അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
വിഴിഞ്ഞം: വിഴിഞ്ഞം തുറമുഖ സമരത്തിന്റെ ഭാഗമായി ഇന്ന് തിരുവനന്തപുരം ലത്തീന് അതിരൂപത വഞ്ചനാ ദിനം ആചരിക്കുന്നു. ഓഖി ദുരന്ത വാര്ഷികത്തോടനുബന്ധിച്ചാണ് ദിനാചരണം. ഇതിന്റെ ഭാഗമായി അതിരൂപതയ്ക്ക് കീഴിലെ വീടുകളില് ഓഖി ദുരന്തത്തില് മരിച്ചവരുടെ ഓര്മയ്ക്കായി മെഴുകുതിരികള് കത്തിക്കും. വിവിധ സംഘടനകളുടെ നേതൃത്വത്തില് പ്രത്യേക യോഗങ്ങളും മുല്ലൂരിലെ ഉപരോധ സമരപ്പന്തലില് പൊതു സമ്മേളനവും സംഘടിപ്പിക്കും.
അതേസമയം, വിഴിഞ്ഞം സംഘര്ഷങ്ങളുടെ പശ്ചാത്തലത്തില് കനത്ത ജാഗ്രത തുടരുകയാണ്. പ്രദേശത്ത് കൂടുതല് പൊലീസുകാരെ വിന്യസിപ്പിച്ചിട്ടുണ്ട്. ഇന്നലെ ചേര്ന്ന സര്വകക്ഷി യോഗത്തില് പൊലീസിനെ വിമര്ശിച്ച് ലത്തീന് സഭ രംഗത്തെത്തിയിരുന്നു. വിഴിഞ്ഞം തുറമുഖത്ത് നടന്ന സംഭവങ്ങള് പൊലീസ് ക്ഷണിച്ചുവരുത്തിയതാണെന്നാണ് ലത്തീന് സഭയുടെ വിമര്ശനം. കാര്യങ്ങള് അന്വേഷിക്കാന് സ്റ്റേഷനില് പോയ ആളുകളെ പൊലീസ് അന്യായമായി കസ്റ്റഡിയിലെടുത്തു. അതിന്റെ സ്വാഭാവിക പ്രതികരണമാണ് ഇന്നലെ കണ്ടതെന്നും യോഗത്തില് ലത്തീന് സഭ പറഞ്ഞു.
