അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
ലണ്ടന്‍: വിമാനത്തിന്റെ വീല്‍ബേയില്‍ മനുഷ്യന്റെ മൃതദേഹം കണ്ടെത്തി. ആഫ്രിക്കന്‍ രാജ്യമായ ഗാംബിയയില്‍നിന്ന് ബ്രിട്ടനിലേക്ക് പറന്നെത്തിയ വിമാനത്തിന്റെ വീല്‍ബേയിലാണ് പുരുഷന്റെ മൃതദേഹം കണ്ടെത്തിയത്.
TUI എയർവേയ്‌സ് നടത്തുന്ന ജെറ്റിലാണ് ഒരു പുരുഷന്റെ അജ്ഞാത മൃതദേഹം ലഭിച്ചത്. ഡിസംബർ 5 ന് ഗാംബിയയുടെ തലസ്ഥാനമായ ബഞ്ചുളിൽ നിന്ന് ലണ്ടനിലെ ഗാറ്റ്‌വിക്ക് പുറപ്പെട്ട വിമാനത്തിലായിരുന്നു സംഭവം.
എന്നാൽ ഈ ആഴ്ചയാണ് ഇംഗ്ലണ്ടിലെ സസെക്സ് മെട്രോപൊളിറ്റൻ പൊലീസിൽ നിന്ന് ഗാംബിയ സർക്കാരിന് സംഭവത്തെക്കുറിച്ച് വിവരം ലഭിക്കുന്നത്. ബ്രിട്ടീഷ് ചാർട്ടർ എയർലൈനായ TUI എയർവേയ്‌സിന്റെ ജെറ്റിലാണ് അജ്ഞാതനായ കറുത്ത പുരുഷന്റെ മൃതദേഹം കണ്ടെത്തിയതെന്ന് ഗാംബിയ സർക്കാർ വക്താവ് എബ്രിമ ജി ശങ്കരേ പ്രസ്താവനയിൽ അറിയിച്ചു.
വിമാനത്തിന്റെ വീല്‍ബേയ്ക്കുള്ളില്‍നിന്നാണ് മൃതദേഹം കണ്ടെത്തിയതെന്നും മരിച്ചയാളെ തിരിച്ചറിയാനായിട്ടില്ലെന്നും ഗാംബിയന്‍ സര്‍ക്കാര്‍ പ്രസ്താവനയില്‍ അറിയിച്ചു.
മരിച്ച പുരുഷനെ സംബന്ധിക്കുന്ന യാതൊരു വിവരവും ഇതുവരെ ലഭ്യമായിട്ടില്ല. പേര്, വയസ്സ്, ദേശീയത എന്നിവ സ്ഥാപിക്കുന്നതിനുള്ള തിരിച്ചറിയൽ രേഖകൾ കണ്ടെത്താൻ കഴിഞ്ഞിട്ടില്ലെന്നും പ്രസ്താവനയിൽ പറയുന്നു.
മൃതദേഹം പുറത്തെടുത്ത് ആശുപത്രിയിലേക്ക് മാറ്റി. ഡി.എന്‍.എ. പരിശോധനയ്ക്കുള്ള നടപടികള്‍ ബ്രിട്ടീഷ് പോലീസും ഗാംബിയന്‍ അധികൃതരും സംയുക്തമായി പൂര്‍ത്തിയാക്കിക്കൊണ്ടിരിക്കുകയാണ്.
