അസമിലെ ഗുവാഹത്തിയിൽ ബാറിലെ ജീവനക്കാർ ചേർന്ന് യുവതിയെ വിവസ്ത്രയാക്കി ക്രൂരമായി മർദിച്ച സംഭവത്തിൽ ബാർ മാനേജരും വനിതാ ബൗൺസർമാരും ഉൾപ്പെടെ ഏഴുപേരെ പൊലീസ് അറസ്റ്റ് ചെയ്തു. മർദനത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതിനു പിന്നാലെ പൊലീസ് സ്വമേധയാ കേസെടുക്കുകയായിരുന്നു.
വ്യാഴാഴ്ച രാത്രി ഗുവാഹത്തിയിലെ ഖാനാപ്പാറ പ്രദേശത്തെ കെട്ടിടത്തിന്റെ നാലാം നിലയിൽ പ്രവർത്തിക്കുന്ന ബാറിലായിരുന്നു സംഭവം. ദൃശ്യങ്ങൾ പുറത്തുവന്നതോടെ ബാർ അധികൃതർ ബാർ പൂട്ടി ഒളിവിൽ പോയിരുന്നു.
തുടർന്ന് നടത്തിയ അന്വേഷണത്തിലാണ് ബാർ മാനേജർ ജസ്റ്റിൻ ഡി അറെങ്, ഇവന്റ് മാനേജർ നെകിബുർ സമാൻ സർക്കാർ, ഫ്രണ്ട് ഓഫിസ് എക്സിക്യൂട്ടീവ് ജുമ്പാ സിൻഹ, ഉഷാ ദേവി, മഞ്ജു ദാസ്, ഗൗരവ് മഹന്ത, ഡിനോ സോന എന്നിവരെ പൊലീസ് അറസ്റ്റ് ചെയ്തത്.
പ്രാഥമിക അന്വേഷണങ്ങൾ പ്രകാരം ബാറിനുള്ളിൽ വച്ചുണ്ടായ തർക്കമാണ് അക്രമത്തിൽ കലാശിച്ചത്. ബാറിനുള്ളിൽ തുടങ്ങിയ മർദനം പിന്നീട് കെട്ടിടത്തിന്റെ താഴത്തെ നിലയിലേക്ക് യുവതിയെ വലിച്ചിഴച്ചു കൊണ്ടുവന്നും തുടരുകയായിരുന്നു. സംഭവസ്ഥലത്തെ സിസിടിവി ദൃശ്യങ്ങളും മറ്റ് തെളിവുകളും പൊലീസ് ശേഖരിച്ചിട്ടുണ്ട്. പ്രതികളുടെ കൃത്യമായ പങ്കാളിത്തം അന്വേഷണത്തിലൂടെ മാത്രമേ വ്യക്തമാകൂ എന്ന് പൊലീസ് അറിയിച്ചു.
സംഭവത്തിൽ ആകെ 10 പേർക്ക് പങ്കുണ്ടെന്നും ഒളിവിൽ പോയ ബാക്കി മൂന്ന് പ്രതികൾക്കായി തിരച്ചിൽ ഊർജിതമാക്കിയതായും പൊലീസ് പറഞ്ഞു.