ഹിമാലയൻ മലനിരകളുടെ സൗന്ദര്യവും ബുദ്ധന്റെ മണ്ണും കാണാൻ ആഗ്രഹിക്കുന്നവർക്ക് കുറഞ്ഞ ചെലവിൽ നേപ്പാളിലെത്താൻ എളുപ്പവഴിയൊരുക്കി ഇന്ത്യൻ റെയിൽവേ. കേരളത്തിൽ നിന്ന് നേരിട്ട് ട്രെയിനുകൾ ഇല്ലെങ്കിലും, അതിർത്തിയോട് അടുത്തുള്ള ഉത്തർപ്രദേശിലെ ഗോരഖ്പൂർ ജംഗ്ഷൻ വരെ റാപ്തിസാഗർ എക്സ്പ്രസ് (തിരുവനന്തപുരം നോർത്ത് – ഗോരഖ്പൂർ) വഴി യാത്ര ചെയ്യാം.
തിരുവനന്തപുരം നോർത്തിൽ (കൊച്ചുവേളി) നിന്ന് ആഴ്ചയിൽ 3 ദിവസമാണ് ഈ ട്രെയിൻ സർവീസ് നടത്തുന്നത്. 3,248 കിലോമീറ്റർ ദൂരം 56 മണിക്കൂറും 40 മിനിറ്റും കൊണ്ട് (ഏകദേശം 3 ദിവസം) പൂർത്തിയാക്കുന്ന ഈ യാത്ര രാജ്യത്തെ ഏറ്റവും ദൈർഘ്യമേറിയ ട്രെയിൻ സർവീസുകളിലൊന്നാണ്.
യാത്രാ റൂട്ട്:
ഒന്നാം ദിവസം: രാവിലെ 06:35-ന് പുറപ്പെട്ട് കൊല്ലം, ആലപ്പുഴ, എറണാകുളം, പാലക്കാട് വഴി തമിഴ്‌നാട്ടിലേക്ക് (കോയമ്പത്തൂർ, ചെന്നൈ സെൻട്രൽ).
രണ്ടാം ദിവസം: ആന്ധ്രാപ്രദേശ് (വിജയവാഡ), മഹാരാഷ്ട്ര (നാഗ്പൂർ), മധ്യപ്രദേശ് (ഇറ്റാർസി, ഭോപ്പാൽ) വഴി സവാരി.
മൂന്നാം ദിവസം: ഉത്തർപ്രദേശിലെ കാൺപൂർ, ലക്നൗ പിന്നിട്ട് ഉച്ചയ്ക്ക് 3:15-ന് ഗോരഖ്പൂരിൽ യാത്ര അവസാനിക്കുന്നു.
ഗോരഖ്പൂരിൽ നിന്ന് ബസ്/ടാക്സി മാർഗം 3 മണിക്കൂർ കൊണ്ട് ഇന്ത്യ-നേപ്പാൾ അതിർത്തിയായ സുനൗലിയിലെത്താം.
ഇന്ത്യൻ പൗരന്മാർക്ക് വിസ ആവശ്യമില്ല (പാസ്‌പോർട്ട് അല്ലെങ്കിൽ വോട്ടർ ഐഡി മാത്രം മതി). അതിർത്തി കടന്ന ശേഷം ഭൈരഹവ ബസ് സ്റ്റാൻഡിൽ നിന്ന് കാഠ്മണ്ഡു, പൊഖാറ എന്നിവിടങ്ങളിലേക്ക് നേരിട്ട് വാഹനങ്ങൾ ലഭ്യമാണ്.