അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഏപ്രിൽ 13ന് വിജയുടെ ബീസ്റ്റും ഏപ്രിൽ 14ന് കെജിഎഫ് ചാപ്റ്റർ 2വും തിയറ്ററുകളിലെത്തി. സിനിമാപ്രേമികൾ ഏറെ കാത്തിരിക്കുന്ന റിലീസുകളായിരുന്നു ഇവ. എന്നാൽ ബീസ്റ്റ് കുവൈറ്റിൽ നിരോധിക്കപ്പെട്ടിരുന്നു. ഇതിന് പിന്നാലെ ബീസ്റ്റ് മുസ്ലിം സമുദായത്തെ ആകെ തീവ്രവാദികളായി ചിത്രീകരിക്കുന്നു എന്നാരോപിച്ച് മുസ്ലിം ലീഗ് ചിത്രം നിരോധിക്കണമെന്ന് ആവശ്യപ്പെട്ട് രംഗത്ത് എത്തി എന്ന വാർത്തകൾ പുറത്തുവന്നിരുന്നു. തുടർന്ന് ഇടതുപക്ഷ അനുഭാവികളും ബിജെപി ഐടി വിങ്ങും ഒരുപോലെ മുസ്ലിം ലീഗിനെതിരെ കടുത്ത സൈബർ വിമർശനമാണ് നടത്തുന്നത്. എന്നാൽ പ്രചരിക്കുന്ന പോസ്റ്റ് തികച്ചും തെറ്റിദ്ധരിപ്പിക്കുന്നതാണ്. ബീസ്റ്റ് നിരോധിക്കണമെന്ന ആവശ്യവുമായി രംഗത്തെത്തിയിരിക്കുന്നത് കേരളത്തിൽ യുഡിഎഫ് മുന്നണിയിലും തമിഴ്നാട്ടിൽ ഡിഎംകെക്ക് ഒപ്പവും നിൽക്കുന്ന ഇന്ത്യൻ യൂണിയൻ മുസ്ലിം ലീഗ് (IUML) അല്ല. തമിഴ്നാട് മുസ്ലിം ലീഗ് (TNML) എന്ന മറ്റൊരു രാഷ്ട്രീയ പ്രസ്ഥാനമാണ് വിവാദ പ്രസ്താവനക്ക് പിന്നിൽ.
ബീസ്റ്റ് ഇസ്ലാം മതവിശ്വാസികളെ തീവ്രവാദികളായി ചിത്രീകരിച്ചു എന്നാരോപിച്ചാണ് കേന്ദ്ര ആഭ്യന്തര സെക്രട്ടറി എസ് കെ പ്രഭാകരന് മുസ്ലിം ലീഗ് നേതാവ് വിഎംഎസ് മുസ്തഫ കത്തയച്ചു. തുടർന്ന് മുസ്തഫയുടെ ഫേസ്ബുക്ക് പേജ് പരിശോദിച്ചു. വിഷയവുമായി ബന്ധപ്പെട്ട് മുസ്തഫ നടത്തിയ ഒരു അഭിമുഖം പേജിൽ നിന്ന് ലഭ്യമായി. കൂടാതെ, ഈ പേജിൽ കണ്ടെത്താൻ സാധിച്ച പാർട്ടി കൊടിയുടെ ചിത്രങ്ങൾ ഇന്ത്യൻ യൂണിയൻ മുസ്ലിം ലീഗിന്റേത് ആയിരുന്നില്ല. വെള്ളയും പച്ചയും നിറങ്ങളിൽ നക്ഷത്രവും ചന്ദ്രക്കലയും അടങ്ങുന്ന കൊടിയുടെ നടുവിലായി TNML എന്ന് ആലേഖനം ചെയ്തിരുന്നു. ഇതിൽനിന്നും മുസ്തഫ പ്രതിനിധാനംചെയ്യുന്ന പ്രസ്ഥാനം ഐയുഎംഎൽ അല്ലായെന്ന് അനുമാനിക്കാൻ കഴിഞ്ഞു. തുടർന്നുള്ള അന്വേഷണത്തിൽ തമിഴ്നാട് മുസ്ലിംലീഗ് അഥവാ ടി എം എം എൽ എന്ന പ്രസ്ഥാനത്തിൻറെ സ്ഥാപക നേതാവാണ് ബിഎംഎസ് മുസ്തഫ എന്നും കണ്ടെത്താൻ സാധിച്ചു.
ഇന്ത്യൻ യൂണിയൻ മുസ്ലിം ലീഗ് തമിഴ്നാട്ടിൽ സിപിഎമ്മിനും കോൺഗ്രസിനുമൊപ്പം ഭരണകക്ഷിയായ ഡിഎംകെ മുന്നണിയുടെ ഭാഗമായി നിൽക്കുമ്പോൾ, TNML ടി ടി വി ദിനകരന്റെ അമ്മ മക്കള്‍ മുന്നേറ്റ്ര കഴകത്തിന്റെ (AMMK) ഒപ്പമാണ് എന്ന് റിപ്പോർട്ടുകൾ സൂചിപ്പിക്കുന്നു. സൈബർ ഇടങ്ങളിൽ തെറ്റിദ്ധാരണ ഉണ്ടായതിനെതുടർന്ന് IUML കേരള ഘടകം തങ്ങളുടെ ഔദ്യോഗിക ഫേസ്ബുക്ക് പേജിൽ ഏപ്രിൽ ഏഴിന് വിഷയത്തിൽ ഒരു വിശദീകരണം നൽകിയതായി കണ്ടെത്താൻ സാധിച്ചു. TNML എന്നത് ഇന്ത്യൻ യൂണിയൻ മുസ്ലിം ലീഗുമായി ബന്ധമില്ലാത്ത സംഘടനയാണെന്നും, സമൂഹമാധ്യമങ്ങളിൽ IUMLന്റെ പേരിൽ നടക്കുന്ന പ്രചരണം വ്യാജമാണെന്നും ഈ പോസ്റ്റിൽ വ്യക്തമാക്കുന്നുണ്ട്. ഇതോടെ, ഇന്ത്യൻ യൂണിയൻ മുസ്ലിംലീഗ് തമിഴ് ചിത്രം ബീസ്റ്റ് നിരോധിക്കണമെന്നാവശ്യപ്പെട്ടു എന്ന പ്രചാരണം തെറ്റാണെന്ന് വ്യക്തമാണ്.
