ഇറാനുമായുള്ള യുദ്ധം ഉടൻ അവസാനിക്കുമെന്ന സൂചന നൽകി യു.എസ് പ്രസിഡന്റ് ഡോണൾഡ് ട്രംപ്. യുദ്ധം അവസാനിപ്പിക്കാനായി മധ്യസ്ഥത വഹിക്കുന്നവരുമായി യു.എസ് ഉദ്യോഗസ്ഥർ ചർച്ച നടത്തിയെന്നും ഏത് വഴിക്കായാലും യു.എസ് ജയിക്കുമെന്നും ട്രംപ് വ്യക്തമാക്കി. അതേസമയം, സമാധാന ചർച്ചകൾക്കിടയിലും സാമ്പത്തിക ഉപരോധവും പോർവിളികളും ശക്തമായി തുടരുകയാണ്.
മധ്യസ്ഥത വഹിച്ച് ഖത്തർ: ഖത്തറിന്റെ നേതൃത്വത്തിലാണ് ചർച്ചകൾ നടക്കുന്നത്. ഉപരോധം പിൻവലിക്കുകയാണെങ്കിൽ ഹോർമുസ് കടലിടുക്ക് തുറക്കാമെന്ന് ഇറാൻ അറിയിച്ചെങ്കിലും ട്രംപ് അത് തള്ളി. ഇതിനിടെ ഹോർമുസിന് സമീപം രണ്ട് വെസ്സലുകൾ ഇറാൻ പിടിച്ചെടുത്തു.
തകർന്നടിഞ്ഞ് ഇറാന്റെ സാമ്പത്തികം: ശക്തമായ യു.എസ് ഉപരോധത്തെ തുടർന്ന് ഇറാന്റെ കറൻസിയായ റിയാലിന്റെ മൂല്യം കൂപ്പുകുത്തി (1 ഡോളർ = 24.5 ലക്ഷം റിയാൽ). രാജ്യത്ത് പണപ്പെരുപ്പവും രൂക്ഷമാണ്.
കുതിച്ചുയർന്ന് ക്രൂഡോയിൽ വില: ഭിന്നത തുടരുന്നതിനാൽ ബ്രെന്റ് ക്രൂഡ് വില ബാരലിന് 106.8 ഡോളറായും ഡബ്ല്യു.ടി.ഐ ക്രൂഡ് വില 93.55 ഡോളറായും ഉയർന്നു.
ഓഹരി വിപണികളിൽ ഇടിവ്: ക്രൂഡോയിൽ വിലയും യു.എസ് ട്രഷറി യീൽഡും ഉയർന്നത് യു.എസ്, ഏഷ്യൻ വിപണികളെ ബാധിച്ചു.
ഇന്ത്യൻ വിപണിക്കും തിരിച്ചടി: കഴിഞ്ഞ ദിവസം സെൻസെക്സ് 1,124 പോയിന്റും നിഫ്റ്റി 360 പോയിന്റും ഇടിഞ്ഞു. രൂപയുടെ മൂല്യം ഡോളറിനെതിരെ 96 നിലവാരത്തിലേക്ക് താഴുകയും വിദേശ നിക്ഷേപകർ 5,000 കോടിയോളം രൂപ പിൻവലിക്കുകയും ചെയ്തു.
കൂപ്പുകുത്തി സ്വർണവില: ഡോളർ കരുത്താർജ്ജിച്ചതോടെ രാജ്യാന്തര വിപണിയിൽ സ്വർണവില ഔൺസിന് 4,133 ഡോളറിലേക്ക് ഇടിഞ്ഞു (ഏഴ് മാസത്തെ താഴ്ന്ന നിരക്ക്).