അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഇനി മുതല്‍ യൂബറില്‍ വിമാനടിക്കറ്റ്, ട്രെയിൻ, ബസ് എന്നിവ ബുക്ക് ചെയ്യാനുള്ള സൗകര്യം. ഇതിനുള്ള ഓപ്ഷന്‍ വൈകാതെ യൂബര്‍ ആപ്പില്‍ ഉള്‍പ്പെടുത്തുമെന്നാണ് കമ്പനി അറിയിച്ചത്. നിലവില്‍ ഉപയോക്താക്കള്‍ക്ക് ക്യാബുകള്‍ മാത്രം ബുക്ക് ചെയ്യാനേ കഴിയൂ. ഈ പുതിയ ഫീച്ചര്‍ യുകെയില്‍ പരീക്ഷിച്ചു കൊണ്ടിരിക്കുകയാണെന്ന് കമ്പനി അറിയിച്ചു.ഈ വര്‍ഷാവസാനം ഫ്ലൈറ്റുകൾ ആപ്പിലേക്ക് സംയോജിപ്പിക്കാനാണ് യൂബറിന്റെ പദ്ധതി.
തടസമില്ലാത്ത ഡോര്‍ ടു ഡോര്‍ യാത്രാനുഭവമായി യൂബറിനെ മാറ്റുകയാണ് ലക്ഷ്യമെന്ന് കമ്പനി പറയുന്നു. വരും നാളുകളിൽ ഹോട്ടല്‍ ബുക്കിങ്ങും നടത്താനും പദ്ധതിയുണ്ട് . ഇതിനായി, മുന്‍നിര പങ്കാളികളെ യൂബര്‍ ആപ്പിലേക്ക് സംയോജിപ്പിച്ച് തടസങ്ങളില്ലാത്ത ഡോര്‍ ടു ഡോര്‍ യാത്രാ അനുഭവം സൃഷ്ടിക്കാനാണ് യൂബർ ലക്ഷ്യമിടുന്നത്.
യൂബര്‍ യാത്രാ സേവനങ്ങള്‍ സ്വയം നല്‍കില്ല, മറിച്ച് ടിക്കറ്റുകളുടെയും മറ്റ് അനുബന്ധ സേവനങ്ങളുടെയും വില്‍പ്പന സുഗമമാക്കുന്നതിന് തേഡ് പാര്‍ട്ടി ബുക്കിംഗ് ഏജന്‍സികളുമായി സഹകരിക്കും. നിലവിൽ യുകെ മാത്രമാണ് ഫീച്ചര്‍ പരീക്ഷിക്കുന്നതെന്നാണ് കമ്പനി അറിയിച്ചത്. മറ്റ് ഏതെങ്കിലും രാജ്യങ്ങൾ ഫീച്ചർ പരീക്ഷിക്കുണ്ടോയെന്ന് യൂബര്‍ വെളിപ്പെടുത്തിയിട്ടില്ല.
