അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കൊച്ചി: ആക്രമിക്കപ്പെട്ട നടിയുടെ ഹര്ജി പരിഗണിക്കുന്നതില് നിന്നും ജഡ്ജി ജസ്റ്റിസ് കൗസര് എടപ്പഗത്ത് പിന്മാറി. ഇന്ന് രാവിലെ കോടതി നടപടികള് ആരംഭിച്ചതിന് പിന്നാലെ കേസ് പരിഗണിക്കുന്നതില് നിന്ന് പിന്മാറണമെന്ന് അഭിഭാഷകയായ അഡ്വ. പി.വി മിനി മുഖേനെ നടി ആവശ്യപ്പെട്ടിരുന്നു. ഉടന് തന്നെ ഹര്ജി കേള്ക്കുന്നതില് നിന്ന് നിന്ന് പിന്മാറുകയാണെന്ന് ജസ്റ്റിസ് വ്യക്തമാക്കി. ഇനി മറ്റൊരു ബെഞ്ച് ഈ കേസ് പരിഗണിക്കും. ഏത് ബെഞ്ചിലേക്ക് ഹര്ജി മാറ്റണമെന്നത് ഇനി ചീഫ് ജസ്റ്റിസ് ആവും തീരുമാനിക്കുക.
കേസ് അട്ടിമറിക്കുന്നുവെന്ന് കാണിച്ച് വിചാരണക്കോടതി ജഡ്ജിക്കെതിരേ നടി രംഗത്തുവന്നിരുന്നു. സര്ക്കാരിനും വിചാരണക്കോടതി ജഡ്ജിക്കുമെതിരേ ഗുരുതര ആരോപണവുമായി ആക്രമിക്കപ്പെട്ട നടി ഹൈക്കോടതിയില് ഹര്ജി നല്കുകയും ചെയ്തിരുന്നു. നടിയെ ആക്രമിച്ച കേസില് തുടരന്വേഷണം പാതിവഴിയില് അവസാനിപ്പിക്കാനും പാതിവെന്ത അന്തിമ റിപ്പോര്ട്ട് സമര്പ്പിക്കാനും രാഷ്ട്രീയ ഉന്നതര് അന്വേഷണ സംഘത്തെ ഭീഷണിപ്പെടുത്തുന്നതായി ഹര്ജിയില് ആരോപണം ഉയർത്തുന്നു.
