അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.തിരുവനന്തപുരം: അപ്പൂപ്പൻ താടിപോലെ ദിവസം മുഴുവൻ പാറിപ്പറന്നുനടന്ന് കാഴ്ചകൾ കണ്ട് വരച്ച് സമ്മാനം നേടാൻ കുട്ടികൾക്ക് കോവളം വെള്ളാർ കേരള ആർട്ട്സ് ആൻഡ് ക്രാഫ്റ്റ്സ് വില്ലേജ് അവസരം ഒരുക്കുന്നു. ശിശുദിനമായ നവംബർ 14-ന് നടത്തുന്ന മത്സരത്തിനു പേരും ‘അപ്പൂപ്പൻതാടി’ എന്നുതന്നെ. വിജയികളെ കാത്തിരിക്കുന്നത് ഒരു ലക്ഷം രൂപയുടെ സമ്മാനങ്ങളാണ്.
അപ്പർ പ്രൈമറി, ഹൈസ്കൂൾ, ഹയർ സെക്കൻഡറി എന്നു മൂന്നു വിഭാഗങ്ങളിലായാണു മത്സരം. ഓരോ വിഭാഗത്തിലും ഒന്നാം സമ്മാനം 10,000 രൂപയും രണ്ടാം സമ്മാനം 5,000 രൂപയും മൂന്നാം സമ്മാനം 2,500 രൂപയുമാണ്. കൂടാതെ ഓരോ വിഭാഗങ്ങളിലും പത്തു വീതം പ്രോത്സാഹനസമ്മാനങ്ങളും ഉണ്ട്.
നവംബർ 14ന് രാവിലെ 11 മുതൽ 4 വരെയാണ് മത്സരം. അതിനുമുമ്പ് എത്തി ഹാജർ രേഖപ്പെടുത്തണം. ക്യാമ്പസ് ചുറ്റിനടന്നു കാണാം. ആ കാഴ്ചകളാണ് ചിത്രങ്ങളിൽ പകർത്തേണ്ടത്. വാട്ടർകളറോ അക്രിലിക് കളറോ ഉപയോഗിക്കാം. അതു കുട്ടികൾ കൊണ്ടുവരണം. വരയ്ക്കാനുള്ള ആർട്ട് പേപ്പർ ക്രാഫ്റ്റ് വില്ലേജ് നല്കും. കോവിഡ് ഓഡിറ്റ് നടത്തി മുൻകരുതലുകൾ നടപ്പാക്കിയ രാജ്യത്തെ ആദ്യ കോവിഡ്‌മുക്ത ക്യാമ്പസായതിനാൽ ക്രാഫ്റ്റ് വില്ലേജിന്റെ പ്രോട്ടോക്കോളുകൾ പൂർണ്ണമായും പാലിക്കേണ്ടതാണ്.
പങ്കെടുക്കേണ്ടവർ മുൻകൂറായി രജിസ്റ്റർ ചെയ്യണം. പ്രവേശനഫീസ് 100 രൂപയാണ്. ഇത് ഓൺലൈനായി അടയ്ക്കാം. മത്സരത്തിൽ പങ്കെടുക്കുന്ന കുട്ടികൾക്കു ചായയും ലഘുഭക്ഷണവും സംഘാടകർ നൽകും. പുറത്തുനിന്നു കൊണ്ടുവരുന്ന ഭക്ഷണം ക്രാഫ്റ്റ് വില്ലേജ് വളപ്പിൽ അനുവദനീയമല്ല. അതിനാൽ മറ്റു ഭക്ഷണപാനീയങ്ങളുടെ ചെലവ് കുട്ടികളോ ഒപ്പമുള്ളവരോ വഹിക്കണം.
കൂടുതൽ വിവരങ്ങൾക്കും രജിസ്ട്രേഷനും 9288001155, 9288001198 എന്നീ നമ്പരുകളിൽ വിളിക്കുകയോ kacvkovalam.com/shop/appoppan-thaadi എന്ന വെബ് പേജ് സന്ദർശിക്കുകയോ ചെയ്യാം.
