അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഇന്ത്യയിൽ ആഭ്യന്തരമായി ഉത്പാദിപ്പിക്കുന്ന ക്രൂഡോയിലിനുമേൽ ചുമത്തിയിരുന്ന വിൻഡ്ഫോൾ ടാക്സ് കേന്ദ്രസർക്കാർ ഉയർത്തി. ആഭ്യന്തര ക്രൂഡോയിലിന്റെ വിൻഡ്ഫോൾ ടാക്സ് ഒരു ടണ്ണിന് 2,300 രൂപയായാണ് വർധിപ്പിച്ചത്. നിലവിൽ ചുമത്തിയിരുന്ന പ്രത്യേക അധിക എക്സൈസ് തീരുവ (SAED), ടണ്ണിന് 1,300 രൂപയായിരുന്നു. ഇതു സംബന്ധിച്ച കേന്ദ്ര ധനമന്ത്രാലയത്തിന്റെ ഉത്തരവ് പുറത്തിറങ്ങി.
അതേസമയം വിദേശത്തേക്ക് കയറ്റുമതി ചെയ്യുന്ന ഡീസലിനും വിമാനത്തിന്റെ ഇന്ധനമായ എടിഎഫിനും ചുമത്തിയിരുന്ന പ്രത്യേക അധിക എക്സൈസ് തീരുവ ഒഴിവാക്കി. നിലവിൽ കയറ്റുമതി ചെയ്യുന്ന ഒരു ലിറ്റർ ഡീസലിന് 0.50 രൂപ വീതവും ഒരു ലിറ്റർ എടിഎഫിന് 1.0 രൂപ വീതവുമായിരുന്നു ചുമത്തിയിരുന്നത്. കയറ്റുമതി ചെയ്യുന്ന പെട്രോളിനെ പ്രത്യേക അധിക എക്സൈസ് തീരുവയിൽ നിന്നും നേരത്തെതന്നെ ഒഴിവാക്കിയിരുന്നു.
വിൻഡ്ഫോൾ ടാക്സ്
ഉത്പാദകർ അല്ലെങ്കിൽ കയറ്റുമതിക്കാർ ഉത്പന്നത്തിനുമേൽ പ്രത്യേകമായൊന്നും ചെയ്യാതെ തന്നെ, വിപണി വിലയിൽ ഉണ്ടാകുന്ന കുതിച്ചുച്ചാ‌ട്ടം കാരണം സ്വന്തമാക്കുന്ന അധിക ലാഭത്തിനുമേൽ ചുമത്തുന്ന നികുതിയെയാണ് വിൻഡ്ഫോൾ ടാക്സ് എന്നു വിശേഷിപ്പിക്കുന്നത്. റഷ്യ – യുക്രൈൻ യുദ്ധം കാരണം രാജ്യാന്തര വിപണിയിൽ ക്രൂഡോയിൽ വില കുതിച്ചുകയറിയപ്പോൾ 2022 ജൂലൈയിലാണ് ഇന്ത്യ ആഭ്യന്തരമായി ഉത്പാദിപ്പിക്കുന്ന ക്രൂഡോയിലിനുമേൽ ആദ്യമായി വിൻഡ്ഫോൾ ടാക്സ് ചുമത്തിയത്.
അന്താരാഷ്ട്ര വിപണിയിൽ ഒരു ബാരൽ ക്രൂഡോയിലിന്റെ വില 75 ഡോളറിനു മുകളിലാകുമ്പോഴാണ് ആഭ്യന്തര ക്രൂഡോയിലിനും വിൻഡ്ഫോൾ ടാക്സ് ചുമത്തുന്നത്. തൊട്ടുമുൻപത്തെ രണ്ടാഴ്ചയിൽ രാജ്യാന്തര വിപണിയിൽ രേഖപ്പെടുത്തുന്ന ക്രൂഡോയിൽ വിലയുടെ ശരാശരി നിലവാരം അടിസ്ഥാനമാക്കി, എല്ലാ രണ്ടാഴ്ച കൂടുമ്പോഴും കേന്ദ്രസർക്കാർ വിൻഡ്ഫോൾ ടാക്സ് നിരക്ക് പുതുക്കി നിശ്ചയിക്കുന്നു.
ക്രൂഡോയിൽ വില
ഇറാന്റെ യുദ്ധക്കപ്പൽ ചെങ്കടലിലേക്ക് പ്രവേശിച്ചുവെന്ന മാധ്യമ റിപ്പോർട്ടുകൾ പുറത്തുവന്നതോടെ രാജ്യാന്തര വിപണിയിൽ ക്രൂഡോയിൽ വില ഉയർന്നു. യുദ്ധക്കപ്പലിന്റെ ഉദ്ദേശ്യം വ്യക്തമല്ലെങ്കിലും യെമനിലെ ഹൂതികളെ പിന്തുണയ്ക്കാനാണെന്ന വിലയിരുത്തലും പശ്ചിമേഷ്യയിലെ സംഘർഷം മൂർച്ഛിക്കുമോയെന്ന ആശങ്കയുമാണ് ക്രൂഡോയിൽ വില ഉയർത്തിയത്. നിലവിൽ ബ്രെന്റ് ക്രൂഡോയിൽ 1.73 ശതമാനം വർധനയോടെ 78.37 ഡോളറിലും യുഎസ് ഡബ്ല്യുടിഐ ക്രൂഡോയിൽ 1.52 ശതമാനം ഉയർന്ന് 72.74 ഡോളറിലുമാണ് വ്യാപാരം ചെയ്യപ്പെടുന്നത്.
ഇന്നത്തെ ഇന്ധന നിരക്ക്
രാജ്യത്തെ വാഹന ഇന്ധന നിരക്കുകളിൽ ചൊവ്വാഴ്ചയും കാര്യമായ മാറ്റങ്ങളൊന്നും റിപ്പോർട്ട് ചെയ്തിട്ടില്ല. 2022 മേയ് മാസത്തിനുശേഷം രാജ്യത്തെ പെട്രോൾ, ഡീസൽ നിരക്കുകൾ ഏകദേശം ഒരേ നിലവാരത്തിൽ തന്നെ തു‌ടരുകയാണ്. അതേസമയം കേരളത്തിൽ ഒരു ലിറ്റർ പെട്രോളിന്റെ നിരക്ക് 108 – 109 രൂപ നിലവാരത്തിലും ഒരു ലിറ്റർ ഡീസലിന്റെ നിരക്ക് 96- 98 രൂപ നിലവാരത്തിലും തുടരുന്നു.
