ഈ ചിത്രത്തിൽ മുഖ്യമന്ത്രിയോടൊപ്പം നിൽക്കുന്നത് ഷാജ് കിരണാണോ?

ഷാജ് കിരൺ മുഖ്യമന്ത്രി പിണറായി വിജയന്റെ ബിനാമിയാണെന്ന് സ്വപ്‌ന സുരേഷ് പറഞ്ഞതായുള്ള റിപ്പോർട്ടുകളുണ്ടായിരുന്നു. എന്നാൽ തനിക്ക് മുഖ്യമന്ത്രിയുമായി യാതൊരു ബന്ധവുമില്ലെന്നും 2013ൽ ഒരു വാർത്താസമ്മേളനത്തിലാണ് മുഖ്യമന്ത്രിയെ അവസാനമായി കാണുന്നത് എന്നുമാണ് ഷാജ് കിരൺ പ്രതികരിച്ചത്. ഇതിനിടയിൽ മുഖ്യമന്ത്രിക്ക് ഷാജ് കിരണുമായുള്ള  ബന്ധം സ്ഥാപിക്കാനായി ഒരു ഫോട്ടോ പലരും സമൂഹമാധ്യമങ്ങളിൽ പ്രചരിപ്പിക്കുന്നുണ്ട്. പിണറായി വിജയനും കുടുംബത്തോടൊപ്പം ചിത്രത്തിലുള്ള ആൾ ഷാജ് കിരൺ ആണെന്ന നിലയിലാണ് പ്രചരണം. ‘ഷാജ് കിരണോ…അതാരാ എനക്കറിയില്ല…’ എന്ന തലക്കെട്ടോടെയാണ് ചിത്രം പ്രചരിക്കുന്നത്. എന്നാൽ പ്രചരിക്കുന്ന  വാദം തികച്ചും തെറ്റിദ്ധരിപ്പിക്കുന്നതാണ്. ചിത്രത്തിൽ ഉള്ളത് ഷാജ് കിരൺ അല്ല. ഷാജ് കിരണിന്റെ ചിത്രങ്ങളുമായി ഒത്തു നോക്കിയപ്പോൾ മുഖ്യമന്ത്രിയുടെ പിന്നിലായി ചിത്രത്തിൽ കാണുന്ന ആൾക്ക് സാമ്യം ഉണ്ടായിരുന്നില്ല. എങ്കിലും കൂടുതൽ വ്യക്തതക്കായി ഇത് വീണ്ടും പരിശോധിച്ചു. ഈ തിരച്ചിലിൽ രണ്ട് ഫേസ്ബുക്ക് പോസ്റ്റുകൾ ആണ് പ്രധാനമായും ലഭ്യമായത്. ആദ്യത്തേത് പിണറായി വിജയന്റെ തന്നെ ഫേസ്ബുക്ക് അക്കൗണ്ടിൽ നിന്നും വന്ന പോസ്റ്റ് ആയിരുന്നപ്പോൾ രണ്ടാമത്തേത് അദ്ദേഹത്തിൻറെ പ്രസ് സെക്രട്ടറി പി എം മനോജിന്റെതായിരുന്നു. ജൂൺ 11 2016ലാണ്  മുഖ്യമന്ത്രി പിണറായി വിജയൻ ഈ ഫോട്ടോ ഫേസ്ബുക്കിൽ അപ്‌ലോഡ് ചെയ്തത്. “ഔദ്യോഗിക വസതിയായ ക്ലിഫ് ഹൗസിലേക്ക് താമസം മാറി.” എന്ന തലക്കെട്ടോടെയാണ് ഈ ചിത്രം ഫേസ്ബുക്കിൽ മുഖ്യമന്ത്രി പങ്കുവെച്ചത്. 

തൊട്ടടുത്ത ദിവസമായ ജൂൺ 12ന് ‘ഡെക്കാൻ ക്രോണിക്കിൾ’ ഈ ചിത്രം ഒരു റിപ്പോർട്ടിൽ ഉപയോഗിച്ചതും കണ്ടെത്താനായി. സമൂഹമാധ്യമങ്ങളിൽ മുഖ്യമന്ത്രി പങ്കുവച്ച ചിത്രം എന്ന നിലയിലാണ് റിപ്പോർട്ടിനൊപ്പം ഫോട്ടോ നൽകിയിരുന്നത്. തുടർന്ന് പി എം മനോജിന്റെ പോസ്റ്റും പരിശോധിച്ചു. ജൂൺ 15നാണ് പി എം മനോജ് ഈ ചിത്രമടങ്ങിയ വീഡിയോ ഫേസ്ബുക്കിൽ പോസ്റ്റ് ചെയ്തിരുന്നത്. ചിത്രത്തിലുള്ളത് ഷാജ് കിരൺ ആണ് എന്ന വാദം വൈറലായിരുന്നു തുടർന്ന് പി എം മനോജ് നടത്തിയ പ്രതികരണമായിരുന്നു ഒരു വീഡിയോ ശകലം പങ്കുവെച്ചുകൊണ്ട് എഴുതിയ കുറിപ്പ്. പ്രചരിക്കുന്ന ചിത്രം താൻ തന്റെ ഫോണിൽ പകർത്തിയതാണെന്നും, ചിത്രത്തിലുള്ളയാൾ ജിഗീഷ് നാരായണൻ ആണെന്നും പി എം മനോജ് പറയുന്നുണ്ട്. ‘ഇവൻമാർ ശരിക്കും ചിരിപ്പിച്ചു കൊല്ലും! ഈ ക്രൈം കുമാരനെയൊക്കെ വിശ്വസിക്കുന്നവർ ഇപ്പോഴുമുണ്ടല്ലോ എന്നോർക്കുമ്പഴാണ് രസം. എന്നാലും Jigeesh Narayanan  നിന്നെ ഷാജ് കിരണെന്ന് വിളിച്ചു കളഞ്ഞല്ലോ.. (ഈ പടം ഞാൻ എൻ്റെ ഫോണിൽ എടുത്തതാണ്. 2016ൽ മുഖ്യമന്ത്രിയും കുടുംബവും ക്ലിഫ് ഹൗസിലെത്തിയപ്പോഴുള്ള ആദ്യ ചിത്രം. ഫോട്ടോഗ്രാഫർമാരുണ്ടായിരുന്നില്ല. ഒരു രേഖയിരിക്കട്ടെ എന്നു പറഞ്ഞ് അന്നവിടെ ഉണ്ടായ എല്ലാവരെയും നിർത്തി എടുത്തത്.),” എന്ന വിശദീകരണമടങ്ങിയതാണ് പോസ്റ്റ്. ഇതോടെ ഷാജ് കിരൺ മുഖ്യമന്ത്രിയോടൊപ്പം നിൽക്കുന്ന ഫോട്ടോ എന്ന പേരിൽ പലരും പ്രചരിപ്പിക്കുന്നത് തെറ്റാത്ത ചിത്രമാണെന്ന് ഇതോടെ വ്യക്തമായി.