അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.മുഖം ഏത് ആകൃതിയിലാണെന്ന് തിരിച്ചറിഞ്ഞു തന്നെ ഹെയർ സ്റ്റൈൽ തിരഞ്ഞെടുക്കാം. അല്ലെങ്കിൽ അടുത്ത തവണ മുടി വെട്ടുമ്പോൾ മുഖത്തിന്റെ ആകൃതി കൂടെ മനസ്സിൽ വെക്കാം. മുഖത്തിന്റെ ആകൃതിയ്ക്ക് വിരുദ്ധമായ ഹെയർ സ്റ്റൈലാണ് നിങ്ങൾ തിരഞ്ഞെടുക്കുന്നതെങ്കിൽ അവ മുഖത്തെ ഭംഗിയില്ലാതാക്കും
ഹാർട്ട് ഷേപ്പ്
വിശാലമായ നെറ്റിയും കൂർത്ത താടിയുമാണെങ്കിൽ മുഖത്തിന് ഹാർട്ട് ഷേപ്പ് ആണെന്ന് പറയാം. ഇത് മനസിലാക്കാനുള്ള ഒരു എളുപ്പ വഴിയുണ്ട്, നിങ്ങൾ കണ്ണാടിയ്ക്ക് മുൻപിൽ നിന്ന് മുഖത്തിന്റെ ആകൃതി കൃത്യമായി നോക്കുക. ഒരു സമഭുജ ത്രികോണം തല തിരിച്ചു വെച്ചതായി അനുഭവപ്പെടുന്നുണ്ടോ? എങ്കിൽ ഉറപ്പിച്ചോളൂ നിങ്ങളുടെ മുഖം ഹൃദയത്തിന്റെ ആകൃതിയിൽ തന്നെയാണ്. ദീപിക പദുക്കോണിന്റെ മുഖം ഇതിന് മികച്ച ഉദാഹരണമാണ്.
താടിയെല്ലുകളുടെ കൂർത്ത ഭാഗങ്ങളെ എടുത്ത് കാണിക്കുന്നത് ഒഴിവാക്കാനായി ചില കാര്യങ്ങൾ ചെയ്യുന്നത് നന്നാകും. മുഖത്തിന്റെ ആകൃതി ക്രമപ്പെടുത്തുന്നതിനായി ഇരു വശങ്ങളിലും അല്പം മുടി വൃത്തിയായി വെട്ടിയിടുന്നത് നല്ലതാണ്.
ഇടത്തരം നീളമുള്ളതോ നല്ല നീളമുള്ളതോ ആയ മുടിയോ ആണ് ഇവർക്ക് ചേരുക. ഒരിക്കലും കഴുത്തിനൊപ്പം മുടി വെട്ടി നിർത്തുന്നത് ഇത്തരക്കാർക്ക് അനുയോജ്യമാവില്ല.
വട്ട മുഖം
വട്ട മുഖമുള്ളവരുടെ മുഖത്തിന്റെ ഇരു വശങ്ങളും അല്പം പുറത്തേക്ക് തള്ളി നിൽക്കുന്നതായി തോന്നും. അതായത് ഇരു വശങ്ങളും നേരെ കുത്തനെ ആവില്ല. താടിയും വൃത്താകൃതിയിലാവും ഉണ്ടാവുക. കവിളുകൾ ഉയർന്നു നിൽക്കും. മുഖത്ത് കോണുകളോ കൂർത്തതോ ആയ ഭാവങ്ങൾ ഈ ആകൃതിയിൽ കാണാൻ കഴിയില്ല. ബോളിവുഡ് നടി വിദ്യാ ബാലന്റേത് വൃത്താകൃതിയിലുള്ള മുഖമാണ്.
വളരെ നേർത്തതോ കൂടുതൽ പൊങ്ങി നിൽക്കുന്നതോ ആയ ഹെയർ സ്റ്റൈലുകൾ ഇവർക്ക് ചേരില്ല. മുടി അല്പം നീളത്തിൽ വെട്ടിയിടുകയോ ഒരു വശത്തോട് ചേർന്ന് മുടി പകുത്തെടുക്കുകയോ ചെയ്യുന്നത് മുഖത്തിന് അനുയോജ്യമാകും. മുഖത്തിന്റെ ഒരു വശത്ത് അല്പം മുടി അലസമായി വീണു കിടക്കുന്നത് മനോഹരമാകും.
ചതുരാകൃതിയുള്ള മുഖം
മുഖത്തിന് ചതുരാകൃതിയാണെങ്കിൽ ഇരു വശങ്ങളും നേരെയിരിക്കും. മുഖത്തിന്റെ നീളവും വീതിയും ഏകദേശം സമമായിരിക്കും എന്നതാണ് പ്രത്യേകത. വട്ട മുഖത്തിന്റെ താടിയെല്ലുകൾക്ക് വിപരീതമായിരിക്കും ചതുരാകൃതിയിലുള്ള മുഖത്തിന്റേത്. താടിയെല്ലുകളുടെ വശം കൂടുതൽ കൃത്യമായി നിൽക്കും. പോപ്പ് ഗായിക റിഹാനയുടെ മുഖം ഇതിന് ഉദാഹരണമാണ്.
താടിയെല്ലുകൾ വരെ മാത്രം തൂങ്ങി കിടക്കുന്ന രീതിയിൽ മുടി വെട്ടാതിരിക്കാൻ ശ്രദ്ധിക്കണം. ഇത് മുഖത്തിന്റെ വീതി വീണ്ടും കൂടുതലായി തോന്നിപ്പിക്കാൻ കാരണമാകും. കൃത്യമായി നടു വശത്ത് നിന്ന് മുടി വകഞ്ഞെടുക്കുന്നതും ഇത്തരക്കാർക്ക് അഭംഗിയാകും.
ബണ്ണുകൾ ഉപയോഗിച്ച് ഉയർത്തി കെട്ടുന്നത് നല്ലതാവും. എന്നാൽ ഇത് ഒരുപാട് ഇറുക്കി വലിച്ചു കെട്ടരുത്. അല്പം അയഞ്ഞ രീതിയിൽ അലസമായി കെട്ടിയിടുന്നത് ഭംഗി കൂട്ടും.
ഓവൽ ഷേപ്പ്
ഓവൽ ഷേപ്പുള്ള മുഖത്തിന് താടിയെക്കാൾ അല്പം വീതി കൂടിയ നെറ്റിത്തടമാണ് ഉണ്ടാവുക. മറ്റ് ആകൃതികളുമായി താരതമ്യം ചെയ്യുമ്പോൾ താടിയെല്ലുകൾക്ക് വളവ് അല്പം കൂടുതലായിരിക്കും. ഓവൽ ഷേപ്പിന് മികച്ച ഉദാഹരണമാണ് അനുഷ്ക ശർമയുടെ മുഖം.
ഓവൽ ഷേപ്പുള്ള മുഖത്തിന്റെ നീളക്കൂടുതൽ കുറച്ചു തോന്നിയ്ക്കാനായി വശങ്ങളിൽ മുടി മുറിച്ചിടുന്നത് ഒരു നല്ല വഴിയാണ്. മുടി അല്പം പൊങ്ങി നിൽക്കുന്ന തരത്തിലുള്ള ഹെയർ സ്റ്റൈലുകൾ ഇത്തരക്കാർക്ക് നന്നായി ഇണങ്ങും.
അല്പം ചുരുണ്ട മുടിയാണെങ്കിൽ ബോബ് ചെയ്യുന്നതും ഗുണം ചെയ്യും. നീണ്ട മുടിയാണെങ്കിൽ പല ലയറുകളായി വെട്ടിയിടാം.
ഡയമണ്ട് ഷേപ്പ്
ഉയർന്ന കവിളെല്ലുകളോടുകൂടിയതാണ് ഡയമണ്ട് ആകൃതിയിലുള്ള മുഖം. നെറ്റിയുടെ മധ്യ ഭാഗവും കവിളുകളുടെയും താടിയുടെയും മധ്യ ഭാഗവും ചേർത്ത് വരക്കുന്നതായി സങ്കല്പിക്കുമ്പോൾ വജ്ര ആകൃതി ലഭിക്കുകയാണെങ്കിൽ അത് ഡയമണ്ട് ഷേപ്പിലുള്ള മുഖമാണെന്ന് ഉറപ്പിക്കാം. ഗായിക ജെന്നിഫർ ലോപ്പസിന്റെ മുഖം ഇതിന് ഉദാഹരണമാണ്.
നിങ്ങൾ ഈ ആകൃതിയിൽ ഉൾപ്പെടുന്നുവെങ്കിൽ മുഖത്തിന് അല്പം നീളം തോന്നിക്കുന്നതിനായി മുടി നീളത്തിൽ പല ലയറുകളായി വെട്ടിയിടുന്നത് മനോഹരമാകും. വശങ്ങളിൽ മുടി വെട്ടിയിടുന്നതും ഈ ആകൃതിയുള്ളവർക്ക് അനുയോജ്യമാകും.
ദീർഘ ചതുരാകൃതി
ഈ ആകൃതിയിലുള്ള മുഖം ചതുര ആകൃതിയോട് ഏറെക്കുറെ സമാനമാണ്. എന്നാൽ മുഖത്തിന്റെ നീളം വ്യത്യസ്തമായിരിക്കും. അല്പം നീണ്ടതും നെറ്റിത്തടവും താടിയെല്ലും ഏകദേശം ഒരേ വീതിയുമായിരിക്കും ഈ മുഖത്തിന്. കത്രീന കൈഫിന്റെ മുഖത്തിന്റെ ആകൃതി ഇതാണ്.
മുഖത്തിന്റെ നീളം കുറച്ചു കാണിക്കുന്നതിനായി താടിയ്ക്കും തോളുകൾക്കുമിടയിൽ വരുന്ന വിധം മുടി വെട്ടിയിടാം. ഇത് മുഖത്തിന് കൂടുതൽ ആകർഷണീയത നൽകും. കൂടുതൽ ലയറുകൾ കൊടുത്തുകൊണ്ടുള്ള ഹെയർ കട്ടുകൾ നന്നായി ഇണങ്ങും
Read More….എന്ത് കഴിച്ചാലും ദഹനക്കേട് അനുഭവപ്പെടുന്നുണ്ടോ? ഭക്ഷണത്തിനു ശേഷം ഇതൊരു കഷ്ണം കഴിച്ചാൽ മതി
