അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പ്രമുഖ ആശുപത്രികളുടെ ഒ.പി അപ്പോയിന്റ്മെന്റുകള്ക്കായും കോണ്ടാക്റ്റ് വിവരങ്ങള്ക്കുമായി ഗൂഗിളില് തിരയുന്നവരെ ലക്ഷ്യമിട്ട് വ്യാജ എ.പി.കെ ആപ്ലിക്കേഷനുകള് ഉപയോഗിച്ച് സാമ്പത്തിക തട്ടിപ്പ് നടത്തുന്നതിനെതിരെ പൊതുജനങ്ങള് ജാഗ്രത പാലിക്കണണെന്ന് പോലീസ്. ഗൂഗിള് സെര്ച്ചില് കാണുന്ന വ്യാജ ഫോണ് നമ്പറുകളില് ബന്ധപ്പെടുമ്പോള്, ആശുപത്രി ജീവനക്കാരാണെന്ന് തെറ്റിദ്ധരിപ്പിച്ച് തട്ടിപ്പുകാര് വാട്സ്ആപ്പ് വഴി ‘ഹോസ്പിറ്റല് അപ്പോയ്ന്റ്മെന്റ് ബുക്കിംഗ് ‘ എന്ന പേരിലോ സമാനമായോ ഉള്ള വ്യാജ ആന്ഡ്രോയിഡ് ആപ്ലിക്കേഷന് (എ.പി.കെ) ഫയലുകള് അയച്ചുകൊടുക്കുന്നു.
ഇത് ഇന്സ്റ്റാള് ചെയ്യുന്നതോടെ ഉപയോക്താവിന്റെ ഫോണ് ഹാക്ക് ചെയ്യപ്പെടുകയും രഹസ്യവിവരങ്ങള്, ഒ.ടി.പി, യു.പി.ഐ സേവനങ്ങള് എന്നിവ ചോര്ന്ന് അനധികൃത സാമ്പത്തിക ഇടപാടുകള് നടക്കുകയും ചെയ്യുന്നു. ഫോണിലുള്ള ഫോണ് പേ, ഗൂഗിള് പേ, തുടങ്ങിയ യു.പി.ഐ ആപ്പുകള് തെറ്റായി ദുരുപയോഗം ചെയ്യപ്പെടാനും, ഉപയോക്താവ് അറിയാതെ മറ്റ് പേയ്മെന്റ് ആപ്പുകള് ഇന്സ്റ്റാള് ചെയ്യപ്പെടാനും സാധ്യതയുണ്ട്. പ്രത്യേകിച്ചും യു.പി.ഐ ലൈറ്റ് സജീവമാക്കിയിട്ടുള്ള ഫോണുകളില്, പരിധിക്കുള്ളിലുള്ള ചെറിയ തുകകളുടെ കൈമാറ്റത്തിന് പ്രത്യേക ഒ.ടി.പി ആവശ്യമായി വരാറില്ല.
അതിനാല് 1,000 രൂപയില് താഴെയുള്ള ചെറിയ തുകകളുടെ തുടര്ച്ചയായ വ്യാജ ഇടപാടുകള് ശ്രദ്ധയില്പ്പെട്ടാല് ചെറിയ തുകയാണെന്നു കരുതി അവഗണിക്കരുതെന്നും പോലീസ് വ്യക്തമാക്കുന്നു. ഇത്തരം തട്ടിപ്പുകളില് പെടാതിരിക്കാന് ഗൂഗിള് സെര്ച്ചില് കാണുന്ന നമ്പറുകള് സ്ഥാപനങ്ങളുടെ ഔദ്യോഗിക വെബ്സൈറ്റ് വഴിയോ വെരിഫൈഡ് സോഷ്യല് മീഡിയ പേജുകള് വഴിയോ മാത്രം സ്ഥിരീകരിക്കുക. അപ്പോയിന്റ്മെന്റ് ബുക്കിംഗ്, കെ.വൈ.സി, റീഫണ്ട് തുടങ്ങിയ ആവശ്യങ്ങള്ക്കായി വാട്സ്ആപ്പ് വഴി ലഭിക്കുന്ന എ.പി.കെ ഫയലുകള് യാതൊരു കാരണവശാലും ഇന്സ്റ്റാള് ചെയ്യരുത്.
ആപ്പുകള് ഗൂഗിള് പ്ലേ സ്റ്റോര് പോലുള്ള വിശ്വസനീയ കേന്ദ്രങ്ങളില് നിന്ന് മാത്രം ഇന്സ്റ്റാള് ചെയ്യുകയും അപരിചിതമായ ആപ്പുകള്ക്ക് എസ്.എം.എസ്, നോട്ടിഫിക്കേഷന്സ്, കോണ്ടാക്റ്റ്സ് , ഫോണ് തുടങ്ങിയ അനുമതികള് നല്കാതിരിക്കുക. വ്യാജ എ.പി.കെ ഇന്സ്റ്റാള് ചെയ്തതായി സംശയം തോന്നിയാല് ഉടന് ഇന്റര്നെറ്റ് വിച്ഛേദിച്ച് ബാങ്കുമായോ യു.പി.ഐ സര്വീസ് പ്രൊവൈഡറുമായോ ബന്ധപ്പെട്ട് അക്കൗണ്ട് സുരക്ഷിതമാക്കുക. സാമ്പത്തിക തട്ടിപ്പിനിരയായാല് ഉടന് തന്നെ 1930 എന്ന സൈബര് ഹെല്പ്പ്ലൈന് നമ്പറിലോ www.cybercrime.gov.in എന്ന ദേശിയ സൈബര് ക്രൈം റിപ്പോര്ട്ടിങ് പോര്ട്ടലിലോ പരാതി നല്കുക.
