അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
മിതമായ ഫീച്ചറുകളുള്ള ബജറ്റ് സ്‌മാർട്ട്ഫോണുകൾക്കായി ആൻഡ്രോയിഡ് 13 ഗോ പതിപ്പ് ഗൂഗിൾ അവതരിപ്പിച്ചു.ആൻഡ്രോയിഡിന്റെ ഈ സംക്ഷിപ്‌ത പതിപ്പ് സ്‌മാർട്ട്‌ഫോണിൽ നിന്ന് അനാവശ്യ ആപ്പുകൾ നീക്കം ചെയ്യുകയും അവശ്യമായവ മാത്രം ഉൾപ്പെടുത്തുകയും ചെയ്യുന്നു. സ്‌മാർട്ട്‌ഫോൺ നിർമ്മാതാക്കൾക്ക് അനുയോജ്യമായ സോഫ്‌റ്റ്‌വെയർ അനുഭവത്തോടെ ഉപകരണങ്ങൾ സൃഷ്‌ടിക്കാൻ അഞ്ച് വർഷം മുമ്പാണ് ഗൂഗിൾ ഗോ അവതരിപ്പിച്ചത്.
സുഗമമായ ഉപയോക്തൃ അനുഭവത്തിന് അനുയോജ്യമായ നിലയിൽ ഇവയെ ചെറുതാക്കാൻ ‘ആൻഡ്രോയിഡ് 13 ഗോ’ കൊണ്ട് സാധിക്കും. സാധാരണയായി 3 ജിബി വരെ റാം ഉള്ള സ്‌മാർട്ട്‌ഫോണുകളിലാണ് ഇത് ഉപയോഗിക്കുന്നത്. ആൻഡ്രോയിഡ് ഗോ ഉപയോഗപ്പെടുത്തുന്ന 250 മില്യൺ ഉപകരണങ്ങൾ ഉണ്ടെന്നാണ് ഗൂഗിൾ പുറത്തുവിട്ട കണക്കുകൾ.
ഓൺലൈനിൽ സുരക്ഷിതരായിരിക്കാൻ ഉപയോക്താക്കളെ സഹായിക്കുന്നതിനായി നിർണായക സോഫ്‌റ്റ്‌വെയർ അപ്‌ഡേറ്റുകൾ ലഭിക്കുമെന്ന് ഉറപ്പാക്കാൻ ആൻഡ്രോയിഡ് ഗോ സ്‌മാർട്ട്‌ഫോണുകളിലേക്ക് ഗൂഗിൾ പ്ളേ സിസ്‌റ്റം അപ്‌ഡേറ്റുകൾ ചേർക്കും. ഇത് ഉപകരണത്തിലെ സ്‌റ്റോറേജ് ലഭ്യതയിൽ വിട്ടുവീഴ്‌ച ചെയ്യാതെ നിർണായക അപ്‌ഡേറ്റുകളുൾ വേഗത്തിലും ലളിതവുമാക്കും.
ആൻഡ്രോയിഡ് 13 ഗോ മുഖേന ഗൂഗിൾ ആദ്യമായി ‘Material You’ എന്ന ഫീച്ചറും അനുയോജ്യമായ സ്‌മാർട്ട്‌ഫോണുകളിലേക്ക് വികസിപ്പിക്കും. ആൻഡ്രോയിഡ് 13 ഗോയ്‌ക്കൊപ്പം പുറത്തിറങ്ങുന്ന മറ്റൊരു പ്രധാന സവിശേഷത ‘ഗൂഗിൾ ഡിസ്‌കവർ’ ആണ്. വാർത്താ ലേഖനങ്ങൾ വായിക്കുന്ന ഉപയോക്താക്കൾക്ക് ഈ സവിശേഷത വളരെ ഉപകാരപ്രദമാകും. നിങ്ങളുടെ ബ്രൗസിംഗ് ഹിസ്‌റ്ററിയെ അടിസ്ഥാനമാക്കിയുള്ള വാർത്തകളുടെയും മറ്റ് ഉള്ളടക്കങ്ങളുടെയും ഒരു ലിസ്‌റ്റ് ഇത് ക്യൂറേറ്റ് ചെയ്യും.
