അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ജൊഹാനസ്ബര്ഗ്: അണ്ടര്-19 ലോകകപ്പ് ക്രിക്കറ്റില് ഇന്ത്യ സെമിയില്. സൂപ്പര് സിക്സ് റൗണ്ടിലെ രണ്ടാം മത്സരത്തില് നേപ്പാളിനെ 132 റണ്സിന് തകര്ത്താണ് ഇന്ത്യന് ജയം. ക്യാപ്റ്റന് ഉദയ് സഹാറന്റെയും സച്ചിന് ദാസിന്റെയും സെഞ്ചുറി ബലത്തില് ഇന്ത്യ ഉയര്ത്തിയ 298 റണ്സ് വിജയലക്ഷ്യം നേപ്പാളിന് മറികടക്കാനായില്ല. നിശ്ചിത ഓവറില് ഒന്പത് വിക്കറ്റ് നഷ്ടത്തില് 165 റണ്സെടുക്കാനേ നേപ്പാളിന് കഴിഞ്ഞുള്ളൂ.
ടോസ് നേടിയ ഇന്ത്യൻ ക്യാപ്റ്റന് ബാറ്റിങ് തിരഞ്ഞെടുക്കുകയായിരുന്നു. തുടക്കത്തിൽ അൽപം പതറിയെങ്കിലും സഹാറും സച്ചിനും ചേർന്ന് ഇന്ത്യയെ വലിയ ടോട്ടലിൽ എത്തിക്കുകയായിരുന്നു. 62 റണ്സെടുക്കുന്നതിനിടെ ആദ്യ മൂന്നു വിക്കറ്റുകൾ ഇന്ത്യയ്ക്ക് നഷ്ടമായി. ഓപ്പണർമാരായ ആദർശ് സിങ് (21), അർഷിൻ കുൽക്കർണി (18) എന്നിവർ വിക്കറ്റ് കീപ്പർക്ക് ക്യാച്ച് നൽകി മടങ്ങിയപ്പോൾ പ്രിയാൻഷു മൊലിയ (19) റണ്ണൗട്ടായി. പിന്നീടു ചേർന്ന സഹറാൻ – സച്ചിൻ സഖ്യം നാലാം വിക്കറ്റിൽ 215 റൺസ് കൂട്ടിച്ചേർത്തു.
101 പന്തില് 116 റണ്സാണ് സച്ചിന് ദാസിന്റെ സംഭാവന. 11 ഫോറും മൂന്ന് സിക്സും അടങ്ങുന്നതാണ് ഇന്നിങ്സ്. ഒന്പത് ഫോറുകളുടെ അകമ്പടിയോടെ 107 പന്തില് 100 റണ്സാണ് ക്യാപ്റ്റന്റെ സമ്പാദ്യം. ഇരുവരെയും ഗുല്സന് ഝായാണ് മടക്കിയത്. കഴിഞ്ഞ കളിയിൽ സെഞ്ചറി നേടിയ മുഷീര് ഖാന് 9 റണ്സുമായി പുറത്താവാതെ നിന്നു. നേപ്പാളിനായി ഗുല്സന് ഝാ മൂന്നും ആകാശ് ചന്ദ് ഒരു വിക്കറ്റും നേടി.
വിജയലക്ഷ്യവുമായി ഇറങ്ങിയ നേപ്പാളിന് ഒരവസരത്തിലും ഇന്ത്യക്ക് ഭീഷണിയുയർത്താനായില്ല. ഓപണർമാരായ ദീപക് ബൊഹ്റയും (42 പന്തിൽ 22), അർജുൻ കുമലും (64 പന്തിൽ 26) പിടിച്ചുനിന്നെങ്കിലും ഇന്ത്യയുടെ ബൗളിങ് ആക്രമണത്തിൽ റൺസ് കണ്ടെത്താൻ പ്രയാസപ്പെട്ടു. ക്യാപ്റ്റൻ ദേവ് ഖനലാണ് (53 പന്തിൽ 33 റൺസ്) നേപ്പാളിന്റെ ടോപ് സ്കോറർ. അവസാന വിക്കറ്റിൽ ആകാശ് ചന്ദും (18 നോട്ടൗട്ട്) ദുർഗേഷ് ഗുപ്തയും (29 നോട്ടൗട്ട്) ചേർന്ന് 45 റൺസ് കൂട്ടിച്ചേർത്തത് നേപ്പാളിന്റെ തോൽവിഭാരം കുറച്ചു. ഇന്ത്യക്കായി സൗമി പാണ്ഡെ നാലുപേരെ മടക്കിയപ്പോൾ അർഷിൻ കുൽകർണി രണ്ടും രാജ് ലിംബാനി, മുരുകൻ അഭിഷേക്, ആരാധ്യ ശുക്ല എന്നിവർ ഓരോന്നും വിക്കറ്റെടുത്തു.
അന്വേഷണം വാർത്തകൾ വാട്ട്സപ്പിൽ ലഭിക്കാൻ ഇവിടെ ക്ലിക്ക് ചെയ്യൂ
