അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ന്യൂഡൽഹി: ഇന്ത്യയുടെ ചീഫ് ജസ്റ്റിസ് സൂര്യകാന്തിനെയും നീതിന്യായ വ്യവസ്ഥയെയും കുറിച്ച് നടത്തിയ പരാമർശങ്ങളുടെ പേരിൽ ശിവസേന (യു.ബി.ടി) രാജ്യസഭാ എം.പി സഞ്ജയ് റാവത്തിനും മാധ്യമപ്രവർത്തകൻ നിഖിൽ വാഗ്‌ലെയ്ക്കും സുപ്രീം കോടതി കോടതിയലക്ഷ്യ നോട്ടീസ് അയച്ചു. ചീഫ് ജസ്റ്റിസ് സൂര്യകാന്തും ജസ്റ്റിസ് ജോയ്മാല്യ ബാഗ്ചിയും ഉൾപ്പെട്ട ബെഞ്ചാണ് നടപടി സ്വീകരിച്ചത്.
സുപ്രീം കോടതി ബാർ അസോസിയേഷൻ സമർപ്പിച്ച ഹർജിയുടെ അടിസ്ഥാനത്തിലാണ് നടപടി. ഇരുവരുടെയും പരാമർശങ്ങൾ കോടതിയുടെ അധികാരത്തെയും അന്തസ്സിനെയും ബാധിക്കുന്നതാണെന്നാണ് ഹർജിയിലെ ആരോപണം. വിഷയത്തിൽ ഇരുവരുടെയും വിശദീകരണം തേടിയ കോടതി, അടുത്ത ഹിയറിങ്ങിൽ നേരിട്ട് ഹാജരാകുന്നതിൽ നിന്ന് ഇവർക്ക് ഇളവ് അനുവദിച്ചതായും റിപ്പോർട്ടുകൾ വ്യക്തമാക്കുന്നു.
വിവാദത്തിന് പിന്നിൽ
പ്രതിപക്ഷ നേതാക്കളുടെ ഒരു സംഘത്തിന് കൂടിക്കാഴ്ച അനുവദിക്കാതിരുന്ന ചീഫ് ജസ്റ്റിസിന്റെ തീരുമാനവുമായി ബന്ധപ്പെട്ടാണ് വിവാദം ഉയർന്നത്. തെരഞ്ഞെടുപ്പ് കമ്മീഷന്റെ പ്രവർത്തനങ്ങളെയും വോട്ടർപട്ടികയിലെ പ്രത്യേക തീവ്രപരിഷ്‌കരണ നടപടിയെയും (SIR) സംബന്ധിച്ച വിഷയങ്ങളിൽ ചീഫ് ജസ്റ്റിസിനെ കാണാൻ പ്രതിപക്ഷ നേതാക്കൾ ശ്രമിച്ചിരുന്നു. എന്നാൽ വിഷയം കോടതിയിൽ ഹർജിയായി ഉന്നയിക്കാനാണ് ചീഫ് ജസ്റ്റിസ് നിർദേശിച്ചതെന്നാണ് റിപ്പോർട്ടുകൾ.
ഇതിനു പിന്നാലെ നിഖിൽ വാഗ്‌ലെ സമൂഹമാധ്യമമായ എക്സിൽ ചീഫ് ജസ്റ്റിസിനെതിരെ അധിക്ഷേപകരമായ പരാമർശം നടത്തിയതായി ആരോപണമുയർന്നു. പിന്നീട് പോസ്റ്റ് നീക്കം ചെയ്ത വാഗ്‌ലെ മാപ്പ് അറിയിച്ചതായും റിപ്പോർട്ടുകളുണ്ട്.
സഞ്ജയ് റാവത്ത് നടത്തിയ പരാമർശങ്ങളും കോടതിയലക്ഷ്യ ഹർജിയിൽ ഉന്നയിക്കപ്പെട്ടു. ജഡ്ജിമാർ രാഷ്ട്രീയ നേതാക്കളുമായി ഇടപഴകുന്നതിനെക്കുറിച്ചും രാഷ്ട്രീയ പരിപാടികളിൽ പങ്കെടുക്കുന്നതിനെക്കുറിച്ചും റാവത്ത് വിമർശനം ഉന്നയിച്ചിരുന്നു. ലണ്ടനിൽ രാഷ്ട്രീയ നേതാക്കളുമായി ജഡ്ജിമാർ ബാഡ്മിന്റൺ കളിച്ചെന്ന തരത്തിലുള്ള ചിത്രങ്ങളെക്കുറിച്ചുള്ള വിവാദവും വിഷയത്തിന്റെ ഭാഗമായി.
എന്നാൽ, ബാഡ്മിന്റൺ പരിപാടിയുമായി ബന്ധപ്പെട്ട് പ്രചരിച്ച ചിത്രങ്ങൾ ലണ്ടനിൽ നിന്നുള്ളതല്ലെന്നും 2025 നവംബറിൽ ന്യൂഡൽഹിയിലെ ത്യാഗരാജ് സ്റ്റേഡിയത്തിൽ നടന്ന പരിപാടിയിലേതാണെന്നും സുപ്രീം കോടതി ബാർ അസോസിയേഷൻ ചൂണ്ടിക്കാട്ടിയതായി റിപ്പോർട്ടുകളുണ്ട്.
ഇരുവർക്കുമെതിരെ ക്രിമിനൽ കോടതിയലക്ഷ്യ നടപടികൾ ആരംഭിക്കുന്നതിന് അറ്റോർണി ജനറൽ ആർ. വെങ്കട്ടരമണി അനുമതി നൽകിയിരുന്നു. ഇതിന് പിന്നാലെയാണ് സുപ്രീം കോടതി ബാർ അസോസിയേഷൻ കോടതിയെ സമീപിച്ചത്.
