അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
തിരുവനന്തപുരം: സ്വാമി സന്ദീപാനന്ദ ഗിരിയുടെ ആശ്രമം കത്തിച്ച കേസിൽ ബിജെപി കൗൺസിലർ ഗിരികുമാറിന് ജാമ്യം. അതേസമയം മൂന്നാം പ്രതിയായ ശബരി എസ് നായരുടെ ജാമ്യാപേക്ഷ കോടതി തള്ളി. ശബരി.എസ്.നായരുടെ ജാമ്യാപേക്ഷ 12 ന് പരിഗണിക്കും. തിരുവനന്തപുരം അഡീഷണൽ ചീഫ് ജുഡീഷ്യൽ മജിസ്ട്രേറ്റ് കോടതിയാണ് ഹർജി പരിഗണിച്ചത്.
ആശ്രമം കത്തിക്കാന് നിര്ദേശിച്ചത് ഗിരികുമാറാണെന്നും ആശ്രമം തീയിട്ട രണ്ടു പേരില് ഒരാള് ശബരിയാണെന്നുമായിരുന്നു അന്വേഷണസംഘത്തിന്റെ കണ്ടെത്തല്. ബിജെപിയുടെ തിരുവനന്തപുരം ജില്ലാ ജനറല് സെക്രട്ടറിയും നഗരസഭ കൗണ്സിലറുമാണ് ഗിരികുമാര്. ആശ്രമം കത്തിക്കാനുള്ള ഗൂഡാലോചനയിൽ ബിജെപി നേതാവായ ഗിരിക്ക് മുഖ്യപങ്കുണ്ടെന്നാണ് ക്രൈം ബ്രാഞ്ചിന്റെ കണ്ടെത്തൽ.
മെയ് രണ്ടിനാണ് ബിജെപി കൗണ്സിലര് വി ജി ഗിരികുമാറെ പൊലീസ് അറസ്റ്റ് ചെയ്യുന്നത്. കേസിലെ മുഖ്യസൂത്രധാരന് ഇയാളാണെന്ന് കാട്ടി ക്രൈംബ്രാഞ്ച് റിപ്പോര്ട്ട് നല്കുകയും ചെയ്തിരുന്നു. ശബരിമലയിലെ യുവതി പ്രവേശന വിഷയത്തില് സന്ദീപാനന്ദഗിരി നടത്തിയ പരാമര്ശങ്ങളിലുള്ള അതൃപ്തിയെ തുടര്ന്നാണ് ആക്രമണം നടത്തിയതെന്നാണ് റിമാന്ഡ് റിപ്പോര്ട്ടില് പറയുന്നത്.
ആശ്രമം കത്തിച്ച കേസിലെ ഒന്നാം പ്രതിയും ആർഎസ്എസ് പ്രവർത്തകനുമായിരുന്ന പ്രകാശിന്റെ സഹോദരൻ പ്രശാന്തിന്റെ വെളിപ്പെടുത്തലാണ് കേസിൽ വഴിത്തിരിവായത്. സുഹൃത്തുക്കളോടൊപ്പം ചേര്ന്ന ആശ്രമം കത്തിച്ചെന്ന് ആത്മഹത്യ ചെയ്യും മുൻപ് പ്രകാശ് സഹോദരനോട് പറഞ്ഞിരുന്നു. ഈ വിവരം പിന്തുർന്നാണ് അഞ്ചു വർഷം തെളിയപ്പെടാതെ കിടന്ന കേസിൽ ക്രൈം ബ്രാഞ്ച് പ്രതികളിലേക്ക് എത്തിയത്.
2018 ഒക്ടോബര് 27നായിരുന്നു തിരുവനന്തപുരം കുണ്ടമണ് കടവിലുള്ള സന്ദീപാനന്ദഗിരിയുടെ ആശ്രമം തീപിടിച്ച നിലയില് കണ്ടെത്തിയത്. മൂന്ന് വാഹനങ്ങള് കത്തിനശിക്കുകയും ആശ്രമത്തിന് ഭാഗികമായ കേടുപാടുകളും സംഭവിച്ചിരുന്നു. തീയിട്ടവര് ആദരാഞ്ജലികള് എന്നെഴുതിയ റീത്തും വെച്ചിരുന്നു.
