അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ബോളിവുഡ് ഗാനങ്ങൾക്ക് ചുവടുവച്ചും പാട്ടുകൾക്ക് ചുണ്ടനക്കിയും ഇൻസ്റ്റാഗ്രാം റീൽസിലൂടെ താരമായി മാറിയ കിലി പോളിന് ഇന്ത്യൻ അംബാസഡറുടെ ആദരം. ബോളിവുഡ് സിനിമകളിലെ റീൽസുകളിലൂടെ ഇന്ത്യയൊട്ടാകെ ആരാധകരുള്ള ടാൻസാനിയൻ താരമാണ് കിലി പോൾ. ടാൻസാനിയയിലെ ഇന്ത്യൻ ഹൈ കമ്മീഷണറായ ബിനായ പ്രധാനാണ് ട്വിറ്ററിലൂടെ ഇക്കാര്യം അറിയിച്ചത്.
ഇന്ത്യയിലെ ദശലക്ഷക്കണക്കിന് ആളുകളുടെ ഹൃദയം കവർന്ന ടാൻസാനിയൻ താരം കിലി പോളാണ് ഇന്നത്തെ വിശിഷ്ടാഥിതി എന്ന അടിക്കുറിപ്പോടെയാണ് ഇന്ത്യൻ ഹൈക്കമ്മീഷൻ അദ്ദേഹത്തെ ആദരിക്കുന്ന ചിത്രങ്ങൾ ട്വിറ്ററിൽ പങ്കുവെച്ചത്. ബോളിവുഡിലെ ജനപ്രിയ ഗാനങ്ങൾക്ക് ചുണ്ടുകൾ ചലിപ്പിച്ചാണ് കിലി പോൾ ഇൻസ്റ്റഗ്രാമിൽ തരംഗമാകുന്നത്.
കിലിക്കൊപ്പം ചുവടു വെച്ച് വൈറൽ വീഡിയോകളിൽ ഭാഗമായിട്ടുള്ള സഹോദരി നിമ പോളും ഇൻസ്റ്റഗ്രാമിൽ തരംഗമാണ്. ഇൻസ്റ്റഗ്രാമിൽ രണ്ട് ദശലക്ഷത്തിലധികം ഫോളോവേഴ്സുള്ള കിലി പോളിനെ ആയുഷ്മാൻ ഖുറാന, ഗുൽ പനാഗ്, റിച്ച ഛദ്ദ തുടങ്ങി ബോളിവുഡിലെ നിരവധി അഭിനേതാക്കളാണ് പിന്തുടരുന്നതും വീഡിയോകൾ പങ്കുവെക്കുന്നതും. തന്‍റെ പാരമ്പര്യം നിലനിർത്തി പരമ്പരാഗത വസ്ത്രങ്ങൾ ധരിച്ച് വീഡിയോകൾ പോസ്റ്റ് ചെയ്യുന്നതിന് നിരവധി പേരാണ് സമൂഹ മാധ്യമങ്ങളിൽ അദ്ദേഹത്തിന് അഭിനന്ദനവുമായി എത്തുന്നത്.
Today had a special visitor at the @IndiainTanzania ; famous Tanzanian artist Kili Paul has won millions of hearts in India for his videos lip-syncing to popular Indian film songs #IndiaTanzania pic.twitter.com/CuTdvqcpsb
— Binaya Pradhan (@binaysrikant76) February 21, 2022
