അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.വിമാനത്താവളത്തിൽ ബോളിവുഡ് താരം സല്മാന് ഖാനെ തടഞ്ഞ് സുരക്ഷാ ഉദ്യോഗസ്ഥര്. മുംബൈ വിമാത്താവളത്തിലാണ് സംഭവം. വിമാനത്തിലേക്ക് കയറുകയായിരുന്ന സല്മാനെ ഉദ്യോഗസ്ഥര് സുരക്ഷാ പരിശോധനയ്ക്കായി തടയുകയായിരുന്നു. ഇതിന്റെ വിഡിയോ സോഷ്യല് മീഡിയയില് വൈറലാവുകയാണ്. പുതിയ ചിത്രം ടൈഗര് 3 ന്റെ ഷൂട്ടിങ്ങിനായി റഷ്യയിലേക്കുള്ള യാത്രയിലായിരുന്നു താരം. കത്രീന കൈഫും സല്മാനൊപ്പമുണ്ടായിരുന്നു.
വിമാനത്താവളത്തില് എത്തിയ താരത്തെ ഫോട്ടോഗ്രാഫര്മാരും ആരാധകരും ചേര്ന്നാണ് സ്വീകരിച്ചത്. സുരക്ഷാ പരിശോധനകള്ക്ക് വിധേയനാകാതെ മുഖത്തെ മാസ്ക് മാറ്റി അകത്തേക്ക് പ്രവേശിക്കാന് ശ്രമിക്കുകയായിരുന്നു. എന്നാല് സുരക്ഷാ ഉദ്യോഗസ്ഥന് താരത്തെ തടഞ്ഞു നിര്ത്തി സുരക്ഷാ പരിശോധനയ്ക്ക് വിധേയനാകാന് ആവശ്യപ്പെടുന്നതാണ് വിഡിയോയിലുള്ളത്.
വിഡിയോ പുറത്തുവന്നതിനു പിന്നാലെ സുരക്ഷാ ഉദ്യോഗസ്ഥനെ പ്രശംസിച്ചുകൊണ്ട് നിരവധി പേരാണ് രംഗത്തെത്തുന്നത്. ഇത്തരത്തില് മുഖം നോക്കാതെ വേണം നടപടി സ്വീകരിക്കാന് എന്നും അവര് പറയുന്നുണ്ട്.
