അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ആലത്തൂര്: രമ്യാ ഹരിദാസ് എംപിക്കു എതിരായ സിപിഎം വധഭീക്ഷണിയില് രണ്ടുപേര്ക്കെതിരെ കേസെടുത്തു. മുന് പഞ്ചായത്ത് പ്രസിഡന്റ് നാസര്, നജീബ് എന്നിവര്ക്കെതിരെയാണ് കേസെടുത്തത്.
ഞായറാഴ്ച ഉച്ചക്ക് ശേഷം ആലത്തൂര് പൊലീസ് സ്റ്റേഷന് സമീപത്ത് വച്ചായിരുന്നു രമ്യയെ സി.പി.എം പ്രവര്ത്തകര് ഭീഷണിപ്പെടുത്തിയത്. ഇതുമായി ബന്ധപ്പെട്ട് എട്ടോളം പേര്ക്കെതിരെ എം.പി പൊലീസില് പരാതി നല്കിയിട്ടുണ്ട്.
സംഭവത്തില് പ്രതികരണവുമായി പ്രതിപക്ഷ നേതാവ് വി.ഡി. സതീശന് രംഗത്തെത്തി. രമ്യാ ഹരിദാസിനെ വഴിയില് തടഞ്ഞു നിര്ത്തി കൊല്ലുമെന്ന് ഭീഷണിപ്പെടുത്തിയത് ഞെട്ടിക്കുന്ന സംഭവമാണ്. അധികാരം വീണ്ടും കിട്ടിയതിന്റെ അഹങ്കാരത്തില് ഒരു ജനപ്രതിനിധിയെ അപമാനിക്കുന്നത് അനുവദിക്കാനാവില്ലെന്നും അദ്ദേഹം ഫേസ്ബുക്കില് കുറിച്ചു.
നിയമസഭാ തിരഞ്ഞെടുപ്പുകാലത്ത് രമ്യാഹരിദാസിനെ ജാതിപ്പേരു വിളിച്ച് അപമാനിച്ചവരെ പോലീസ് ഇതുവരെ അറസ്റ്റ് ചെയ്തിട്ടില്ല. ഇത്തരം ധിക്കാരപരമായ നടപടികള് യു.ഡി.എഫ് കെെയും കെട്ടി നോക്കിയിരിക്കില്ലെന്നും സതീശന് പറയുന്നു.
ആലത്തൂരിലൂടെ വാഹനത്തില് പോകുകയായിരുന്ന രമ്യ പൊലീസ് സ്റ്റേഷന് സമീപത്തുവച്ച് ഹരിതകര്മ്മസേനാ പ്രവര്ത്തകരുമായി സംസാരിച്ചു. അതിനുശേഷം വാഹനത്തിലേക്ക് കയറുന്ന സമയത്താണ് ആലത്തൂര് മുന് പഞ്ചായത്ത് പ്രസിഡന്റ് നാസര് ഉള്പ്പെടെയുള്ള സി.പി.എമ്മുകാര് തന്നെ തടയാനെത്തിയത്. മുന് പഞ്ചായത്ത് പ്രസിഡന്റും സംഘവും തന്നോട് മോശമായി സംസാരിച്ചെന്നും എം.പി പറയുന്നു.
