അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കേരളത്തിൽ ഞായറാഴ്ചകൾ പ്രവൃത്തിദിനം ആക്കി എന്ന് അവകാശപ്പെടുന്ന ചില പോസ്റ്റുകൾ ഇപ്പോൾ സമൂഹമാധ്യമങ്ങളിൽ പ്രചരിക്കുന്നുണ്ട്. കൈരളി ന്യൂസിന് മന്ത്രി മുഹമ്മദ് റിയാസ് നൽകിയ ഒരു അഭിമുഖത്തിന്റെ സ്ക്രീൻഷോട്ടിനൊപ്പം ആണ് പോസ്റ്റ് പ്രചരിക്കുന്നത്. കൈരളിയുടെ സ്ക്രീൻഷോട്ടിൽ മുഹമ്മദ് റിയാസ് പറയുന്നതായി എഴുതിയിരിക്കുന്നത് ഇങ്ങനെ, “ഞായറാഴ്ച പ്രവൃത്തിദിനം ആക്കാനുള്ള തീരുമാനം പൊതുസമൂഹം ഇരുകൈയും നീട്ടി സ്വാഗതം ചെയ്തെന്ന് മന്ത്രി” എന്നാൽ പ്രചരിക്കുന്ന ഈ പോസ്റ്റ് തികച്ചും തെറ്റിദ്ധരിപ്പിക്കുന്നതാണ്. കോവിഡ് പ്രതിസന്ധി മൂലം നടപടികൾ വൈകിയ ഫയലുകൾ സമയബന്ധിതമായി തീർപ്പാക്കുന്നതിന് ജൂലൈ മുതൽ സെപ്റ്റംബർ വരെ എല്ലാ മാസവും ഒരു അവധി ദിവസം സർക്കാർ ഓഫീസുകൾക്ക് പ്രവൃത്തിദിനം ആക്കാനാണ് തീരുമാനിച്ചത്. ഇതിനായി സര്‍ക്കാര്‍ എല്ലാ ജില്ലകളിലും തീവ്രയജ്ഞ പരിപാടി ആവിഷ്‌ക്കരിച്ചിട്ടുണ്ട്. ഇതിന്റെ ഭാഗമായി സംസ്ഥാനത്തെ സര്‍ക്കാര്‍ ഓഫീസുകള്‍ ജൂലൈ 3, ഞായറാഴ്ച പ്രവര്‍ത്തിച്ചിരുന്നു.
കൈരളി പോസ്റ്റിൽ നൽകിയിരിക്കുന്ന സ്ക്രീൻഷോട്ട് യഥാര്‍ഥമാണെങ്കിലും സർക്കാരിന്റെ തീവ്രയജ്ഞ പരിപാടിയെക്കുറിച്ചാണ് മുഹമ്മദ് റിയാസ്ഇന്റർവ്യൂവിൽ പറയുന്നത്. ജൂൺ 15 മുതൽ സെപ്റ്റംബർ 30 വരെയാണ്‌ ഫയൽ തീർപ്പാക്കലിനുള്ള തീവ്രയജ്ഞം. ഇതിനായി മാസത്തിൽ ഒരു അവധി ദിവസം വിനിയോഗിക്കണമെന്ന് എല്ലാ ജീവനക്കാരോടും മുഖ്യമന്ത്രി നിർദ്ദേശിച്ചിരുന്നു. കേരളത്തിൽ ഞായറാഴ്ചകൾ പ്രവൃത്തിദിനമാക്കി എന്ന തരത്തിൽ പ്രചരിക്കുന്ന പോസ്റ്റുകൾ തെറ്റിദ്ധരിപ്പിക്കുന്നതാണ് ഇതോടെ വ്യക്തമാണ്.
