അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഐക്യരാഷ്ട്രസഭാ ജനറൽ അസംബ്ലി വേദിയിൽ യു.എസും ഇറാനും തമ്മിൽ നടന്ന മൂന്ന് മണിക്കൂർ നീണ്ട അടച്ചിട്ട മുറിയിലെ ചർച്ച ആഗോളതലത്തിൽ പുതിയ പ്രതീക്ഷകൾക്ക് വഴിവെക്കുന്നു. തന്റെ പ്രതിനിധികളായ സ്റ്റീവ് വിറ്റകോഫും ജെറാദ് കുഷ്നറും ഇറാനിയൻ നേതാക്കളുമായി കൂടിക്കാഴ്ച നടത്തിയെന്നും വരും ദിവസങ്ങളിൽ ചർച്ചകൾ തുടരുമെന്നും യു.എസ് പ്രസിഡന്റ് ഡോണൾഡ് ട്രംപ് വെളിപ്പെടുത്തി. യുദ്ധഭീതി മാറി ചർച്ചകളിലൂടെ പരിഹാരമുണ്ടാകുമെന്ന സൂചനകൾ വന്നതോടെ ആഗോള വിപണിയിൽ എണ്ണവില കുറഞ്ഞു.
എണ്ണവില ബാരലിന് 100 ഡോളറിന് താഴെയെത്തി. ബ്രെന്റ് ക്രൂഡോയിൽ വില നിലവിൽ 99.17 ഡോളറിലും, ഡബ്ല്യൂ.ടി.ഐ 90 ഡോളറിലുമാണ് വ്യാപാരം നടക്കുന്നത്. ഇത് ഇന്ത്യ ഉൾപ്പെടെയുള്ള എണ്ണ இறക്കുമതി രാജ്യങ്ങൾക്ക് വലിയ ആശ്വാസമാണ്.
ഹോർമുസ് കടലിടുക്ക് തുറക്കുന്നതുമായി ബന്ധപ്പെട്ട നിലപാടുകൾ ഇറാൻ വിദേശകാര്യമന്ത്രി അബ്ബാസ് അരഗ്ച്ചി യു.എസിനെ അറിയിച്ചു. യുദ്ധം അവസാനിപ്പിക്കുക, നാവിക ഉപരോധം നീക്കുക, മരവിപ്പിച്ച ആസ്തികൾ വിട്ടുനൽകുക എന്നിവയാണ് ഇറാന്റെ പ്രധാന ആവശ്യങ്ങൾ.
സൗദി അറേബ്യ ഈസ്റ്റ്-വെസ്റ്റ് പൈപ്പ് ലൈൻ വഴി എണ്ണവിതരണം പുനഃസ്ഥാപിച്ചതും ഇറാഖ് കയറ്റുമതി വർധിപ്പിക്കുന്നതും എണ്ണവില കുറയാൻ കാരണമായി.
രാജ്യത്ത് എണ്ണവിലക്കയറ്റം രൂക്ഷമായതോടെ ഡീസൽ കയറ്റുമതിക്ക് ഭാഗികമായോ പൂർണ്ണമായോ നിയന്ത്രണം ഏർപ്പെടുത്താൻ യു.എസ് ആലോചിക്കുന്നതായി ട്രഷറി സെക്രട്ടറി സ്കോട്ട് ബെസന്റ് അറിയിച്ചു.
വരും ദിവസങ്ങളിൽ നടക്കാനിരിക്കുന്ന ട്രംപ്-ഷീ ജിൻപിങ് കൂടിക്കാഴ്ചയും ആഗോള വിപണിക്ക് നിർണായകമാകും. റഷ്യൻ എണ്ണ വാങ്ങുന്ന ഇന്ത്യ, ചൈന ഉൾപ്പെടെയുള്ള രാജ്യങ്ങൾക്ക് 100% തീരുവ ചുമത്താനുള്ള യു.എസ് നീക്കവും ചർച്ചയായേക്കും.
