അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.അടുത്തിടെ പോപ്പുലര്‍ ഫ്രണ്ട് ആലപ്പുഴയില്‍ നടത്തിയ റാലിയില്‍ വിദ്വേഷ മുദ്രാവാക്യം വിളിച്ച കുട്ടിയുടെ വീഡിയോ സമൂഹമാധ്യമങ്ങളില്‍ വൈറലായിരുന്നു. ഇതിനു പിന്നാലെ മതപഠനശാലകളാണ് ഇത്തരത്തില്‍ കുട്ടികളെ വഴിതെറ്റിക്കുന്നതെന്ന അഭിപ്രായം സമൂഹമാധ്യമങ്ങളില്‍ പലരും പങ്കുവയ്ക്കുന്നുണ്ട്. ഈ സംഭവം ചൂണ്ടിക്കാട്ടിക്കൊണ്ട് അസം സര്‍ക്കാര്‍ പാസാക്കിയ മദ്രസ ബില്ലിനെപ്പറ്റിയും സമൂഹമാധ്യമങ്ങള്‍ ചര്‍ച്ച ചെയ്യുന്നുണ്ട്. ‘മത വിദ്വേഷം പഠിപ്പിക്കുന്ന മദ്രസ്സകള്‍ അടച്ചുപൂട്ടാന്‍ അസം സര്‍ക്കാര്‍… അന്യമതവിരോധം പഠിപ്പിക്കുന്ന മദ്രസകള്‍, രാജ്യവ്യാപകമായി അടച്ച് പൂട്ടുക’ എന്ന കുറിപ്പിനൊപ്പം ആണ് പോസ്റ്റർ പ്രചരിക്കുന്നത്. എന്നാല്‍ പ്രചരിക്കുന്ന ഈ വാദം തികച്ചും തെറ്റിദ്ധരിപ്പിക്കുന്നതാണ്. മദ്രസ പഠനത്തിന് സര്‍ക്കാര്‍ ഗ്രാന്റ് നല്‍കുന്നത് നിര്‍ത്തലാക്കിക്കൊണ്ട് അസം സര്‍ക്കാര്‍ നിയമം പാസാക്കിയിട്ടുണ്ട്. എന്നാലിത് എല്ലാ മദ്രസകളെയും ബാധിക്കില്ല. പ്രചരിക്കുന്ന പോസ്റ്റില്‍ പറയുന്നത് മതവിദ്വേഷം പഠിപ്പിക്കുന്ന മദ്രസകള്‍ അടച്ചുപൂട്ടാന്‍ അസം സര്‍ക്കാര്‍ തീരുമാനമെടുത്തെന്നാണ്. ഇതെക്കുറിച്ച് അന്വേഷിച്ചപ്പോള്‍ ഈ വിവരം അര്‍ധ സത്യമാണെന്ന് മനസിലാക്കാനായി. അതായത് 2020ല്‍ അസം സര്‍ക്കാര്‍ മദ്രസ പഠനത്തെപ്പറ്റി ഒരു ബില്ല് പാസാക്കിയിട്ടുണ്ട്. ഇതുപ്രകാരം സംസ്ഥാനത്ത് മദ്രസ പഠനത്തിന് നല്‍കിവന്ന സര്‍ക്കാര്‍ ഗ്രാന്റ് നിര്‍ത്തലാക്കി. സര്‍ക്കാര്‍ മേഖലയില്‍ സ്ഥാപിച്ചിരുന്ന മതപഠനശാലകള്‍ അടച്ചുപൂട്ടിയെന്നാണ് വിവരം.
‘The Assam Repealing Act 2020’ എന്ന നിയമം പ്രാബല്യത്തില്‍ വന്നത് 2021 ജനുവരി 30നാണ്. മദ്രസകള്‍ക്ക് നല്‍കി വന്നിരുന്ന സര്‍ക്കാര്‍ ഗ്രാന്റ് നിര്‍ത്തലാക്കി. സര്‍ക്കാര്‍ ഫണ്ടില്‍ പ്രവര്‍ത്തിച്ചിരുന്ന സംസ്ഥാനത്തെ 620 മദ്രസകള്‍ 2021 ഏപ്രില്‍ ഒന്നു മുതല്‍ സാധാരണ സ്‌കൂളുകളാക്കി മാറ്റി. എന്നാല്‍ സ്വകാര്യ മദ്രസകള്‍ക്ക് ഇത് ബാധകമല്ല. ഇവയുടെ പ്രവര്‍ത്തനം തടഞ്ഞുകൊണ്ട് സര്‍ക്കാര്‍ പ്രത്യേക ഉത്തരവുകള്‍ ഒന്നും തന്നെ ഇറക്കിയിട്ടില്ലെന്ന് വാര്‍ത്തകളിലും വ്യക്തമാണ്. അതേസമയം, മദ്രസകള്‍ക്ക് മാത്രമല്ല സംസ്‌കൃത പഠനം നടത്തുന്ന വേദപഠനക്ലാസുകള്‍ക്കും സര്‍ക്കാര്‍ ഗ്രാന്റ് നിര്‍ത്തലാക്കിയതായി വാര്‍ത്തയില്‍ വ്യക്തമാക്കുന്നുണ്ട്. ഇത്തരത്തില്‍ 97 വേദ പഠന ശാലകളാണ് അടച്ചത്. ഇവയെ പിന്നീട് കുമാര്‍ ഭാസ്‌ക്കര്‍ വര്‍മ സംസ്‌കൃത സര്‍വകലാശാലയ്ക്കു കീഴിലാക്കിയിട്ടുണ്ട്. ഇപ്പോഴത്തെ അസം മുഖ്യമന്ത്രിയും അന്നത്തെ വിദ്യാഭ്യാസമന്ത്രിയുമായിരുന്ന ഹിമന്ത ബിശ്വ ശര്‍മ്മയാണ് മതപഠനശാലകള്‍ക്ക് സര്‍ക്കാര്‍ ഫണ്ട് അനുവദിക്കേണ്ടതില്ല എന്ന തീരുമാനത്തിനു പിന്നില്‍. അദ്ദേഹം അന്ന് മാധ്യമങ്ങളോട് പറഞ്ഞത് സ്വകാര്യ മദ്രസകള്‍ അടച്ചുപൂട്ടണമെന്ന് സര്‍ക്കാര്‍ നിര്‍ദ്ദേശിക്കുന്നില്ല. എന്നാല്‍ ഇനി സര്‍ക്കാര്‍ മേഖലയില്‍ മദ്രസകള്‍ ഉണ്ടാകില്ല. സ്വകാര്യ മേഖലകളിലെ മതപഠനശാലകളുടെ പ്രവര്‍ത്തനം സംബന്ധിച്ച് നിയന്ത്രണങ്ങള്‍ കൊണ്ടുവരും എന്നും അദ്ദേഹം പറഞ്ഞതായി നാഷണല്‍ ഹെറാള്‍ഡ് റിപ്പോര്‍ട്ട് ചെയ്തിരുന്നു.
മദ്രസകള്‍ അടച്ചുപൂട്ടിയ ബിജെപി സര്‍ക്കാരിന്റെ നടപടിക്കെതിരെ കോണ്‍ഗ്രസ് ഉള്‍പ്പെടെയുള്ള പ്രതിപക്ഷപാര്‍ട്ടികള്‍ എതിര്‍പ്പുമായി രംഗത്തെത്തിയിരുന്നു. ഇതെത്തുടര്‍ന്ന് നിരവധി മദ്രസാ മാനേജ്‌മെന്റുകള്‍ ഹൈക്കോടതിയില്‍ ഹര്‍ജി നല്‍കി. എന്നാല്‍ സര്‍ക്കാര്‍ തീരുമാനം ശരിവച്ചുകൊണ്ട് 2022 ഫെബ്രുവരി നാലിന് കോടതി ഹര്‍ജി തള്ളുകയുണ്ടായി. സര്‍ക്കാര്‍ ഫണ്ട് ഉപയോഗിച്ച് മതപഠനം പാടില്ലെന്ന് പ്രോസിക്യൂഷന്‍ കോടതിയില്‍ വാദിച്ചു. മദ്രസകള്‍ മാത്രമല്ല ഹിന്ദു മതപഠന കേന്ദ്രങ്ങള്‍ക്കും ഇത്തരത്തില്‍ വിലക്കേര്‍പ്പെടുത്തിയിട്ടുണ്ടെന്നും അറിയിച്ചു. ഇതോടെയാണ് അസം സര്‍ക്കാരിന് അനുകൂലമായി വിധി വന്നത്. അതേസമയം, സ്വകാര്യ മദ്രസകളെപ്പറ്റി ഇതില്‍ പ്രതിപാദിക്കുന്നില്ല. ഇതുവരെയും സ്വകാര്യ മതപഠനശാലകള്‍ വിലക്കി അസം സര്‍ക്കാര്‍ ഉത്തരവ് പുറപ്പെടുവിച്ചിട്ടില്ല. ഇതോടെ അസം സര്‍ക്കാര്‍ എല്ലാ മദ്രസകളെയും വിലക്കി എന്ന രീതിയിലുള്ള പ്രചാരണം തെറ്റിദ്ധരിപ്പിക്കുന്നതാണെന്ന് വ്യക്തമായി.
