അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കൊച്ചി: സിപിഎമ്മില്‍ അച്ചടക്ക നടപടി നേരിട്ട കൊച്ചി മുന്‍ ഡെപ്യൂട്ടി മേയര്‍ സി കെ മണിശങ്കറിനെ സിഐടിയു ജില്ലാ സെക്രട്ടറി സ്ഥാനത്തു നിന്നും മാറ്റി. മണിശങ്കറെ മാറ്റാനുള്ള തീരുമാനം സിപിഎം എടുത്തിരുന്നു ഇതിൻ്റെ അടിസ്ഥാനത്തില്‍ സിഐടിയു ജില്ലാ കമ്മിറ്റിയിലെ പാര്‍ട്ടി ഫ്രാക്ഷന്‍ ചേര്‍ന്ന് ഇതിന് അംഗീകാരം നല്‍കുകയായിരുന്നു.
മണിശങ്കറിന് പകരം സിപിഎം ജില്ലാ സെക്രട്ടേറിയറ്റ് അംഗം പി ആര്‍ മുരളീധരനെ സിഐടിയു ജില്ലാ സെക്രട്ടറിയാക്കി. നിലവില്‍ സിഐടിയു ജില്ലാ പ്രസിഡന്റ് ആയിരുന്നു മുരളീധരന്‍. സിപിഎം ജില്ലാ സെക്രട്ടേറിയറ്റ് അംഗമായ ജോണ്‍ ഫെര്‍ണാണ്ടസിനെ സിഐടിയു ജില്ലാ പ്രസിഡന്റ് ആക്കാനും തീരുമാനിച്ചിട്ടുണ്ട്.
നിയമസഭ തെരഞ്ഞെടുപ്പുമായി ബന്ധപ്പെട്ട പരാതികളെ തുടര്‍ന്ന് അന്വേഷണ കമ്മീഷൻ്റെ റിപ്പോര്‍ട്ടിൻ്റെ അടിസ്ഥാനത്തിലാണ് മണിശങ്കറെ ഒരു വര്‍ഷത്തേക്ക് സിപിഎമ്മില്‍ നിന്നും സസ്‌പെന്‍ഡ് ചെയ്തത്. നടപടി നേരിട്ടയാള്‍ സിഐടിയു ജില്ലാ സെക്രട്ടറി സ്ഥാനത്ത് തുടരുന്നതില്‍ അനൗചിത്യം ഉണ്ടെന്ന വാദം ഉയര്‍ന്നു.
ഇതിനെ തുടർന്ന് എല്ലാ സ്ഥാനങ്ങളില്‍ നിന്നും ഒഴിവാക്കണമെന്ന് സി കെ മണിശങ്കര്‍ ജില്ലാ സെക്രട്ടറി സിഎന്‍ മോഹനനും സിഐടിയു സംസ്ഥാന ജനറല്‍ സെക്രട്ടറി എളമരം കരീമിനും കത്തു നല്‍കിയിരുന്നു. സി കെ മണിശങ്കര്‍ നിലവില്‍ ചുമട്ടു തൊഴിലാളി ക്ഷേമനിധി ബോര്‍ഡ് ചെയര്‍മാനാണ്. പാര്‍ട്ടി നടപടിക്ക് മുമ്പായിരുന്നു സര്‍ക്കാര്‍ മണിശങ്കറെ നിയമിച്ചത്.
