അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.സിപിഎം കൊല്ലം വിപുലീകൃത ജില്ലാ കമ്മിറ്റി യോഗത്തിൽ സംസ്ഥാന നേതൃത്വത്തിനും പിണറായി വിജയനുമെതിരെ രൂക്ഷമായ വിമർശനങ്ങളാണ് ഉയർന്നത്. പാർട്ടിയുടെ പരമ്പരാഗത ശക്തികേന്ദ്രത്തിൽ സംഭവിച്ച പരാജയം സംസ്ഥാന നേതൃത്വത്തിന്റെ പിടിപ്പുകേട് മൂലമാണെന്ന് യോഗത്തിൽ പ്രതിനിധികൾ തുറന്നടിച്ചു. പിണറായി വിജയന്റെ ധാർഷ്ട്യവും ഏകപക്ഷീയമായ നിലപാടുകളും പാർട്ടിയെയും സർക്കാരിനെയും ജനങ്ങളിൽ നിന്ന് പൂർണ്ണമായി അകറ്റിയെന്നും, പാർട്ടിക്ക് മുകളിലേക്ക് പിണറായി വിജയൻ വളരുകയായിരുന്നുവെന്നും അംഗങ്ങൾ കുറ്റപ്പെടുത്തി.
മുഖ്യമന്ത്രിക്കും മകൾ വീണ വിജയനുമെതിരെയുണ്ടായ ആരോപണങ്ങൾ പ്രസ്ഥാനത്തിന് വലിയ അവമതിപ്പാണ് ഉണ്ടാക്കിയത്. ഇ.എം.എസും എ.കെ.ജിയും പോലെയുള്ള മുൻകാല നേതാക്കൾ മക്കൾക്ക് വേണ്ടി ഒരിക്കലും പാർട്ടിയെ ഉപയോഗിച്ചിട്ടില്ലെന്ന് ഓർമ്മിപ്പിച്ച അംഗങ്ങൾ, പിണറായിയുടെ ഇത്തരം തെറ്റായ ശൈലികൾ തിരുത്താൻ പാർട്ടി സംവിധാനത്തിന് കഴിയാതെ പോയതിലും പ്രതിഷേധം അറിയിച്ചു.
സംസ്ഥാന സെക്രട്ടറി എം.വി. ഗോവിന്ദന് ഔചിത്യബോധമില്ലെന്നും അദ്ദേഹത്തിന്റെ തെറ്റായ നയങ്ങളും തീരുമാനങ്ങളുമാണ് തോൽവിയിലേക്ക് നയിച്ചതെന്നും വിമർശനമുയർന്നു.
ജില്ലയിൽ ഒരു വനിതാ സ്ഥാനാർത്ഥിയെ പോലും മത്സരരംഗത്തിറക്കാൻ സാധിച്ചില്ലെന്നതും, സംസ്ഥാന നേതൃത്വത്തിന്റെ അടിച്ചേൽപ്പിക്കലുകൾക്ക് ജില്ലാ നേതൃത്വം പൂർണ്ണമായി വഴങ്ങുകയാണെന്നതും പ്രധാന പോരായ്മകളായി ചൂണ്ടിക്കാണിക്കപ്പെട്ടു.
എല്ലാ കാര്യങ്ങൾക്കും പിരിവ് നടത്തുന്ന രീതി മാറണമെന്നും സിപിഎം വെറുമൊരു ‘പിരിവ് പാർട്ടിയായി’ അധഃപതിച്ചുവെന്നും അംഗങ്ങൾ പരിഹസിച്ചു.
