അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.എകെജി സെന്ററിന് നേരെയുണ്ടായ ആക്രമണത്തെപ്പറ്റിയുള്ള ചർച്ചകൾ സമൂഹമാധ്യമങ്ങളിൽ ഇപ്പോഴും ചർച്ചയാകുന്നുണ്ട്. ഇക്കൂട്ടത്തിൽ എകെജി സെന്ററിന് നേരെയുണ്ടായ ആക്രമണം സിപിഎം ആസൂത്രണം ചെയ്തതാണ് എന്ന് പിണറായി വിജയൻ നിയമസഭയിൽ പറഞ്ഞു എന്ന വാദവുമായി ഒരു ന്യൂസ് കാർഡ് പ്രചരിക്കുന്നുണ്ട്.
ഏഷ്യാനെറ്റ് ന്യൂസിന്റെ ലോഗോ ഭാഗികമായി കാണാമായിരുന്ന ഈ കാർഡ് ജൂലൈ നാലിനാണ് ഒരു പ്രൊഫൈൽ പോസ്റ്റ് ചെയ്തിരിക്കുന്നത്. “അവസാനം സമ്മയ്ച്ച്!”എന്ന തലക്കെട്ടോടെയാണ് ചിത്രം പോസ്റ്റ് ചെയ്തിരിക്കുന്നത്. എന്നാൽ ഈ വാദം തികച്ചും തെറ്റിദ്ധരിപ്പിക്കുന്നതാണ്. ഇത് എഡിറ്റിങ് വഴി കൃതൃമമായി സൃഷ്ടിച്ചതാണ്. പ്രചരിക്കുന്ന ചിത്രത്തിൽ “CPM” എന്ന് ഇംഗ്ലീഷിൽ എഴുതിയിരിക്കുന്ന ഫോണ്ട് മാത്രം ബാക്കിയുള്ളവയിൽ നിന്ന് വിഭിന്നമാണ് എന്ന് ഒറ്റ നോട്ടത്തിൽ മനസ്സിലാക്കാവുന്നതാണ്. ‘4. 7. 2022’ എന്ന തിയതിയും പോസ്റ്റിന്റെ വലതുഭാഗത്തായി കാണാം. ഇത്തരം ന്യൂസ് കാർഡുകൾ ഏഷ്യാനെറ്റ് ന്യൂസ് തങ്ങളുടെ ഔദ്യോഗിക ഫേസ്ബുക്ക് പേജ് വഴി പ്രസിദ്ധീകരിക്കാറുള്ളതിനാൽ പേജ് സന്ദർശിച്ചു. സെർച്ച് ബാറിന്റെ സഹായത്തോടെ നടത്തിയ തെരച്ചിലിൽ ജൂലൈ നാലിന് തന്നെ പേജിൽ സമാനമായ ഒരു കാർഡ് വന്നിട്ടുള്ളത് കണ്ടെത്തി.
“എകെജി സെൻറർ ആക്രമണം ആസൂത്രിതമാണെന്ന് മുഖ്യമന്ത്രി… പോലീസിന് വീഴ്ച പരിശോധിക്കും”, എന്നാണ് കാർഡിന്റെ ഉള്ളടക്കം. ഇതിൽ “CPM” എന്ന് കൃതൃമമായി ചേർത്താണ് ഇപ്പോൾ പ്രചരിക്കുന്ന കാർഡ് സൃഷ്ടിച്ചതെന്ന് മനസിലായി. പ്രചരിക്കുന്ന കാർഡ് വ്യാജമാണെന്ന് ഏഷ്യാനെറ്റ് അറിയിക്കുകയും ചെയ്തു. എകെജി സെൻറർ ആക്രമണം സിപിഎം ആസൂത്രിതമെന്ന് മുഖ്യമന്ത്രി സഭയിലോ മറ്റെവിടെയെങ്കിലോ പറഞ്ഞതിൻറെ യാതൊരു തെളിവുകളും ലഭ്യമല്ല. സംഭവം നടന്ന് പതിനൊന്നാം ദിനവും പ്രതിയെ പിടികൂടാനാകാതെ പോലീസ് അന്വേഷണം തുടരുകയാണ്. സിസിടിവി കൾ ഉപയോഗിച്ചും ശാസ്ത്രീയ പരിശോധനകളിലൂടെയും പ്രതി ഉപയോഗിച്ച് വാഹനത്തിൻറെ നമ്പർ കണ്ടെത്താനുള്ള ശ്രമം തുടരുകയാണ്. അതുകൊണ്ട് സിപിഎം നേതൃത്വം തന്നെയാണ് തങ്ങളുടെ സംസ്ഥാന കമ്മിറ്റി ഓഫീസിന് നേരെയുണ്ടായ ആക്രമണം ആസൂത്രണം ചെയ്തത് എന്ന് മുഖ്യമന്ത്രി സമ്മതിച്ചു എന്ന നിലയിൽ പ്രചരിക്കുന്ന വാർത്തകൾ വ്യാജമാണെന്ന് ഇതോടെ വ്യക്തമായി.
