അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
സംസ്ഥാനത്ത് പഴക്കം ചെന്ന മന്ത്രിമാരുടെ വാഹനങ്ങള് മാറ്റി പുതിയവ വാങ്ങാന് അനുമതി നല്കി സര്ക്കാര്. 10 മന്ത്രിമാര്ക്ക് ഇന്നോവ ക്രിസ്റ്റ കാറുകള് അനുവദിച്ച് കൊണ്ടുള്ള സര്ക്കാര് ഉത്തരവും ഇറങ്ങി . 32.22 ലക്ഷം രൂപയാണ് ക്രിസ്റ്റയുടെ വില. വാഹനങ്ങള് വാങ്ങുന്നതിനായി വിനോദ സഞ്ചാര വകുപ്പ് 3,22,20,000 രൂപ അനുവദിച്ചു.
മന്ത്രിമാര്ക്ക് വാഹനങ്ങള് അനുവദിക്കുന്നത് ടൂറിസം വകുപ്പാണ്.മന്ത്രിമാര് അവര് ഉപയോഗിച്ചു വരുന്ന പഴയ വാഹനം ടൂറിസം വകുപ്പിന് തിരികെ നല്കണം. . സ്റ്റേറ്റ് ഹോസ്പിറ്റാലിറ്റിയുടെ ഭാഗമായി വിനോദ സഞ്ചാര വകുപ്പിന്റെ നിലവിലുള്ള വാഹനങ്ങള് അപര്യാപ്തമാണെന്നു ചൂണ്ടിക്കാട്ടിയാണ് മന്ത്രിമാര്ക്ക് പുതിയ ഇന്നോവ ക്രിസ്റ്റ വാങ്ങാന് തുക അനുവദിച്ചത്.
എന്നാൽ സാമ്പത്തിക പ്രതിസന്ധി മൂലം ധനകാര്യ വകുപ്പ് വാഹനങ്ങള് വാങ്ങുന്നതിനെ എതിര്ത്തിരുന്നു.
നിലവിലുള്ള വാഹനങ്ങളുടെ ഉപയോഗം രേഖപ്പെടുത്തി ഫയല് സമര്പ്പിക്കാന് ധനവകുപ്പ് ടൂറിസം വകുപ്പിനോടാവശ്യപ്പെട്ടിരുന്നു. തുടര്ന്ന് മന്ത്രിമാര് സമര്പ്പിച്ച ആവശ്യം കൂടി പരിഗണിച്ച് 5 വാഹനങ്ങള് വാങ്ങാനേ ധനവകുപ്പ് അനുമതി നല്കിയുള്ളൂ. ടൂറിസം മന്ത്രി പി.എ.മുഹമ്മദ് റിയാസ് മുഖ്യമന്ത്രി പിണറായി വിജയന്റെ അനുവാദത്തോടെ 10 വാഹനങ്ങള് വാങ്ങുന്നതിനുള്ള ഫയല് മന്ത്രിസഭാ യോഗത്തില് വച്ച് തീരുമാനമെടുപ്പിക്കുകയായിരുന്നു.
