അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.വളരെയേറെ കഷ്ടതകള്‍ സഹിച്ച് മക്കളെ പഠിപ്പിച്ച് വലിയ നിലയിൽ എത്തിക്കുന്ന മാതാപിതാക്കളുടെ വാർത്തകൾ സമൂഹമാധ്യമങ്ങളിൽ വൈറലാകാറുണ്ട്. ഇത്തരത്തിലൊരു അച്ഛന്റെയും മകളുടെയും കഥ സമൂഹമാധ്യമങ്ങളില്‍ ഇപ്പോള്‍ വൈറലാകാറുണ്ട്. ‘അച്ഛന്‍ വലിച്ച റിക്ഷ എന്നെ ഐഎഎസില്‍ എത്തിച്ചു. ഇനി അച്ഛനിരിക്ക് ഞാനൊന്നു വലിച്ചുനോക്കട്ടെ.. ഐഎഎസ് ഉയര്‍ന്ന റാങ്ക് വാങ്ങിയ ശേഷം തന്റെ അച്ഛനെ ലോകത്തിനു പരിചയപ്പെടുത്തുന്ന മകള്‍.. ഒരു ബിഗ് സല്യൂട്ട് ഈ അച്ഛനും മകള്‍ക്കും. ഇതൊന്നും ആരും ഷെയര്‍ ചെയ്യില്ല എന്നറിയാം ‘ എന്ന കുറിപ്പിനൊപ്പമാണ് പോസ്റ്റർ പ്രചരിക്കുന്നത്. എന്നാല്‍, പ്രചരിക്കുന്ന ഈ വാദം തികച്ചും തെറ്റിദ്ധരിപ്പിക്കുന്നതാണ്. ഈ കഥയില്‍ പറയുന്ന അച്ഛന്റെയും ഐഎഎസ് ടോപ്പറായ മകളുടെയും കഥ വ്യാജമാണ്. വൃദ്ധനും ക്ഷീണിതനുമായ ഒരാളെ റിക്ഷയില്‍ ഇരുത്തി ഒരു പെണ്‍കുട്ടി സന്തോഷത്തോടെ റിക്ഷ വലിക്കുന്ന ചിത്രമാണ് പോസ്റ്റിനൊപ്പമുള്ളത്. വൃദ്ധനും സന്തോഷത്തോടെയുള്ള മുഖഭാവമാണ്. ഇത് നോക്കി കുറച്ച് ആണ്‍കുട്ടികള്‍ അത്ഭുതത്തോടെ നില്‍ക്കുന്നുണ്ട്. മകളെ ഐഎഎസ് റാങ്ക് ജേതാവാക്കിയ റിക്ഷാക്കാരനായ അച്ഛനെ കുറിച്ച് ആദ്യം അന്വേഷിച്ചെങ്കിലും കാര്യമായ ഫലം കിട്ടിയില്ല. തുടര്‍ന്ന് ചിത്രം സെര്‍ച്ച് ചെയ്തപ്പോള്‍ ഒരു ഇന്‍സ്റ്റഗ്രാം പേജില്‍ സമാനമായ ചിത്രം കണ്ടെത്താനായി. mishti.and.meat എന്ന വേരിഫൈഡ് പ്രൊഫൈല്‍, ശ്രമോന പോദ്ദാര്‍ എന്ന യുവതിയുടേതാണ്. ഡിജിറ്റല്‍ ക്രിയേറ്റര്‍ ആണെന്ന് ശ്രമോന പ്രൊഫൈലില്‍ സൂചിപ്പിച്ചിട്ടുണ്ട്. മോഡലും ട്രാവലറും ഒക്കെയായ ഈ പെണ്‍കുട്ടി തന്നെയാണ് ചിത്രത്തിലുള്ളതെന്ന് വ്യക്തമായി.
കൊല്‍ക്കത്തയിലെ ശോഭാ ബസാറാണ് ചിത്രം പകര്‍ത്തിയ സ്ഥലമെന്ന് ശ്രമോന കുറിച്ചിട്ടുണ്ട്. ‘കൊല്‍ക്കത്തയില്‍ പോകുമ്പോഴെല്ലാം കൈകള്‍ കൊണ്ട് റിക്ഷവലിക്കുന്നവരെ കാണുമ്പോള്‍ അനുകമ്പ തോന്നിയിട്ടുണ്ട്. അതുകൊണ്ട് തന്നെ റിക്ഷയില്‍ കയറിയിരുന്നില്ല. പിന്നീട് അവര്‍ ജീവിതമാര്‍ഗമായി കൊണ്ടുനടക്കുന്ന ഇതില്‍ നമ്മളെപ്പോലുള്ളവര്‍ കയറിയാല്‍ മാത്രമെ അവര്‍ക്ക് അന്നം കിട്ടൂ എന്ന് മനസിലാക്കാനായതോടെ അതുമായി പൊരുത്തപ്പെട്ടു. ഇന്ന് കൊല്‍ക്കത്തയില്‍ എത്തിയപ്പോള്‍ ഒരു റിക്ഷാക്കാരനെ ഇരുത്തി വലിച്ചപ്പോള്‍ അദ്ദേഹം എത്രബുദ്ധിമുട്ടിയാണ് ഈ ജോലി ചെയ്യുന്നതെന്ന് മനസിലാക്കാനായി. ‘ശ്രമോന കുറിച്ചു. ചിത്രം ഐഎഎസ് ടോപ്പറെന്ന പേരില്‍ വൈറലായ വിവരം പലരും കമന്റ് ചെയ്തിട്ടുണ്ട്. ഈ ചിത്രം പകര്‍ത്തിയ 2018ല്‍ തന്നെ ഇതേ കഥ പ്രചരിച്ചിരുന്നു. ട്രാവലറും ബ്ലോഗറുമായ ശ്രമോനയുടെ അച്ഛന്‍ ഒരു ഡോക്ടറാണ്. ‘ കൊല്‍ക്കത്തയ്ക്കടുത്തുള്ള ചന്ദന നഗര്‍ സ്വദേശിയാണ് ഞാന്‍. 2018 ഏപ്രില്‍ മാസം കൊല്‍ക്കത്ത ശോഭാബസാറില്‍ വച്ച് സുഹൃത്തും ഫ്രീലാന്‍സ് ഫോട്ടോഗ്രാഫറുമായ ഭാസ്‌കര്‍ ചാല്‍ ആണ് ചിത്രമെടുത്തത്. വെല്‍ഡ് ക്രാഫ്റ്റ് ബ്രാന്റിന്റെ ഫോട്ടോ ഷൂട്ടിനായി കൊല്‍ക്കത്തയിലെ വിവിധ സ്ഥലങ്ങളില്‍ ഞങ്ങള്‍ സഞ്ചരിച്ച് ഫോട്ടോകള്‍ പകര്‍ത്തി. ഈ ചിത്രത്തില്‍ ഞാന്‍ വൈല്‍ഡ് ക്രാഫ്റ്റ് ബാഗ് ധരിച്ചിട്ടുണ്ട്. ‘ശ്രമോന പറഞ്ഞു. ചിത്രം തെറ്റിദ്ധരിപ്പിക്കുന്ന സന്ദേശത്തോടെ പലരും പങ്കിട്ട ശേഷമാണ് വിശദീകരണവുമായി ശ്രമോന ഇന്‍സ്റ്റഗ്രാം പോസ്റ്റ് നല്‍കിയത്.
ശ്രമോന കുടുംബത്തോടൊപ്പമുള്ള നിരവധി ഫോട്ടോകളും വീഡിയോകളും അവരുടെ ഇന്‍സ്റ്റഗ്രാമില്‍ പോസ്റ്റ് ചെയ്തിട്ടുണ്ട്. ഇതില്‍ നിന്നു തന്നെ ചിത്രത്തിലുള്ളത് അവരുടെ അച്ഛനല്ല എന്നത് വ്യക്തമാണ്.
