അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഇന്ത്യയിൽ യാത്രാവാഹനങ്ങളുടെ വിൽപന പൊടിപൊടിക്കുന്നു. ഡിസംബർ മാസത്തിൽ ശക്തമായ വിൽപന രേഖപ്പെടുത്തിയതോടെ, കഴിഞ്ഞ കലണ്ടർ വർഷത്തിലെ (2023) മൊത്തം കാർ, യൂട്ടിലിറ്റി വാഹനങ്ങളുടെ വിൽപന 40 ലക്ഷം മറികടന്നു. ഇന്ത്യ ആദ്യമായാണ് ഒരു കലണ്ടർ വർഷത്തിനിടെ 40 ലക്ഷം യാത്രാവാഹനങ്ങൾ വിറ്റഴിക്കുന്ന നാഴികക്കല്ല് സ്വന്തമാക്കുന്നത്.
വാഹന മേഖലയിലെ വിദഗ്ധർ നൽകുന്ന കണക്കുകൾ പ്രകാരം, 2023 വർഷക്കാലയളവിൽ ആകെ 41 ലക്ഷം യാത്രാവാഹനങ്ങളുടെ വിൽപന നടന്നതായി രേഖപ്പെടുത്തുന്നു. വാഷികാടിസ്ഥാനത്തിൽ ആഭ്യന്തര വിപണിയിലെ വാഹന വിൽപനയിൽ 8.2 ശതമാനം വളർച്ചയാണ് 2023ൽ കുറിച്ചത്. ഇതിന് തൊട്ടുമുൻപത്തെ വർഷമായ 2022ൽ രാജ്യത്ത് മൊത്തം 37.9 ലക്ഷം യാത്രാവാഹനങ്ങളാണ് വിറ്റഴിച്ചത്.
റീട്ടെയിൽ വിപണി ഉണർന്നു
അതേസമയം ഡിസംബർ മാസത്തിനിടെ രാജ്യത്തെ കാറുകളുടെ റീട്ടെയിൽ വിൽപന ഭേദപ്പെട്ട തോതിൽ വർധിച്ച് 4,42,800 യൂണിറ്റായി. ഇതോടെ വിപണിയിൽ സ്റ്റോക്ക് ചെയ്തിരുന്ന വാഹനങ്ങളുടെ എണ്ണവും താഴ്ന്നു. ഇതിനെ തുടർന്ന്, കഴിഞ്ഞ മാസം 4.4 ശതമാനം വർധനയോടെ 2,87,904 യൂണിറ്റ് വാഹനങ്ങളാണ് കാർ നിർമാതാക്കളുടെ ഫാക്ടറിയിൽ നിന്നും പുറത്തേക്ക് അയച്ചത്. ഡിസംബർ മാസത്തിൽ രേഖപ്പെടുത്തുന്ന റെക്കോഡ് ഉത്പാദനമാണിത്. നിലവിൽ 1,76,500 യൂണിറ്റുകൾ റീട്ടെയിൽ വിപണിയിൽ ലഭ്യമാണെന്നാണ് വിദഗ്ധർ സൂചിപ്പിച്ചത്
പകുതിയും എസ്‍യുവികൾ
യാത്രാവാഹന വിപണിയെ സംബന്ധിച്ച് ഉജ്ജ്വല വർഷമായിരുന്നു 2023 എന്ന്, ഇന്ത്യയിലെ ഏറ്റവും വലിയ കാർ നിർമാതാവായ മാരുതി സുസൂക്കിയുടെ മാർക്കറ്റിങ് & സെയിൽസ്, സീനിയർ എക്സിക്യൂട്ടീവ് ഓഫീസ‌ർ, ശശാങ്ക് ശ്രീവാസ്തവ പറഞ്ഞു. എസ്യുവി വിഭാഗത്തിലെ വാഹനങ്ങൾക്ക് ശക്തമായ ഡിമാൻഡ‍് ഉയർന്നതാണ് റെക്കോഡ് കാർ വിൽപനയിലേക്ക് നയിച്ചതെന്ന് അദ്ദേഹം വ്യക്തമാക്കി. നിലവിൽ രാജ്യത്തെ യാത്രാവാഹനങ്ങളുടെ വിപണിയിൽ വിറ്റഴിക്കപ്പെടുന്നതിന്റെ പകുതിയും എസ്‍യുവിയാണെന്നും ശശാങ്ക് ശ്രീവാസ്തവ ചൂണ്ടിക്കാട്ടി.
നിലവിൽ രാജ്യത്തെ യാത്രാവാഹനങ്ങളുടെ വിപണിയിൽ വിറ്റഴിക്കപ്പെടുന്നതിന്റെ പകുതിയും എസ്‍യുവിയാണെന്നും ശശാങ്ക് ശ്രീവാസ്തവ ചൂണ്ടിക്കാട്ടി. 2023 വർഷത്തിനിടെ ആഭ്യന്തര വിപണിയിലും വിദേശത്തേക്കുമായി മൊത്തം 20 ലക്ഷത്തിലധികം യൂണിറ്റുകളാണ് മാരുതി സുസൂക്കി വിറ്റഴിച്ചത്. രാജ്യത്തെ എസ്യുവി വിപണിയിൽ മാരുതിക്ക് 20 ശതമാനത്തിലധികം വിഹിതമാണുള്ളത്. അതേസമയം രാജ്യത്തെ യാത്രാവാഹന വിപണിയിൽ മാരുതിക്ക് 42 ശതമാനം വിഹിതം സ്വന്തമായുണ്ട്.
