അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ആലപ്പുഴ: അർത്തുങ്കൽ സെന്റ് ആൻഡ്രൂസ് ബസിലിക്കയിലെ പെരുന്നാൾ ആഘോഷത്തിൻ്റെ ഭാഗമായി അഞ്ച് ദിവസം മദ്യശാലകൾ അടച്ചിടും. ചേർത്തല എക്‌സൈസ് റേഞ്ച് പരിധിയിൽ വരുന്നതും പള്ളിയുടെ രണ്ട് കിലോമീറ്റർ ചുറ്റളവിൽ പ്രവർത്തിച്ചു വരുന്നതുമായ കള്ളുഷാപ്പകൾ, ബീയർ പാർലറുകൾ, ബാറുകൾ ഉൾപ്പെടെയുള്ള എല്ലാ മദ്യശാലകളും 20, 21, 26, 27, 28 എന്നീ തീയതികളിലാണ് അടച്ചിടുക. ജില്ലാ കളക്ടറാണ് ഇതുസംബന്ധിച്ച ഉത്തരവിറക്കിയത്.
Read also: സമ്പൂർണ ശുചിത്വ മണ്ഡലം രണ്ടാം ഘട്ട പ്രവർത്തനങ്ങൾ സംഘടിപ്പിക്കുന്നതിനായി യോഗം ചേർന്നു
സ്ത്രീകളും കുട്ടികളുമടങ്ങുന്ന തീർഥാടകരുടെ സുരക്ഷയും സുഗമമായ ക്രമസമാധാന പാലനവും ഉറപ്പ് വരുത്തുന്നതിനാണ് മദ്യശാലകൾ അടച്ചിടാൻ നിർദേശം നൽകിയിരിക്കുന്നത്. കൂടാതെ, പള്ളി കടലിനോട് ചേർന്ന് സ്ഥിതിചെയ്യുന്നതിനാൽ ആളുകൾ മദ്യപിച്ചു കടലിലിറങ്ങി അപകടങ്ങൾ സംഭവിക്കാനുള്ള സാധ്യതകൂടി കണക്കിലെടുത്താണ് തീരുമാനം.
അർത്തുങ്കൽ സെന്റ് ആൻഡ്രൂസ് ബസിലിക്കയിലെ പെരുന്നാളിന് 10ന് വൈകിട്ട് ആറരയ്ക്ക് കൊടിയേറി. കൊടിയേറ്റ് മുതൽ എട്ടാം പെരുന്നാൾ ദിവസം വരെ (27) പതിനായിരക്കണക്കിന് വിശ്വാസികളാണ് പള്ളിയിലേക്ക് എത്തിച്ചേരുക. തീർഥാടകരുടെ സുരക്ഷയ്ക്കായി വിപുലമായ സൗകര്യങ്ങളാണ് സ‍ർക്കാരിൻ്റെ നേതൃത്വത്തിൽ ഒരുക്കിയിരിക്കുന്നത്.
പള്ളിയിൽ എത്തുന്നവരെ വാച്ച് ടവറിൽനിന്നു മുഴുവൻ സമയവും നിരീക്ഷിക്കുന്നുണ്ട്. ബീച്ച് സൈഡിൽ സിസിടിവികൾ സ്ഥാപിച്ചിട്ടുണ്ട്. പള്ളിക്കു സമീപം അഞ്ചേക്കറിൽ പാർക്കിങ് സൗകര്യം ഒരുക്കിയിട്ടുണ്ട്. പ്രധാന ദിവസങ്ങളിൽ വിവിധ സ്ഥലങ്ങളിലേക്ക് കെഎസ്ആർടിസി പ്രത്യേക സർവീസ് നടത്തും.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
