തിരുവനന്തപുരത്ത് നടന്ന ഹിന്ദു മഹാസമ്മേളനത്തില്‍ പങ്കെടുത്തുകൊണ്ട് ഖത്തറിലെ മലയാളം മിഷന്‍ കോര്‍ഡിനേറ്ററായ ദുര്‍ഗാദാസ് ശിശുപാലന്‍, നഴ്‌സുമാര്‍ക്കെതിരെ നടത്തിയ പരാമര്‍ശം ഏറെ വിവാദമായിരുന്നു. ‘ഗള്‍ഫ് രാജ്യങ്ങളിലേക്ക് നഴ്‌സുമാരെ റിക്രൂട്ട് ചെയ്യുന്നത് തീവ്രവാദികള്‍ക്ക് ലൈംഗീക അടിമകളാക്കാനാണ്’ എന്നായിരുന്നു ദുര്‍ഗാദാസിന്റെ പ്രതികരണം. നഴ്‌സുമാരുടെയും പ്രവാസിസംഘടനകളുടെയും പ്രതിഷേധത്തിനൊടുവില്‍ ദുര്‍ഗാദാസിനെ കോര്‍ഡിനേറ്റര്‍ സ്ഥാനത്ത് നിന്ന് ഖത്തര്‍ മലയാളം മിഷന്‍ പുറത്താക്കി. ഈ സംഭവത്തെത്തുടര്‍ന്ന് ദുര്‍ഗാദാസിനെ അനുകൂലിച്ചും പ്രരതികൂലിച്ചും നിരവധി പോസ്റ്റുകളാണ് സമൂഹമാധ്യമങ്ങളില്‍ പ്രചരിക്കുന്നത്. മലയാളികള്‍ ഉള്‍പ്പെടുന്ന അന്താരാഷ്ട്ര സെക്‌സ് റാക്കറ്റ് ഖത്തറില്‍ പിടിയില്‍ എന്നുള്ള ഒരു വാര്‍ത്ത ഇത്തരത്തില്‍ പ്രചരിക്കുന്നുണ്ട്. ‘ഹിന്ദു മഹാ സമ്മേളനത്തില്‍ പറഞ്ഞ ചില കാര്യങ്ങള്‍ ഇന്ന് വലിയ രീതിയില്‍ ചര്‍ച്ച ആകുമ്പോള്‍..’ എന്ന തലക്കെട്ടോടെയാണ് വീഡിയോ പ്രചരിക്കുന്നത്. എന്നാല്‍, പ്രചരിക്കുന്ന വാർത്ത തെറ്റിദ്ധരിപ്പിക്കുന്നതാണ്. ഇത് വര്‍ഷങ്ങള്‍ പഴക്കമുള്ള വാര്‍ത്തയാണ്.
പ്രചരിക്കുന്ന പോസ്റ്റിനൊപ്പമുള്ളത് ഏഷ്യനെറ്റ് ന്യൂസ് നല്‍കിയ വാര്‍ത്തയാണ്. ഖത്തറില്‍ വന്‍ സെക്‌സ് റാക്കറ്റ് എന്ന് വെളിപ്പെടുത്തിക്കൊണ്ട് പീഡനത്തിന് ഇരയായ സ്ത്രീയുടെ പ്രതികരണം ഉള്‍പ്പെടെ നല്‍കിയ വാര്‍ത്തയാണിത്. തിരുവനന്തപുരം വിമാനത്താവളത്തിലെ ചില ഉദ്യോഗസ്ഥരുടെ ഒത്താശയോടെ തമ്പാനൂരിലെ ഒരു ട്രാവല്‍സാണ് ഇത്തരത്തില്‍ സ്ത്രീകളെ ഖത്തറിലേക്ക് കയറ്റിവിടുന്നതെന്നാണ് വാര്‍ത്തയില്‍ പറയുന്നത്. വാര്‍ത്തയില്‍ പ്രതികരിക്കുന്ന സ്ത്രീ പറയുന്നത് ഖത്തറിലെ തുമാമ എന്ന സ്ഥലത്ത് തന്നെ എത്തിച്ചത് നജീബ് എന്നയാള്‍ ആണെന്നും ഡെ കെയര്‍ ജീവനക്കാരിയുടെ ജോലിക്ക് വേണ്ടി ഒരു ലക്ഷം രൂപയിലേറെ പണം നല്‍കിയാണ് വിസ നേടിയതെന്നുമാണ്. ചതിക്കപ്പെട്ടവിവരം അറിയുന്നത് ഖത്തറിലെത്തിയ ശേഷമാണെന്നും സ്ത്രീ പറയുന്നുണ്ട്. വാര്‍ത്തയില്‍ നിന്ന് ലഭ്യമായ സൂചനകള്‍ ഉപയോഗിച്ച് തിരഞ്ഞപ്പോള്‍ ഏഷ്യനെറ്റ് ന്യൂസ് നല്‍കിയ ഇതേ റിപ്പോര്‍ട്ട് കണ്ടെത്താനായി. 2016 നവംബര്‍ 28നാണ് ഏഷ്യനെറ്റ് ഈ വാര്‍ത്ത നല്‍കിയതെന്ന് വ്യക്തമായി. സമാനമായ വാര്‍ത്ത മറ്റ് മാധ്യമങ്ങളും നല്‍കിയതായി കണ്ടെത്താനായി.
ഖത്തറില്‍ സെക്‌സ് റാക്കറ്റ് പിടികൂടിയതുമായി ബന്ധപ്പെട്ട് സമീപകാലത്ത് വാര്‍ത്തകള്‍ എന്തെങ്കിലും ഉണ്ടോ എന്ന് പരിശോധിച്ചു. എന്നാല്‍ ഇത്തരത്തില്‍ റിപ്പോര്‍ട്ടുകളൊന്നു കാണാനായില്ല. ഓണ്‍ലൈന്‍ ആപ്പുകളെപ്പറ്റിയുള്ള വാര്‍ത്തയാണ് സെക്‌സ് റാക്കറ്റുമായി ബന്ധപ്പെട്ട് അടുത്തിടെ വന്നത്. ഇതോടെ ലഭ്യമായ വിവരങ്ങളില്‍ നിന്ന് ഖത്തറിലെ പഴയ സെക്‌സ് റാക്കറ്റ് വാര്‍ത്ത ഇപ്പോള്‍ തെറ്റായ വിവരണത്തോടെ പങ്കിടുന്നതാണെന്ന് വ്യക്തമാണ്.