അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
തിരുവനന്തപുരം: ബ്രഹ്മപുരം മാലിന്യ പ്ലാന്റ് കത്തിയതുമൂലം മനുഷ്യരുടെ രക്തത്തിലെ ഡയോക്സിന്റെ അളവ് അടിയന്തരമായി പരിശോധിക്കണമെന്ന് പ്രതിപക്ഷ നേതാവ് വി ഡി സതീശൻ ആവശ്യപ്പെട്ടു. കൂടാതെ മൃഗസംരക്ഷണ വകുപ്പിന്റെ സഹായത്തോടെ വിഷപുക ശ്വസിച്ച പ്രദേശങ്ങളിലുള്ള പശു, ആട്, എരുമ എന്നിവയുടെ പാല്, രക്തം, മാംസം എന്നിവയിലടങ്ങിയിരിക്കുന്ന ഡയോക്സിന്റെ അളവ് പരിശോധിക്കണം.
വിഷപ്പുകയുടെ കാഠിന്യമുള്ള സ്ഥലങ്ങളിലെ ജനങ്ങള്ക്ക് ഗ്യാസ് മാസക് (ഫെയിസ് മാസ്ക് അല്ല) നല്കണം. കൂടാതെ വേനല് മഴ ഉണ്ടാകാനുള്ള സാധ്യത കണക്കിലെടുത്ത് മുന്കരുതലെന്നോണം മഴയ്ക്ക് മുമ്പും അതിന് ശേഷവും ജലാശയങ്ങളിലെ ജലത്തിന്റെ ഡയോക്സിന്റെ അളവ് പരിശോധിക്കപ്പെടണമെന്നും പ്രതിപക്ഷ നേതാവ് മുഖ്യമന്ത്രിക്ക് കത്തിൽ ആവശ്യപ്പെട്ടു. ബ്രഹ്മപുരം മാലിന്യം കത്തിയതുമായി ബന്ധപ്പെട്ട പ്രശ്നത്തില് മുഖ്യമന്ത്രിയുടെ അടിയന്തര ഇടപെടല് ഉണ്ടാകണമെന്ന് പ്രതിപക്ഷ നേതാവ് അഭ്യര്ത്ഥിച്ചു.
മാലിന്യം കത്തിയത് മൂലമുണ്ടായ ഡയോക്സിന് ബാധിച്ച പ്രദേശങ്ങളില് ഡോക്ടര്മാരെ നിയോഗിച്ച് ജനങ്ങളുടെ ശ്വസന വ്യവസ്ഥയുമായി ബന്ധപ്പെട്ട രോഗങ്ങള് പരിശോധിച്ചിട്ട് വലിയ പ്രയോജനമില്ലെന്ന് ആരോഗ്യ വിദഗ്ദര് അഭിപ്രായപ്പെടുന്നു. കാരണം ശ്വാസകോശ രോഗങ്ങള് പല രീതിയില് ഉണ്ടാകാം. അതിനാല് അടിയന്തരമായി ചെയ്യേണ്ടത് ബ്രഹ്മപുരം മാലിന്യം കത്തിയതുമൂലം മനുഷ്യരുടെ രക്തത്തിലെ ഡയോക്സിന്റെ അളവ് പരിശോധിക്കുകയാണ്. വിഷയത്തിന്റെ പൊതുതാത്പര്യം മുന്നിര്ത്തി ജനങ്ങളുടെ ജീവന് സംരക്ഷണം നല്കാന് ബാധ്യതപ്പെട്ട സര്ക്കാര് ഉടന് തന്നെ ലോകാരോഗ്യ സംഘടനയുടെ വിദഗ്ദ സമിതിയെ പ്രസ്തുത പ്രദേശം സന്ദര്ശിക്കാന് ആവശ്യപ്പെടണം.
കേരളത്തിലും താഴെ പറയുന്നവര് ഉള്പ്പെടുന്ന വിദഗ്ദ സമിതിയെ നിയമിക്കാനും പ്രതിപക്ഷ നേതാവ് അഭ്യര്ത്ഥിച്ചു.
1. Environment Scientist
2. Chemical Expert from Indian Institute of Chemical Technology(CSIR), Hyderabad
3. Food Scientist from CFTRI, Mysore
4. Haematologist from Govt. Medical College
5. Endocrinologist from Govt. Medical College
6. Pulmonologist from Govt. Medical College
7. Water Analyst from Govt. Analytical Lab
8. Pollution Control Board notified Enviornmental Scientist
9. National Institute of Technology
10. Expert from National Institute For Interdisciplinary Science
and Technology (NIIST), Pappanamcode, Thiruvananthapuram
തീപിടിച്ചതിനെ തുടർന്ന് പുറത്തുവന്നിട്ടുണ്ടാകാവുന്ന ഡയോക്സിനുകളെയും സമാനമായ മറ്റു രാസപദാർഥങ്ങളെയും കുറിച്ച് പഠനം നടത്തണമെന്ന് ആരോഗ്യവിദഗ്ധനും കോഴിക്കോട് മെഡിക്കൽ കോളജിലെ മുൻ പ്രഫസറുമായ ഡോ.കെ.പി.അരവിന്ദൻ ആവശ്യപ്പെട്ടു. ബ്രഹ്മപുരത്തിനു ചുറ്റുമുള്ള പ്രദേശങ്ങളിലെ മണ്ണിലും വെള്ളത്തിലും അവിടെയുള്ള ആളുകളുടെ രക്തം, മുലപ്പാൽ എന്നിവയിലും ഡയോക്സിൻ സാന്നിധ്യമുണ്ടോ എന്നു കണ്ടെത്തണമെന്ന് അദ്ദേഹം പറഞ്ഞു. ദൂരവ്യാപകമായ പ്രത്യാഘാതങ്ങൾ ഉണ്ടാക്കിയേക്കാവുന്ന അളവിൽ ഈ മാലിന്യം ഉണ്ടോ ഇല്ലയോ എന്ന് ഇതു വഴി അറിയാനാകും. കേരളത്തിൽ തിരുവനന്തപുരത്തെ സിഎസ്ഐആർ–നാഷനൽ ഇൻസ്റ്റിറ്റ്യൂട്ട് ഓഫ് ഇന്റർഡിസിപ്ലിനറി സയൻസ് ആൻഡ് ടെക്നോളജി ഈ ടെസ്റ്റ് ചെയ്യുന്ന അംഗീകൃത സ്ഥാപനമാണ്.
ബ്രഹ്മപുരത്തെ തീപിടിത്തത്തിൽനിന്നു പുറത്തുവരുന്ന രാസപദാർഥങ്ങൾ സമീപ പ്രദേശങ്ങളിൽ ഉണ്ടാക്കിയേക്കാവുന്ന ആരോഗ്യപ്രശ്നങ്ങൾ ഇപ്പോഴേ കൃത്യമായി പഠിച്ച് രേഖപ്പെടുത്തിയില്ലെങ്കിൽ, ഭാവിയിൽ കൊച്ചിയിൽ റിപ്പോർട്ട് ചെയ്യപ്പെടുന്ന കാൻസറുകളും ശ്വാസകോശരോഗങ്ങളും ബ്രഹ്മപുരം മാലിന്യത്തിന്റെ അക്കൗണ്ടിൽ കയറിക്കൂടാൻ ഇടയുണ്ടെന്ന് ഡോ.അരവിന്ദൻ പറഞ്ഞു. അന്തരീക്ഷത്തിലും മനുഷ്യ-ജന്തു ശരീരങ്ങളിലും ദീർഘനാൾ നിലനിൽക്കാൻ കഴിവുള്ള ഡയോക്സിൻ ഒരു പെർസിസ്റ്റന്റ് ഓർഗാനിക് പൊല്യൂറ്റന്റ് (പിഒപി) ആണ്. ബ്രഹ്മപുരം മാലിന്യം കത്തുന്നതിലൂടെ ചുറ്റുവട്ടത്തിൽ രോഗം കൂടിയിട്ടുണ്ടെങ്കിലും ഇല്ലെങ്കിലും അന്തരീക്ഷത്തിലെ ഡയോക്സിന്റെ അളവ് കുറച്ചുകൊണ്ടുവരാനുള്ള ദീർഘകാല പദ്ധതികൾ ഏറെ പ്രാധാന്യമർഹിക്കുന്നു. ഇതിനോടൊപ്പം, രോഗഭീതി പെരുപ്പിച്ചു കാട്ടി ജനങ്ങളുടെ മാനസികാരോഗ്യം തകർക്കുന്ന രീതിയിലുള്ള തെറ്റായ പ്രചരണങ്ങൾ തടയാൻ സർക്കാർ അടിയന്തരമായി മുൻകൈ എടുക്കണമെന്നും അദ്ദേഹം ആവശ്യപ്പെട്ടു.
