അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.‘കുഞ്ഞേ നിന്റെ വാക്കുകള് ഈ കോടതി കേട്ടു’ എന്നാണ് സന്ദേശം തുടങ്ങുന്നത്. ‘നീ അങ്കിള് എന്നു വിളിച്ചിരുന്ന അയാള് വയസ്സാകും വരെ ജയിലില് കിടക്കണമെന്ന് നീ പറഞ്ഞിരുന്നല്ലോ. നിന്റെ ആ വാക്കുകള്ക്ക് കോടതി മറുപടി നല്കിയിരിക്കുന്നു. നീ ‘അങ്കില്’ എന്നു വിളിച്ചയാള് ഇനി സ്വതന്ത്രമായി ഇറങ്ങി നടക്കാതിരിക്കാനുള്ള വിധി കോടതി പുറപ്പെടുവിച്ചിരിക്കുന്നു. ശിഷ്ടകാലം അയാളിനി ജയിലിലായിരിക്കും. അയാള് ആ തടവയ്ക്കുള്ളില് വയസ്സാകുകയും അവിടെ കിടന്ന് മരിക്കുകയും ചെയ്യും. നിന്നെയോ നിന്റെ കുഞ്ഞ് അനുജത്തിയേയോ, മറ്റേതെങ്കിലും കുട്ടിയേയോ ഇനി ഒരിക്കലും അയാള് ഉപദ്രവിക്കില്ല. ഈ കോടതി കണ്ടതില്വച്ച് ഏറ്റവും ധൈര്യശാലിയായ പെണ്കുട്ടിയാണ് നീ. കോടതിയില് വന്ന് നിന്നെ ഉപദ്രിവച്ചയാളെ ചൂണ്ടിക്കാട്ടി സത്യം ഒരു മടിയും കൂടാതെ തുറന്നു പറഞ്ഞു. നീ ‘അങ്കിള്’ എന്നു വിളിച്ചയാള് വളരെ മോശമായ കാര്യമാണ് നിന്നോട് ചെയ്തത്. എന്നാല് നീ മിണ്ടാതിരുന്നില്ല. അത് അമ്മയോട് പറഞ്ഞു. പുറത്തു പറയാന് നീ ധൈര്യം കാണിച്ചതു കൊണ്ടു തന്നെ ഇനി ഒരു കുട്ടിയേയും ഉപദ്രവിക്കാന് അയാള് മുതിരില്ല. നഷ്ടപ്പെട്ട നിന്റെ കുട്ടിക്കാലം തിരിച്ചു നല്കാന് ഈ കോടതിക്കാകില്ല. എന്നാല് നിന്റെ വാക്കുകള് കേട്ടെന്ന് കോടതിക്ക് ഉറപ്പു നല്കാനാകും. നിനക്ക് നീതി ലഭിച്ചിരിക്കുന്നു. നിന്നെ ഉപദ്രവിച്ച അയാള് ഇനി ഒരിക്കലും സ്വതന്ത്രമായി ഒരു സൂര്യോദയം കാണില്ല. കുഞ്ഞേ, നീ ഇനി നിന്റെ ജീവിതം ജീവിക്കുക. സ്കൂളിള് പോകൂ, സുഹൃത്തുക്കളെ ഉണ്ടാക്കൂ, ചിരിക്കൂ, കളിക്കൂ, സ്വപ്നം കാണൂ…നിന്റെ ധൈര്യം എന്നും ഈ കോടതി ഓര്മിക്കും.’
ഇത് ഒരു ജഡ്ജിയുടെ കത്തിലെ വാക്കുകളാണ്. എഴുതിയത് രോഹിണി അഡീഷനല് സെഷന്ഷ് കോടതി ജഡ്ജി രജന രംഗ. വൈകാരികമായ വാക്കുകളും, അതിനു കാരണമായ വിഷയവും അത്രമേല് ആഴത്തില് ആരെയും സ്പര്ശിക്കും. കാരണം, പത്തു വയസ്സുമാത്രം പ്രായമുള്ള ഒരു അതിജീവിതയ്ക്ക് സ്നേഹവും ധൈര്യവും വിശ്വാസവും നല്കുന്നതിനു വേണ്ടിയായിരുന്നു വികാരനിര്ഭരമായ ആ കത്ത് എഴുതിയത്. ഒപ്പം ആ കുട്ടിയെ പീഡിപ്പിച്ച ആള്ക്ക് നിയമത്തിന്റെ പിന്ബലത്തോടെ ശിക്ഷയും ഉറപ്പാക്കി വിചാരണക്കോടതി ജഡ്ജി. ഏഴാം വയസ്സില് നടന്ന പീഡനത്തിന്റെ കേസ് മൂന്നു വര്ഷം കഴിയുമ്പോഴാണ് പ്രതിക്ക് ശിക്ഷ കിട്ടുന്നത്. ഇപ്പോള് അതിജീവിതയ്ക്ക് വയസ്സ് പത്ത്. കേസിലെ പ്രതിയായ സുമിത് ഷാക്യയ്ക്ക് ജീവപര്യന്തം തടവുശിക്ഷ വിധിച്ച ശേഷമാണ് അതിജീവിതയ്ക്ക് നല്കാനായി ഒരു കത്തും ജഡ്ജി തയാറാക്കിയത്.
2023 ജൂലൈ 23നാണ് പെണ്കുട്ടി പീഡനത്തിന് ഇരയായത്. അന്ന് ഏഴു വയസ്സായിരുന്നു പ്രായം. മൂന്നു വര്ഷത്തിനിപ്പുറം മേയ് 20ന് പ്രതിയെ പോക്സോ നിയമപ്രകാരം കുറ്റക്കാരനെന്നു കണ്ടെത്തി. ശിക്ഷയ്ക്കെതിരെ അപ്പീലുമായി പ്രതി ഹൈക്കോടതിയെ സമീപിച്ചെങ്കിലും ഫൊറെന്സിക് തെളിവുകള് ഉള്പ്പെടെയുള്ളവയുടെ ബലത്തില് പ്രതിയുടെ ശിക്ഷ ശരിവയ്ക്കുകയും ജാമ്യം നിഷേധിക്കുകയുമായിരുന്നു. തുടര്ന്ന് ഡല്ഹി ഹൈക്കോടതിയിലെ ജസ്റ്റിസ് പ്രതിഭ എം. സിങ്, ജസ്റ്റിസ് ദിനേശ് ഭട്ട് എന്നിവരടങ്ങിയ ബെഞ്ച് കത്തും നഷ്ടപരിഹാര തുകയായ 10.50 ലക്ഷം രൂപയും രണ്ടാഴ്ചയ്ക്കുള്ളില് കുട്ടിക്ക് കൈമാറാന് നോര്ത്ത്-വെസ്റ്റ് ഡല്ഹി ലീഗല് സര്വീസസ് അതോറിറ്റിയോട് നിര്ദ്ദേശിച്ചു.
