മന്ത്രി കെ.എം. ഷാജിയുടെയും മറ്റ് മന്ത്രിമാരുടെയും വിദേശയാത്രകൾ സമഗ്രമായി അന്വേഷിക്കണമെന്ന് ഷോൺ ജോർജ്

മന്ത്രി കെ.എം. ഷാജിയുടെയും മറ്റ് മന്ത്രിമാരുടെയും വിദേശയാത്രകൾ സമഗ്രമായി അന്വേഷിക്കണമെന്ന് ആവശ്യപ്പെട്ട് ബി.ജെ.പി നേതാവ് ഷോൺ ജോർജ് രംഗത്ത്. മന്ത്രിസഭ യോഗം ബുധനാഴ്ചകളിൽ പല രാജ്യങ്ങളിലായി കൂടേണ്ട സാഹചര്യമാണ് നിലവിലുള്ളതെന്ന് അദ്ദേഹം പരിഹസിച്ചു.

മന്ത്രി കെ.എം. ഷാജിക്ക് പ്രത്യേക അനുമതിയൊന്നും ആവശ്യമില്ലാത്ത സ്ഥിതിയാണെന്നും, മതമാണ് പ്രശ്നമെന്ന് പറഞ്ഞ മന്ത്രിയെ മടിയിലിരുത്തി മതേതരത്വം പറയുന്ന ആളാണ് മുഖ്യമന്ത്രിയെന്നും അദ്ദേഹം കുറ്റപ്പെടുത്തി. ജനങ്ങളുടെ മുൻപിൽ ഇത്തരം കാര്യങ്ങൾ എങ്ങനെയാണ് വിലയിരുത്തപ്പെടുന്നതെന്ന് മുഖ്യമന്ത്രി പരിശോധിക്കുന്നത് നന്നായിരിക്കുമെന്നും ഷോൺ ജോർജ് കൂട്ടിച്ചേർത്തു.

മന്ത്രിമാരുടെ ഭാഗത്തുനിന്ന് തുടർച്ചയായി സത്യപ്രതിജ്ഞാലംഘനം ഉണ്ടാകുന്നുണ്ടെങ്കിലും സർക്കാർ യാതൊരു നടപടിയും സ്വീകരിക്കുന്നില്ലെന്ന് അദ്ദേഹം ആരോപിച്ചു.

അനുമതിയില്ലാതെയാണ് വിദേശയാത്ര നടത്തിയിട്ടുള്ളതെങ്കിൽ അത് ഗുരുതരമായ തെറ്റാണ്. മന്ത്രിമാരിൽ രണ്ടുപേർ മാത്രമാണ് അനുമതി വാങ്ങി വിദേശയാത്ര നടത്തിയതെന്നാണ് അറിയാൻ കഴിയുന്നത്. എവിടേക്കാണ് പോയതെന്നും എന്തിനൊക്കെയാണെന്നും അന്വേഷിക്കേണ്ടതുണ്ടെന്നും, തുടർകാര്യങ്ങൾ പാർട്ടി ആലോചിച്ച് തീരുമാനിക്കുമെന്നും ഷോൺ ജോർജ് പറഞ്ഞു.

സി.എം.ആർ.എൽ കേസിൽ സർക്കാരും പ്രതിപക്ഷവും തമ്മിൽ ഒത്തുകളിക്കുകയാണെന്നും ഷോൺ ജോർജ് ആരോപിച്ചു. മുസ്ലിം ലീഗിന് വേണ്ടിയാണ് സർക്കാർ അന്വേഷണം വൈകിപ്പിക്കുന്നത്. പ്രാഥമിക അന്വേഷണം നടത്താൻ 14 ദിവസമാണ് വേണ്ടതെങ്കിലും അതിലും ദിവസങ്ങൾ വൈകിപ്പിച്ചു. പിണറായി വിജയന് അപ്പീൽ പോകാൻ സർക്കാർ സാവകാശം നൽകിയെന്നും, കോടതി അവധി ദിവസങ്ങളിൽ എഫ്.ഐ.ആർ വരാതിരിക്കാൻ പ്രത്യേകം ശ്രദ്ധിച്ചുവെന്നും അദ്ദേഹം ആരോപിച്ചു.

സർക്കാരിന്റെ ഉദ്ദേശശുദ്ധിയിൽ സംശയമുണ്ടെന്നും ഹവാല ഇടപാടുകൾ അടക്കം ഈ കേസിൽ പരിശോധിക്കേണ്ടിവരുമെന്നും അദ്ദേഹം വ്യക്തമാക്കി. ഹവാല എന്ന് കേട്ടാൽ കോൺഗ്രസിനേക്കാൾ ഞെട്ടൽ മുസ്ലിം ലീഗിനാണെന്നും ലീഗ് നേതാക്കളിലേക്ക് അന്വേഷണം എത്തുമെന്ന പേടിയാണ് അവർക്കുള്ളതെന്നും അദ്ദേഹം പരിഹസിച്ചു.

മുഖ്യമന്ത്രിയടക്കം ഏഴ് ക്യാബിനറ്റ് പദവികളാണ് ലീഗിനുള്ളതെന്നും, വി.ഡി. സതീശൻ ലീഗിന്റെ മുഖ്യമന്ത്രിയാണെന്നും ഷോൺ വിമർശിച്ചു.

ഈ മന്ത്രിസഭയിലെ മുഖ്യധാരയിലുള്ള രണ്ടുപേരുടെ പേരുകൾ കർത്തയുടെ ഡയറിയിലുണ്ടെന്നും, വിജിലൻസ് അന്വേഷണം ഉണ്ടായാൽ ഇവർ മാറിനിൽക്കേണ്ടി വരുമെന്ന ആകുലതയാണ് യു.ഡി.എഫിനെ അലട്ടുന്നതെന്നും അദ്ദേഹം പറഞ്ഞു.