അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഇസ്രായേല്‍ രൂക്ഷ ആക്രമണം നടത്തിയതോടെ ഗസ്സയിലെ രണ്ടാമത്തെ വലിയ ആതുരാലയമായ നാസ്സർ ആശുപത്രിയുടെ പ്രവർത്തനം പൂർണമായും നിലച്ചു.കരമാർഗവും വ്യോമമാർഗവും സൈന്യം ആശുപത്രി ആക്രമിച്ചതോടെയാണ് 200 ഓളം രോഗികളുള്ള ആശുപത്രിയുടെ പ്രവർത്തനം നിലച്ചത്. ഒരു മാസമായി ഇസ്രായേല്‍ സൈന്യം വളഞ്ഞ ആശുപത്രിയുടെ പ്രവർത്തനം നിലച്ചത് ഗസ്സ ആരോഗ്യ മന്ത്രാലയവും ലോകാരോഗ്യ സംഘടനയും സ്ഥിരീകരിച്ചിട്ടുണ്ട്. ആഴ്ചകള്‍ നീണ്ട ഉപരോധം ഈയാഴ്ച ഇസ്രായേല്‍ സൈന്യം തീവ്രമാക്കിയതാണ് തെക്കൻ ഗാസയിലെ ഖാൻ യൂനിസിലെ ആശുപത്രിയുടെ പ്രവർത്തനത്തെ ബാധിച്ചത്.
‘നിലവില്‍ നാല് ആരോഗ്യ പ്രവർത്തകർ മാത്രമാണ് രോഗികളുടെ കാര്യങ്ങള്‍ നോക്കാൻ ആശുപത്രിയിലുള്ളത്’ ഗസ്സ ആരോഗ്യ മന്ത്രാലയ വക്താവ് അഷ്‌റ് അല്‍ ഖുദ്‌റ റോയിട്ടേഴ്‌സിനോട് പറഞ്ഞു. ആശുപത്രിയില്‍ കടന്ന് ഗുരുതരാവസ്ഥയിലുള്ള രോഗികളടക്കമുള്ളവരുടെ കാര്യങ്ങള്‍ നോക്കാൻ തങ്ങളുടെ സംഘത്തെ വെള്ളിയാഴ്ച മുതല്‍ ഇസ്രായേല്‍ സൈന്യം അനുവദിക്കുന്നില്ലെന്ന് ലോകാരോഗ്യ സംഘടനാ തലവൻ ടെഡ്രോസ് അദാനോം ഗെബ്രിയേസസ് പറഞ്ഞു.
Ground and air attacks by Israeli forces have now rendered Nasser Hospital, Gaza’s second-largest medical facility, nonoperational https://t.co/LKpOPHxVi6 pic.twitter.com/6sAYCJxTtH
— Al Jazeera English (@AJEnglish) February 18, 2024
നിലവില്‍ 200 ഓളം രോഗികള്‍ ആശുപത്രിയിലുണ്ട്, അവരില്‍ 20 പേരെങ്കിലും അടിയന്തര ചികിത്സ നേടാൻ മറ്റു ആശുപത്രികളിലേക്ക് റഫർ ചെയ്യപ്പെടേണ്ടവരാണ്. അത് രോഗിയുടെ അവകാശമാണ്. ഇത് വൈകുന്നതിന് രോഗിയുടെ ജീവനാണ് വില നല്‍കേണ്ടി വരിക’ ലോകാരോഗ്യ സംഘടനാ തലവൻ പറഞ്ഞു.
ഫലസ്തീനികള്‍ അഭയം പ്രാപിച്ച ആശുപത്രിയില്‍ ഇസ്രായേലി സൈനികർ കഴിഞ്ഞ കുറച്ച്‌ ദിവസങ്ങളായി റെയ്ഡ് നടത്തിയിരുന്നു. അതിനിടെ, ഇസ്രായേല്‍ സൈന്യം പരിക്കേറ്റവരെ പരിചരിക്കുകയായിരുന്ന ആശുപത്രിയിലെ ഡയറക്ടർമാരെയും ജീവനക്കാരെയും അറസ്റ്റ് ചെയ്തതായി ശനിയാഴ്ച ആരോഗ്യ മന്ത്രാലയം അറിയിച്ചിരുന്നു. വെള്ളിയാഴ്ച, ഐക്യരാഷ്ട്രസഭയുടെ നേതൃത്വത്തിലുള്ള ഒരു സഹായ സംഘത്തെ ഏഴ് മണിക്കൂറോളം അധിനിവേശ സൈന്യം തടഞ്ഞുവെച്ചതായും മന്ത്രാലയം അറിയിച്ചു. ഇസ്രായേല്‍ സൈന്യം നാസർ ഹോസ്പിറ്റലിനെ സൈനിക ഔട്ട്പോസ്റ്റാക്കി മാറ്റിയിരിക്കുകയാണെന്ന് ഖുദ്‌സ് ന്യൂസ് നെറ്റ്‌വർക്ക് റിപ്പോർട്ട് ചെയ്തു. പ്രസവത്തിനായുള്ള കെട്ടിടത്തില്‍ മെഡിക്കല്‍ സ്റ്റാഫിനെ ഇസ്രായേല്‍ സേന മണിക്കൂറുകളോളം തടഞ്ഞുനിർത്തിയതായും അവരുടെ കൈകള്‍ ബന്ധിച്ചതായും എക്‌സില്‍ പറഞ്ഞു. അവരെ ആക്രമിക്കുകയും അവരുടെ വസ്ത്രങ്ങള്‍ അഴിക്കുകയും ചെയ്തതായും ട്വീറ്റ് ചെയ്തു. ആശുപത്രിയില്‍നിന്ന് 70 ആരോഗ്യ പ്രവർത്തകരെ ഇസ്രായേല്‍ സേന അറസ്റ്റ് ചെയ്തതായും വ്യക്തമാക്കി.
Nasser hospital in #Gaza is not functional anymore, after a weeklong siege followed by the ongoing raid.
Both yesterday and the day before, the @WHO team was not permitted to enter the hospital to assess the conditions of the patients and critical medical needs, despite…
— Tedros Adhanom Ghebreyesus (@DrTedros) February 18, 2024
പാടേ അവശരായ നിരവധി രോഗികളെ ഇസ്രായേല്‍ സൈന്യം പിടികൂടി, സ്ട്രെച്ചറുകളിലായി സൈനിക ട്രക്കുകളില്‍ കയറ്റി അജ്ഞാത സ്ഥലത്തേക്ക് കൊണ്ടുപോയതായി റിപ്പോർട്ട് ചെയ്തു. ഓക്‌സിജൻ ക്ഷാമം ഇതുവരെ എട്ട് രോഗികളുടെ മരണത്തിലേക്ക് നയിച്ചതായും കൂടാതെ ഗുരുതരാസ്ഥയിലുള്ള ഡസൻ കണക്കിന് പേർ മരിക്കുമെന്ന് ഭയപ്പെടുന്നതായും ഇന്ന് വൈകീട്ട് പുറത്തുവിട്ട ട്വീറ്റില്‍ പറഞ്ഞു.
അതേസമയം, ഖാൻ യൂനിസില്‍ ഇപ്പോഴും പ്രവർത്തിക്കുന്ന ഒരേയൊരു പ്രധാന മെഡിക്കല്‍ സൗകര്യമായ അല്‍-അമല്‍ ആശുപത്രിക്കെതിരെയും ഇസ്രായേല്‍ ആക്രമണം തുടരുകയാണ്. ഇസ്രായേല്‍ സൈന്യം ആശുപത്രിയുടെ മൂന്നാം നിലയിലേക്ക് പീരങ്കി ലക്ഷ്യമിട്ടതായി ഫലസ്തീൻ റെഡ് ക്രസന്റ് സൊസൈറ്റി (പിആർസിഎസ്) ഞായറാഴ്ച പറഞ്ഞു.
അതേസമയം, 1.4 ദശലക്ഷത്തിലധികം ഫലസ്തീനികള്‍ അഭയം പ്രാപിച്ച റഫയില്‍ കരയാക്രമണം നടത്തുമെന്നതില്‍ ഇസ്രായേല്‍ പ്രധാനമന്ത്രി ബെഞ്ചമിൻ നെതന്യാഹു ഉറച്ചുനില്‍ക്കുകയാണ്. റഫയിലെ അധിനിവേശം അംഗീകരിക്കില്ലെന്ന് യുണൈറ്റഡ് സ്റ്റേറ്റ്‌സും മറ്റ് ഇസ്രായേല്‍ സഖ്യകക്ഷികളും പറഞ്ഞിട്ടുണ്ട്, എന്നാല്‍ ഇസ്രായേല്‍ സമ്ബൂർണ വിജയമെന്ന സമീപനവുമായി മുന്നോട്ട് പോയാല്‍ അവർ എന്തുചെയ്യുമെന്ന് വ്യക്തമല്ല.
അന്വേഷണം വാർത്തകൾ വാട്സാപ്പിൽ ലഭിക്കാൻ ഇവിടെ ക്ലിക്ക് ചെയ്യുക
