അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
കൊച്ചി: കെ റെയിൽ പദ്ധതിയുമായി ബന്ധപ്പെട്ട സർവേ തടഞ്ഞ ഉത്തരവിനെതിരെ സംസ്ഥാന സർക്കാർ അപ്പീൽ നൽകി. ഹൈക്കോടതി സിംഗിൾ ബെഞ്ച് ഉത്തരവിനെതിരെ ഡിവിഷൻ ബെഞ്ചിലാണ് സർക്കാർ അപ്പീൽ നൽകിയത്. സില്വര് ലൈന് സര്വേ നടപടിക്കെതിരെ കോടതിയെ സമീപിച്ചവരുടെ ഭൂമിയിലെ സര്വേ നടപടികള് തടഞ്ഞ ഉത്തരവ് റദ്ദാക്കണമെന്നാണ് സര്ക്കാരിന്റെ ആവശ്യം.
സിംഗിള് ബഞ്ച് ഉത്തരവ് സര്ക്കാരിന്റെ വാദങ്ങള് കണക്കിലെടുക്കാതെയാണെന്ന് അപ്പീലില് സംസ്ഥാന സര്ക്കാര് ചൂണ്ടിക്കാട്ടുന്നു. പരാതിക്കാരുടെ ഹര്ജിയിലെ പരിഗണനാ വിഷയങ്ങള്ക്ക് അപ്പുറം കടന്നാണ് സിംഗിള് ബഞ്ചിന്റെ ഇടക്കാല ഉത്തരവെന്നും സര്ക്കാര് അപ്പീലില് വ്യക്തമാക്കി. സര്വേ നിര്ത്തി വയ്ക്കാനുള്ള ഇടക്കാല ഉത്തരവ് സംസ്ഥാന വ്യാപകമായി സമാനമായ വ്യവഹാരങ്ങള്ക്ക് വഴി വയ്ക്കുമെന്ന ആശങ്കയും സര്ക്കാര് കോടതിയെ അറിയിച്ചു.
സാമൂഹികാഘാത സര്വേ നിര്ത്തി വയ്ക്കുന്നത് പദ്ധതി വൈകാന് കാരണമാകും. ഇത് പദ്ധതി ചെലവ് ഉയരാന് ഇടയാക്കും. പദ്ധതിയുടെ ഡിപിആര് തയാറാക്കിയത് വിശദീകരിക്കണമെന്ന ഹൈക്കോടതി സിംഗിള് ബഞ്ച് ഉത്തരവിലെ നിര്ദേശം ഒഴിവാക്കണമെന്നും അപ്പീലില് സര്ക്കാര് ആവശ്യപ്പെട്ടു.
ഡിപിആര് സംബന്ധിച്ച സിംഗിള് ബഞ്ച് പരാമർശങ്ങള് ഹർജിയുടെ പരിഗണനാ പരിധി മറികടന്നാണെന്നും സർക്കാർ പറയുന്നു. ഈ സാഹചര്യത്തില് ഡിപിആര് നടപടികള് വിശദീകരിക്കണമെന്ന ഉത്തരവ് പാലിക്കാന് നിർബന്ധിക്കരുതെന്നും അപ്പീലില് ആവശ്യപ്പെട്ടിട്ടുണ്ട്.
