അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഭക്ഷ്യസുരക്ഷാ മാനദണ്ഡങ്ങള് പാലിക്കുന്നുണ്ടെന്ന് ഉറപ്പാക്കാന് ‘ഷവര്മ’ വില്ക്കുന്ന കടകളില് പരിശോധനകള് കര്ശനമാക്കാന് ഹൈക്കോടതി നിര്ദേശം. ഭക്ഷ്യസുരക്ഷാ മാനദണ്ഡങ്ങള് പാലിക്കാതെ ഷവര്മ വില്ക്കുന്ന കടകളുടെ ലൈസന്സ് റദ്ദാക്കുന്നതിനൊപ്പം കര്ശനമായ നടപടി സ്വീകരിക്കണമെന്നും ജസ്റ്റിസ് ദേവന് രാമചന്ദ്രന് നിര്ദേശിച്ചു. 2022ല് കാസര്കോട്ട് ഷവര്മ കഴിച്ച് 16കാരി മരിച്ച സംഭവത്തില് മാതാവ് സമര്പ്പിച്ച ഹര്ജിയിലാണ് കോടതി ഉത്തരവ്. നഷ്ടപരിഹാരത്തിന്റെ കാര്യത്തില് കാലതാമസം കൂടാതെ ഉത്തരവിടാന് വിചാരണക്കോടതിക്കും ഹൈക്കോടതി നിര്ദേശം നല്കി.
2022 മേയ് മാസത്തിലാണ് ഷവര്മ കഴിച്ച് വിദ്യാര്ഥിനി മരിച്ചത്. ഈ കേസിന്റെ വിചാരണ കാസര്കോട് അഡീഷനല് സെഷന്സ് കോടതിയില് നടന്നു വരികയാണ്. ഒരു കോടി രൂപ നഷ്ടപരിഹാരം ആവശ്യപ്പെട്ടാണ് മാതാവ് ഹൈക്കോടതിയെ സമീപിച്ചത്. 2006 ഭക്ഷ്യ സുരക്ഷാ നിയമത്തിലെ വകുപ്പുകള് അനുസരിച്ച് ആറു മാസത്തിനുള്ളില് കവിയാത്ത സമയത്തിനുള്ളില് നഷ്ടപരിഹാരം നല്കണമെന്നാണ്. മരണം സംഭവിച്ചാല് 30 ദിവസത്തിനുള്ളില് ഇടക്കാല ആശ്വാസ ധനം നല്കണം. ഈ സാഹചര്യത്തിലാണ് നഷ്ടപരിഹാര കാര്യത്തില് വൈകാതെ ഉത്തരവിടാന് കോടതി നിര്ദേശം നല്കിയത്.
ഹര്ജിയുമായി കോടതിയിലെത്തിയതിന് മാതാവിനെ അഭിനന്ദിച്ച കോടതി, കേസ് നടത്തിപ്പ് ചിലവില് 25,000 രൂപ നല്കാനും സര്ക്കാരിന് നിര്ദേശം നല്കി. ഷവര്മ കഴിച്ച് വിദ്യാര്ഥിനി മരിച്ച സംഭവത്തില് 2023 നവംബറില് ഹൈക്കോടതി ഇടക്കാല ഉത്തരവ് പുറപ്പെടുവിച്ചിരുന്നു. ഷവര്മ ഉള്പ്പെടെയുള്ള ആഹാരസാധനങ്ങളില് തയാറാക്കിയതിന്റെ തീയതിയും സമയവും കൃത്യമായി പായ്ക്കറ്റുകളില് രേഖപ്പെടുത്തണമെന്ന് അന്ന് ഹൈക്കോടതി നിര്ദേശിച്ചിരുന്നു. കൗണ്ടറിലൂടെ നല്കുന്നതായാലും പാഴ്സലായാലും ഇക്കാര്യം കൃത്യമായി പാലിച്ചിരിക്കണം. നിയമങ്ങളും നിര്ദേശങ്ങളും ലംഘിക്കുന്ന ഭക്ഷ്യസ്ഥാപനങ്ങള്ക്കെതിരെ നടപടി സ്വീകരിക്കണമെന്നും കോടതി നിര്ദേശിച്ചിരുന്നു. 2023ലെ ഈ ഉത്തരവില് പറയുന്ന കാര്യങ്ങള് കൃത്യമായി നടപ്പാക്കിയിരിക്കണമെന്നും കോടതി നിര്ദേശിച്ചിട്ടുണ്ട്.
ഷവര്മ കഴിച്ച് ബുദ്ധിമുട്ടുണ്ടാകുന്ന സംഭവങ്ങള് കൂടി വന്നതോടെ ഇക്കാര്യത്തില് സര്ക്കാര് കര്ശനമായ മാനദണ്ഡങ്ങള് പുറത്തിറക്കിയിരുന്നു. മയണൈസ് നിര്മാണത്തില് പച്ചമുട്ട ഉപയോഗിക്കുന്നത് നിരോധിച്ച് ഭക്ഷ്യസുരക്ഷാ കമ്മിഷണര് ഉത്തരവിറക്കിയിട്ടുണ്ട്.
