അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ആൻഡ്രോയിഡ് ഫോണുകളില്‍ പുത്തൻ സുരക്ഷാ ഫീച്ചറുമായി ഗൂഗിള്‍. ക്രോം ബ്രൗസറുകളിലാണ് പെര്‍മിഷൻ നല്‍കുന്നതിനെ കൂടുതല്‍ സുരക്ഷിതമാക്കുന്ന ഫീച്ചര്‍ പുറത്തിറക്കുന്നത്.നിലവില്‍ ക്രോം ഉപയോക്താക്കള്‍ക്ക് ആപ്പില്‍ എന്തെങ്കിലും പെര്‍മിഷൻ നല്‍കുന്നതിനായി ‘അലോ’ എന്ന ഒറ്റ ഓപ്ഷൻ മാത്രമാണ് ലഭ്യമാകുന്നത്. ഇതിനൊപ്പം ‘വണ്‍ ടൈം’ പെര്‍മിഷൻ ഫീച്ചറാണ് കമ്ബനി പുതിയതായി പുറത്തിറക്കുന്നത്.
ഈ പുതിയ ഓപ്ഷൻ ഉപയോക്താക്കള്‍ക്ക് അവരുടെ ഉപകരണത്തില്‍ ആക്സസ് ചെയ്യാൻ കഴിയുന്ന സൈറ്റുകള്‍ക്ക് കൂടുതല്‍ നിയന്ത്രണം നല്‍കും. നിലവില്‍, ഒരു വെബ്സൈറ്റ് നിങ്ങളുടെ ലൊക്കേഷൻ, ക്യാമറ അല്ലെങ്കില്‍ മൈക്രോഫോണ്‍ പോലുള്ള ഫീച്ചറുകളിലേക്ക് ആക്സസ് അഭ്യര്‍ത്ഥിക്കുമ്ബോള്‍, നിങ്ങള്‍ എല്ലായ്പ്പോഴും ആക്സസ് അനുവദിക്കുകയോ പൂര്‍ണ്ണമായും തടയുകയോ ചെയ്യേണ്ടതുണ്ട്. പുതിയ വണ്‍ ടൈം അനുമതി മൂന്നാമത് ഒരു ഓപ്ഷനായി ദൃശ്യമാകും. ഇത് ആ സമയത്തെ ബ്രൗസിംഗിനു മാത്രമാണ് അനുമതി നല്‍കുകയുള്ളു.
ആൻഡ്രോയിഡ് ഫോണുകളില്‍, ആപ്പ് പെര്‍മിഷൻ നല്‍കുന്നതിനു സമാനമായാണ് ക്രോമിലെ പെര്‍മിഷൻ ഫീച്ചര്‍ പ്രവര്‍ത്തിക്കുന്നത്. മറ്റ് ക്രോം അധിഷ്ഠിത ബ്രൗസറുകളിലും സമാന ഫീച്ചര്‍ ഭാവിയില്‍ പ്രതീക്ഷിക്കാം.
ക്യാമറ, മൈക്രോഫോണ്‍, ലൊക്കേഷൻ തുടങ്ങിയ സേവനങ്ങള്‍ പശ്ചാത്തലത്തില്‍ ഉപയോഗിക്കുന്ന ആപ്പുകളെ, കണ്ടെത്തുകയും ഉപയോക്താവിനെ അറിയിക്കുകയും ചെയ്യുന്ന ഫീച്ചറുകള്‍ അടുത്തിടെ ആൻഡ്രോയിഡ് പുതിയ പതിപ്പുകളില്‍ കൊണ്ടുവന്നിരുന്നു. എന്നിരുന്നാലും, പുതിയ വണ്‍ ടൈം പെര്‍മ്മിഷൻ ഫീച്ചര്‍ മറ്റൊരു അധിക സുരക്ഷാ കവചമാകും.
വണ്‍ ടൈം പെര്‍മിഷൻ ഫീച്ചര്‍ ഇപ്പോഴും പരീക്ഷണത്തിലായതിനാല്‍, അവ നിലവില്‍ ക്രോം കാനറി പതിപ്പ് 122-ല്‍ ഒരു ഫ്ലാഗിന് പിന്നില്‍ ഹൈഡു ചെയ്തിരിക്കുകയാണ്. ഫീച്ചര്‍ ഇതുവരെ പൂര്‍ണ്ണമായും പ്രവര്‍ത്തനക്ഷമമായിട്ടില്ല. ഇത് പ്രവര്‍ത്തനക്ഷമമാക്കാൻ ആഗ്രഹിക്കുന്ന ഉപയോക്താക്കള്‍ക്ക് കാനറിയിലെ chrome://flags/#one-time-permission എന്ന ഓപ്ഷൻ തിരഞ്ഞെടുക്കാം.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
