അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
കാസര്‍കോട്: കാസര്‍കോട് ജില്ലയില്‍ രണ്ടിടങ്ങളില്‍ നിന്നായി 43 കിലോ കഞ്ചാവ് പിടികൂടി. കാസര്‍കോഡ് ചൗക്കി, ബദിയടുക്ക എന്നിവിടങ്ങളില്‍ നിന്നാണ് കഞ്ചാവ് പോലിസ് പിടികൂടിയത്. സംഭവത്തില്‍ മൂന്ന് പേരെ പോലിസ് അറസ്റ്റ് ചെയ്തു. ജില്ലയിലെ ചെറുകിട വില്‍പനക്കാര്‍ക്ക് വിതരണം ചെയ്യുന്നതിനായി എത്തിച്ച കഞ്ചാവാണ് പിടികൂടിയത്.
ചൗക്കിയില്‍ പോലിസിന്റെ വാഹന പരിശോധനക്കിടെ കഞ്ചാവ് കടത്തുകയായിരുന്ന ഓട്ടോറിക്ഷ നിര്‍ത്താതെ പോയി. പോലിസ് പിന്തുടര്‍ന്ന് പിടികൂടിയ വാഹനത്തില്‍ നിന്ന് 22 കിലോ കഞ്ചാവ് കണ്ടെടുത്തു. 10 പാക്കറ്റുകളിലായാണ് കഞ്ചാവ് സൂക്ഷിച്ചിരുന്നത്. ഓട്ടോറിക്ഷയിലുണ്ടായിരുന്ന നെല്ലിക്കട്ട സ്വദേശി അബ്ദുല്‍ റഹ്മാന്‍, പെരുമ്ബളക്കടവ് സ്വദേശി അഹമ്മദ് കബീര്‍, ആദൂര്‍ സ്വദേശി മുഹമ്മദ് ഹാരിസ് എന്നിവരെ പിടികൂടി.
പ്രതികളെ വിശദമായി ചോദ്യം ചെയ്തതോടെയാണ് അബ്ദുല്‍ റഹ്മാന്‍ താമസിക്കുന്ന ബദിയടുക്കയിലെ ക്വാര്‍ട്ടേഴ്സില്‍ കഞ്ചാവ് സൂക്ഷിച്ചിരുന്നതായി വിവരം ലഭിച്ചത്. തുടര്‍ന്ന് നടത്തിയ പരിശോധനയില്‍ 23 കിലോ കഞ്ചാവ് ഇവിടെ നിന്നും കണ്ടെടുത്തു. അറസ്റ്റിലായ മൂന്ന് പേരും വന്‍കിട കഞ്ചാവ് കടത്ത് സംഘത്തിലെ ഏജന്റുമാരാണ്.
