അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ആദ്യഘട്ട പ്രഖ്യാപനങ്ങളിലൂടെ തന്നെ ഇന്ത്യൻ ഇരുചക്രവാഹന വിപണിയുടെ ശ്രദ്ധയാകർഷിച്ചിരിക്കുകയാണ് പുത്തൻ നിർമാതാക്കളായ ഓല ഇലക്ട്രിക്. റൈഡ് ഹെയ്‌ലിങ് കമ്പനിയായി പ്രവർത്തനം തുടങ്ങി ഇരുചക്രവാഹന നിർമാണത്തിലേക്കു ചുവടുമാറ്റിയ ഓലയുടെ ആദ്യ വൈദ്യുത സ്കൂട്ടർ അരങ്ങേറ്റത്തിനു മുമ്പേ വാർത്തകളിൽ ഇടം പിടിച്ചിരിക്കുകയാണ്. ബാറ്ററിയിൽ ഓടുന്ന സ്കൂട്ടറിന്റെ വർണവൈവിധ്യമാണ് ഓലയുടെ സീരീസ് എസിനെ ഇപ്പോൾ ശ്രദ്ധാകേന്ദ്രമാക്കുന്നത്. 10 നിറങ്ങളിലാവും ഓലയുടെ ഇ സ്കൂട്ടർ വിൽപനയ്ക്കെത്തുക.
പരമ്പരാഗത വർണങ്ങളായ കറുപ്പിനും വെളുപ്പിനും നീലയ്ക്കും ചുവപ്പിനുമൊക്കെയപ്പുറത്ത് പുത്തൻ നിറക്കൂട്ടുകൾ അവതരിപ്പിച്ച് പ്രായഭേദമന്യെ ഏവരുടെയും മനംകവരാനാവുമെന്നാണ് ഓലയുടെ കണക്കുകൂട്ടൽ. സ്കൈ ബ്ലൂ, നേവി ബ്ലൂ, പിങ്ക്, ഗ്രേ തുടങ്ങിയ നിറങ്ങളിലെല്ലാം ഓലയുടെ ഇ സ്കൂട്ടർ വിൽപനയ്ക്കുണ്ടാവും. ലാളിത്യം തുളുമ്പുന്നതും വേറിട്ടു നിൽക്കുന്നതുമായ രൂപകൽപനാ ശൈലി സമ്മാനിക്കുന്ന കാഴ്ചപ്പകിട്ടിനൊപ്പം എൽ ഇ ഡി ലൈറ്റിങ് പാക്കേജും വർണവൈവിധ്യവുമൊക്കെ ചേരുന്നതോടെ വൈദ്യുത ഇരുചക്രവാഹന വിപണിയിൽ തരംഗമാവാൻ സീരീസ് എസിനു സാധിക്കുമെന്ന പ്രതീക്ഷയിലാണ് ഓല ഇലക്ട്രിക്.
അരങ്ങേറ്റത്തിനു മുന്നോടിയായി ബുക്കിങ് സ്വീകരിച്ചു തുടങ്ങിയതോടെ തകർപ്പൻ വരവേൽപ്പാണ് ഇ സ്കൂട്ടറിനു ലഭിച്ചതെന്നാണ് നിർമാതാക്കൾ പറയുന്നത്. കമ്പനി വെബ്സൈറ്റിൽ 499 രൂപ അഡ്വാൻസ് നൽകി സ്കൂട്ടർ റിസർവ് ചെയ്യാനാണ് അവസരം. ബുക്കിങ് ആരംഭിച്ച് 24 മണിക്കൂറിനകം തന്നെ ബുക്കിങ്ങുകൾ ഒരു ലക്ഷം യൂണിറ്റ് പിന്നിട്ടതായും ഓല പ്രഖ്യാപിച്ചിരുന്നു. 1.20 ലക്ഷം മുതൽ 1.40 ലക്ഷം രൂപ വരെയാണ് ഓലയുടെ സീരീസ് എസിനു പ്രതീക്ഷിക്കുന്ന വില. ഏറ്റവും അധികം സംഭരണ സ്ഥലം, താക്കോലിനു പകരം മൊബൈൽ ആപ്ലിക്കേഷൻ, ഒറ്റ ചാർജിൽ ഈ വിഭാഗത്തിലെ തന്നെ ഏറ്റവും ഉയർന്ന സഞ്ചാര പരിധി(റേഞ്ച്) എന്നിവയൊക്കെയാണു പുതിയ സ്കൂട്ടറിൽ ഓല വാഗ്ദാനം ചെയ്യുന്നത്. പൂർണ എൽ ഇ ഡി ലൈറ്റിങ്, ഫാസ്റ്റ് ചാർജിങ് സൗകര്യം, മുന്നിൽ ഡിസ്ക് ബ്രേക്ക് തുടങ്ങിയവയും സ്കൂട്ടറിലുണ്ടാവും.
അതിവേഗം ചാർജ് ചെയ്യാവുന്ന ബാറ്ററിയാണു സ്കൂട്ടറിലെ മറ്റൊരു സവിശേഷത; വെറും 18 മിനിറ്റിൽ ബാറ്ററി പകുതിയോളം ചാർജ് ആവുമെന്നാണ് ഓലയുടെ വാഗ്ദാനം. പാതി ചാർജിൽ തന്നെ 75 കിലോമീറ്റർ ഓടാനും സ്കൂട്ടറിനാവും. അവകാശവാദങ്ങൾ സത്യമെങ്കിൽ ഇ സ്കൂട്ടറുകളുടെ ഇന്ധനക്ഷമതയായ റേഞ്ചിൽ പിൻബലത്തിൽ തന്നെ ഓലയുടെ സീരീസ് എസ്, എതിരാളികളെ പിന്തള്ളുമെന്ന് ഉറപ്പാണ്.
