അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ന്യൂ ഡൽഹി: ഇന്ത്യൻ നിരത്തുകളിൽ ഇലക്ട്രിക് വാഹനങ്ങൾ പ്രോത്സാഹിപ്പിക്കുന്നതിനുള്ള നീക്കങ്ങൾ കേന്ദ്ര ഉപരിതല ഗതാഗത മന്ത്രാലയം ശക്തമാക്കുകയാണ്. ജനങ്ങൾ പരമ്പരാഗത ഇന്ധനങ്ങളിലുള്ള വാഹനങ്ങൾക്ക് പകരം ഇലക്ട്രിക് വാഹനങ്ങളിലേക്ക് മാറാൻ കേന്ദ്ര ഗതാഗത മന്ത്രി നിതിൻ ഗഡ്കരി നിർദേശിച്ചിട്ടുമുണ്ട്. ഇതിനുപിന്നാലെ ഇ-വാഹനങ്ങൾ പ്രോത്സാഹിപ്പിക്കാൻ പുതിയ നീക്കവുമായി എത്തുകയാണ് അദ്ദേഹം.
സർക്കാർ മേഖലയിൽ ജോലി ചെയ്യുന്ന ജീവനക്കാർക്ക് ഇലക്ട്രിക് വാഹനം നിർബന്ധമാക്കുമെന്നാണ് മന്ത്രി അറിയിച്ചിരിക്കുന്നത്. ഇതിന്റെ ആദ്യ ചുവടുവയ്പ്പ് എന്നോണം ഗതാഗത വകുപ്പിലെ ജീവനക്കാർക്ക് ഇലക്ട്രിക് വാഹനം നിർബന്ധമാക്കുമെന്നും അദ്ദേഹം അഭിപ്രായപ്പെട്ടതായി വാർത്ത ഏജൻസി റിപ്പോർട്ട് ചെയ്തു. ഇ-വാഹനങ്ങൾക്കായി സബ്സിഡി ഉൾപ്പെടെ സർക്കാർ നൽകുന്നുണ്ട്.
രാജ്യത്ത് ഇലക്ട്രിക് മൊബിലിറ്റി പ്രോത്സാഹിപ്പിക്കുന്നതും ചാർജിങ്ങ് സംവിധാനം ഒരുക്കുന്നതിനും ജനങ്ങളെ ബോധവത്കരിക്കുന്നതിനായി നടത്തിയ ഗോ ഇലക്ട്രിക് ക്യാമ്പയിന്റെ ഭാഗമായാണ് അദ്ദേഹം ഈ നിർദേശം മുന്നോട്ട് വെച്ചത്. അന്തരീക്ഷ മലിനീകരണം ഉൾപ്പെടെ കുറയ്ക്കുന്നതിനായി മറ്റ് മേഖലകളിലും ഇലക്ട്രിക് പവർ ഉപയോഗപ്പെടുത്തുന്നത് സംബന്ധിച്ചും അദ്ദേഹം അഭിപ്രായപ്പെട്ടു.
രാജ്യതലസ്ഥാനമായ ഡൽഹിയിൽ മാത്രം 10,000 ഇലക്ട്രിക് വാഹനങ്ങൾ ഉപയോഗിച്ചാൽ പ്രതിമാസം ഇന്ധനത്തിനായി ചെലവഴിക്കുന്ന 30 കോടി രൂപ ലാഭിക്കാൻ സാധിക്കും. ഇതിനുപുറമെ, അന്തരീക്ഷ മലിനീകരണത്തിലും കാര്യമായ കുറവുണ്ടാകുമെന്നും അദ്ദേഹം പറഞ്ഞു. അതുകൊണ്ട് തന്നെ എന്റെ ഓഫീസിലെ ജീവനക്കാർക്ക് ഇലക്ട്രിക് വാഹനങ്ങൾ നിർബന്ധമാക്കുമെന്നും അദ്ദേഹം കൂട്ടിച്ചേർത്തു.
ഫോസിൽ ഇന്ധനങ്ങൾക്ക് ശക്തമായ ബദലാകാൻ സാധിക്കുന്നത് ഇലക്ട്രിക്കിന് മാത്രമാണ്. പരമ്പരാഗത ഇന്ധനങ്ങളെക്കാൾ ചെലവും മലിനീകരണവും വൈദ്യതിക്ക് കുറവാണ്. ഊർജ മന്ത്രിയുടെ വകുപ്പിലും ഇലക്ട്രിക് വാഹനങ്ങൾ നിർബന്ധമാക്കാനുള്ള നടപടി സ്വീകരിക്കണമെന്ന് നിർദേശിക്കുമെന്നും മന്ത്രി നിതിൻ ഗഡ്കരി അറിയിച്ചു.
