‘ചെറുപ്പത്തിലെ അമ്മ എന്നെ തിരുത്തിയിരുന്നെങ്കിൽ’; ഈ വീഡിയോ പ്രധാനമന്ത്രി കുറ്റസമ്മതം നടത്തുന്നതാണോ?

പ്രധാനമന്ത്രി നരേന്ദ്ര മോദിയുടെ പഴയൊരു വീഡിയോ സമൂഹമാധ്യമങ്ങളിൽ പലരും പങ്കുവെക്കുന്നുണ്ട്. ചെറുപ്പത്തിൽ മോഷണങ്ങൾ ചെയ്ത് തുടങ്ങിയപ്പോൾതന്നെ തന്റെ അമ്മ അവ തിരുത്തിയിരുന്നുവെങ്കിൽ വലുതായപ്പോൾ വലിയ തെറ്റുകൾ ചെയ്യുകയില്ലായിരുന്നുവെന്ന് പ്രധാനമന്ത്രി ജനങ്ങൾക്ക് മുൻപിൽ ആത്മവിമർശനം നടത്തുന്ന രീതിയിലാണ് വീഡിയോയിലെ ഉള്ളടക്കവും തലക്കെട്ടും.  “ഞാൻ ചെറിയ മോഷണങ്ങൾ നടത്തിയിരുന്നപ്പോൾ എന്റെ അമ്മ എന്നെ അതിൽ നിന്ന് വിലക്കിയിരുന്നെങ്കിൽ ഞാൻ ഇത്രയും വലിയ മോഷ്ടാവ് ആകില്ലായിരുന്നു എന്ന് മോദിജി…. ഓൾഡ് വീഡിയോ ആണ് മിത്രോ ഓൾഡ് ഈസ്‌ ഗോൾഡ് എന്നല്ലേ…” എന്ന കുറിപ്പിനൊപ്പമാണ് 9 സെക്കൻഡ് ദൈർഘ്യമുള്ള വീഡിയോ പ്രചരിക്കുന്നത്. എന്നാൽ പ്രചരിക്കുന്ന ഈ വാദം തികച്ചും തെറ്റിദ്ധരിപ്പിക്കുന്നതാണ്. വീഡിയോയിൽ കാണുന്നത് കള്ളനായ മകന്റെയും അമ്മയുടെയും കഥ പ്രസംഗത്തിനിടയിൽ ഉദ്ധരിക്കുന്ന പ്രധാനമന്ത്രിയെ ആണ്.  

പ്രചരിക്കുന്ന വീഡിയോയുടെ പുറകിലായി കാണാവുന്ന ബിജെപി ചിഹ്നത്തിലെ ലിപി ബംഗാളി ആയിരുന്നു. ഇത് പ്രധാനമന്ത്രിയുടെ വേദി പശ്ചിമ ബംഗാൾ ആകാമെന്ന സൂചന നൽകി. ഇത് പിൻപറ്റിയുള്ള തിരച്ചിലിൽ നരേന്ദ്ര മോദിയുടെ യൂട്യൂബ് ചാനലിൽ  2021 ഏപ്രിൽ 10ന് ബംഗാളിലെ സിലിഗുരിയിൽ നടന്ന ഒരു പൊതുപരിപാടിയുടെ വീഡിയോ ലഭ്യമായി. ഈ വീഡിയോയിൽ കാണാവുന്ന വേഷവും തൊപ്പിയും ധരിച്ചുതന്നെയാണ് വൈറൽ ക്ലിപ്പിലും പ്രധാനമന്ത്രിയെ കാണാവുന്നത്. ബംഗാളിലെ നാലാംഘട്ട തെരഞ്ഞെടുപ്പിന് മുമ്പായി സിലിഗുരിയിൽ നടന്ന വമ്പിച്ച പൊതുപരിപാടി എന്നാണ് വീഡിയോയുടെ വിവരണത്തിൽ നിന്ന് വേദിയെപ്പറ്റി അറിയാനായത്. 57 മിനിറ്റ് ദൈർഘ്യമുള്ള വീഡിയോയിലെ 39ആം മിനിറ്റിൽ ഇപ്പോൾ പ്രചരിക്കുന്ന ഭാഗം കടന്നുവരുന്നത് കണ്ടെത്താൻ സാധിച്ചു. പൂർണ്ണമായ വീഡിയോ കണ്ടതിൽനിന്ന് മനസ്സിലാക്കാനായത് വൈറലായി കൊണ്ടിരിക്കുന്ന പോസ്റ്റിൽ ആരോപിക്കുന്നതുപോലെ ഇത് മോദി സ്വന്തം ജീവിതത്തെപ്രതി പറയുന്ന വാക്കുകളല്ല എന്നാണ്. 

കള്ളന്റെയും അമ്മയുടെയും പ്രശസ്തമായ കഥ ഉദ്ധരിച്ചുകൊണ്ട് പശ്ചിമ ബംഗാൾ മുഖ്യമന്ത്രി മമതാ ബാനർജിയെ കടന്നാക്രമിക്കുകയാണ് അദ്ദേഹമിവിടെ. ചെറുപ്പത്തിൽ ചെറിയ കളവുകൾ ചെയ്തു തുടങ്ങിയപ്പോൾ തിരുത്താതിരുന്നതിന്  അമ്മയുടെ ചെവി കഴുമരത്തിലേക്കുള്ള യാത്രയ്ക്കിടയിൽ കടിച്ചുമുറിച്ച് ക്രോധം തീർത്ത കള്ളന്റെ കഥയാണ് മോദി ഇവിടെ ജനങ്ങളുമായി പങ്കുവയ്ക്കുന്നത്. ചെറുപ്പത്തിലെ തിരുത്തിയെങ്കിൽ തനിക്ക് ഈ ഗതി വരില്ലായിരുന്നു എന്ന് കള്ളൻ അമ്മയോട് പറയുന്ന രംഗമാണ് വീഡിയോയിൽ മോദി ആവർത്തിക്കുന്നത്.  
2021 മാർച്ചിൽ ഒരു വേദിയിൽവെച്ച് സാധാരണക്കാർ 500 രൂപയും എടുത്താൽതന്നെ പ്രശ്നമുണ്ടാക്കുന്ന ബിജെപി കോടികളാണ് അപഹരിക്കുക്കുന്നത് എന്ന മമതാ ബാനർജിയുടെ വിമർശനത്തിന് മറുപടിയായാണ് കള്ളന്റെയും അമ്മയുടെയും കഥയിലൂടെ മോദി മറുപടി പറഞ്ഞത്.  ഇതിൽനിന്ന് പ്രശസ്തമായ ഒരു കഥ ഉദ്ധരിച്ചുകൊണ്ട് നരേന്ദ്ര മോദി പശ്ചിമ ബംഗാൾ മുഖ്യമന്ത്രി മമതാ ബാനർജിക്ക് നൽകിയ മറുപടിയാണ് സ്വന്തം ജീവിതത്തെ കുറിച്ചുള്ള കുറ്റസമ്മതം എന്ന രീതിയിൽ ഇപ്പോൾ പ്രചരിപ്പിക്കുന്നതെന്ന് ഉറപ്പിക്കാനായി.