറയുന്നു. സംസ്ഥാനത്ത് ഇന്ന് അഞ്ച് ദിവസങ്ങളില് ഓറഞ്ച് അലേര്ട്ട് പ്രഖ്യാപിച്ചിട്ടുണ്ട്. ഇടുക്കി, എറണാകുളം,കോഴിക്കോട്, വയനാട്, കണ്ണൂര്, കാസര്കോട് ജില്ലകളിലാണ് ഓറഞ്ച് അലേര്ട്ട് പ്രഖ്യാപിച്ചത്. പത്തനംതിട്ട, കോട്ടയം, ഇടുക്കി, എറണാകുളം ജില്ലകളില് നാളെ യെല്ലോ അലേര്ട്ട് ആണ്.
STORY HIGHLIGHT : kerala-rain-alert-special-directions-tourism-department-dtpcs
