അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.മലയാള സിനിമയുടെ ചരിത്രത്തില്‍ മറ്റൊരു സിനിമയ്ക്കും ഇതുവരെ എത്തിപ്പെടാന്‍ സാധിക്കാത്ത സ്ഥാനത്താണ് ദൃശ്യം ഫ്രാഞ്ചൈസിയുള്ളത്. രാജ്യത്തിനകത്തും പുറത്തുമായി ഏറ്റവുമധികം ഭാഷകളിലേക്ക് റീമേക്കുകള്‍ നടന്ന മലയാള ചിത്രം വേറെയില്ല. തിയേറ്ററില്‍ എത്തിയ ഒന്നും മൂന്നും പതിപ്പുകള്‍ വലിയ സാമ്പത്തിക വിജയം നേടി. ഒടിടി റിലീസായ രണ്ടാമത്തെ പതിപ്പ് ജനപ്രീതിയില്‍ മുമ്പിലായിരുന്നു. എന്നിരുന്നാലും മൂന്നാമത്തെ പതിപ്പിന് വേണ്ടത്ര പ്രേക്ഷകപ്രീതി ലഭിച്ചിരുന്നില്ല. ആ കുറവ് നികത്തുകയാണ് ഹിന്ദി റീമേക്കായ ‘ദൃശ്യം ദ കണ്‍ക്ലൂഷന്‍’. കഥയില്‍ വ്യത്യാസം വരുത്തി തിയേറ്ററില്‍ റിലീസ് ചെയ്ത ദൃശ്യം മൂന്നിന്റെ ഹിന്ദി റീമേക്ക് ബോക്‌സ് ഓഫീസില്‍ വന്‍ കുതിപ്പാണ് നടത്തുന്നത്.
ഒക്ടോബര്‍ 2 ന് തിയേറ്ററുകളിലെത്തിയ ‘ദൃശ്യം ദ കണ്‍ക്ലൂഷന്‍’ ആദ്യ ദിവസം തന്നെ മികച്ച പ്രതികരണം നേടിയിരുന്നു. പ്രമുഖ ട്രാക്കര്‍മാരായ സാക്‌നില്‍കിന്റെ കണക്ക് പ്രകാരം ഇന്ത്യയില്‍ നിന്ന് മാത്രം ചിത്രം 300 കോടി ക്ലബ്ബില്‍ ഇടം പിടിച്ചിരിക്കുകയാണ്. 312 കോടി രൂപയാണ് ചിത്രത്തിന്റെ ഇതുവരെയുള്ള ഇന്ത്യന്‍ ഗ്രോസ് കളക്ഷന്‍. വിദേശത്ത് നിന്ന് ചിത്രം ഇതുവരെ നേടിയത് 95 കോടിയും. അങ്ങനെ ആഗോള ബോക്‌സ് ഓഫീസില്‍ നിന്ന് ‘ദൃശ്യം ദ കണ്‍ക്ലൂഷന്‍’ ഇതുവരെ സ്വന്തമാക്കിയത് 407 കോടി രൂപയാണ്.
ജീത്തു ജോസഫിന്റെ മലയാളം പതിപ്പിന് നേടാനാവാതെ പോയ ജനപ്രീതിയാണ് അജയ് ദേവ്ഗണ്‍ ചിത്രം നേടുന്നത്. ചിത്രം കണ്ട മലയാളികളും ഇത് മലയാളം ദൃശ്യം 3 നേക്കാള്‍ മികച്ച അനുഭവമാണ് നല്‍കിയതെന്ന് സമൂഹമാധ്യമങ്ങളില്‍ അഭിപ്രായപ്പെടുന്നുണ്ട്. അഭിഷേക് പടത് സംവിധാനം ചെയ്തിരിക്കുന്ന ചിത്രത്തിന്റെ രചന സംവിധായകനൊപ്പം ആമില്‍ കീയന്‍ ഖാനും പര്‍വേസ് ഷെയ്ഖും ചേര്‍ന്നാണ് നിര്‍വഹിച്ചിരിക്കുന്നത്. തബു, ശ്രിയ ശരണ്‍, ജയ്ദീപ് അഹ്ലാവത്, രജത് കപൂര്‍, പ്രകാശ് രാജ് തുടങ്ങിയവരാണ് മറ്റ് താരങ്ങള്‍.
