ജോജു ജോര്‍ജ് സ്ത്രീകളോടും അപമര്യാദയായി പെരുമാറി; സംസാരിച്ചത് സഭ്യമല്ലാത്ത രീതിയില്‍: കൊടിക്കുന്നില്‍ സുരേഷ്

കൊച്ചി: ഇന്ധനവില വർധനക്കെതിരെ കൊച്ചിയിൽ കോണ്‍ഗ്രസ് പ്രവര്‍ത്തകര്‍ നടത്തിയ പ്രതിഷേധം സംഘര്‍ഷത്തില്‍ കലാശിച്ചതില്‍ പ്രതികരണവുമായി കെപിസിസി വര്‍ക്കിങ് പ്രസിഡന്റ് കൊടിക്കുന്നില്‍ സുരേഷ് എംപി. സഭ്യമല്ലാത്ത ഭാഷയിലാണ് ജോജു ജോര്‍ജ് സംസാരിച്ചതെന്നും സ്ത്രീകളോട് അപമര്യാദയായാണ് പെരുമാറിയതെന്നും കൊടിക്കുന്നില്‍ സുരേഷ് പറഞ്ഞു.

മാര്‍ക്‌സിസ്റ്റ് പാര്‍ട്ടിയുടെയോ ബിജെപിയുടെയോ പ്രതിഷേധ പരിപാടിയാണ് അവിടെ നടന്നതെങ്കില്‍ ജോജുവിനെ ആംബുലന്‍സില്‍ കൊണ്ടുപോവേണ്ടി വന്നേനെ. എന്നാല്‍ ഞങ്ങള്‍ മാന്യമായാണ് ഇടപെട്ടത്. സഭ്യമല്ലാത്ത ഭാഷയില്‍ പെരുമാറിയ ജോജു സമരത്തില്‍ പങ്കെടുത്ത സ്ത്രീകളോടും അപമര്യാദയായാണ് പെരുമാറിയത്.

അടിക്കടി ഇന്ധനവില വര്‍ധിപ്പിച്ച് നരേന്ദ്രമോദി സര്‍ക്കാര്‍ ജനജീവിതം ദുസ്സഹമാക്കുകയാണ്. പാര്‍ലമെന്റിലും രാജ്ഭവനുമുന്നിലും ഞങ്ങള്‍ നിരന്തരം പ്രതിഷേധിച്ചു. കേന്ദ്രസര്‍ക്കാരിൻ്റെ ഈ നീക്കങ്ങള്‍ക്കെതിരെ ഞങ്ങള്‍ പ്രതികരിച്ചില്ലെങ്കില്‍ ഇവിടെയൊരു പ്രതിപക്ഷമില്ലന്ന് മാധ്യമങ്ങളടക്കം കുറ്റപ്പെടുത്തും.

പോലീസില്‍ അറിയിച്ച് മുന്‍കൂട്ടി അനുമതി വാങ്ങിയാണ് സമരം നടത്തിയത്. മിക്കവാറും എല്ലാ ജനങ്ങളും അതില്‍ സഹകരിച്ചു. വാഹനം സ്തംഭിപ്പിച്ച് സമരം നടക്കുമെന്ന് വാര്‍ത്തകളും നല്‍കിയിരുന്നു. ജോജുവിന് അത്രയും അത്യാവശ്യ കാര്യത്തിന് പോകണമായിരുന്നെങ്കില്‍ മറ്റ് മാര്‍ഗം നോക്കണമായിരുന്നു. അല്ലെങ്കില്‍ പോലീസ് യാത്രക്കാരെ മറ്റ് വഴികളിലൂടെ തിരിച്ചുവിടണമായിരുന്നു എന്ന് കൊടിക്കുന്നില്‍ സുരേഷ് എംപി പറഞ്ഞു.

അതേസമയം ഒരു വനിതാ പ്രവർത്തകയെയും താൻ അപമാനിച്ചിട്ടില്ലെന്ന് നടൻ ജോജു ജോർജ് പറഞ്ഞു. ഈ അവസരത്തിൽ എന്നല്ല ഒരവസരത്തിലും സ്ത്രീകളോട് മോശമായി പെരുമാറില്ല. എനിക്ക് അവരുടെ വില അറിയാം. മദ്യപിച്ചിട്ടില്ലെന്ന് തെളിയിക്കും. എങ്കിലല്ലേ ഞാൻ പറയുന്നതിന് വില വരൂവെന്നും താരം മാധ്യമങ്ങളോട് പറഞ്ഞു. മദ്യപിച്ചാണ് താൻ ബഹളമുണ്ടാക്കിയതെന്ന എറണാകുളം ഡിസിസി പ്രസിഡന്റിൻ്റെ വാദം തെറ്റാണ്. അഞ്ചു വർഷമായി മദ്യപാനം നിർത്തിയിട്ട്. ചെയ്തതിൽ തെറ്റില്ലെന്നും ആരോടും മാപ്പ് പറയില്ലെന്നും ജോജു കൂട്ടിച്ചേർത്തു. 

============================================================================

വാര്‍ത്തകള്‍ യഥാസമയം അറിയാന്‍…

Join Anweshanam WhatsApp Group: https://chat.whatsapp.com/JHLCbFc9MhbCtdPC6grlJ9 Subscribe Anweshanam Youtube: https://youtube.com/c/Anweshanamlive Follow Anweshanam Google News: https://rb.gy/0tbxgdagain/cid4795157.htm Follow Anweshanam Dailyhunt: https://m.dailyhunt.in/news/india/malayalam/anweshanam-epaper-anwe