അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.തമിഴിലെ പേരുകേട്ട രണ്ടു ഇതിഹാസ താരങ്ങളാണ് കമൽഹാസനും സൂപ്പർസ്റ്റാർ രജനികാന്തും. ഈ രണ്ടു താരങ്ങളും ചേർന്ന് തമിഴ് സിനിമയിൽ വലിയൊരു തരംഗം തന്നെയാണ് സൃഷ്ടിച്ചത്. അവർക്കൊപ്പം തന്നെ നിരവധി മികച്ച നടന്മാരെ സിനിമയിലേക്ക് എത്തിക്കാൻ തമിഴ് സിനിമ വ്യവസായത്തിന് കഴിഞ്ഞിട്ടുണ്ട്. അത്തരത്തിൽ തൊണ്ണൂറുകളുടെ മധ്യത്തിൽ തമിഴ് സിനിമയിൽ ഉയർന്നുവന്ന രണ്ടു വ്യക്തികളാണ് നടനും രാഷ്ട്രീയക്കാരനുമായ ജോസഫ് വിജയും സൂപ്പർസ്റ്റാർ അജിത് കുമാറും.
ഇന്നും തിയറ്ററുകളിൽ വലിയ കോളിളക്കം സൃഷ്ടിക്കാൻ സാധിക്കുന്ന ചുരുക്കം ചില നടന്മാരിൽ രണ്ടുപേരാണ് അജിത്തും വിജയും. ഇരുവരുടെയും ചിത്രങ്ങൾ തിയറ്ററുകളിൽ ഒരുപോലെ റിലീസിന് എത്തുമ്പോൾ ഏറ്റവും മികച്ച സിനിമ ആരുടെയാണെന്നത് തീരുമാനിക്കുന്നത് ആരാധകരായിരുന്നു. ഇപ്പോഴിതാ ‘ബീസ്റ്റ്’ എന്ന ചിത്രത്തിലെ ‘അറബി കുത്ത്’ ഗാനത്തിന് ചുവടുവെയ്ക്കുന്ന തലയുടെയും ദളപതിയുടെയും ഒരു എഐ വീഡിയോ ആണ് സമൂഹമാധ്യമങ്ങളിൽ വൈറലാകുന്നത്. ഇരുവരുടെയും ആരാധകൻ തന്നെയാണ് ഇത്തരത്തിലൊരു എഐ വീഡിയോ സമൂഹമാധ്യമങ്ങളിൽ പങ്കുവെച്ചത്.
Thala Thalapathy Dance 💥🥳🥳 pic.twitter.com/D9dNbx5y4d
— Karthik Ravivarma (@Karthikravivarm) April 27, 2024
സൂപ്പർ താരങ്ങളായ വിജയ്‌യും അജിത് കുമാറും വീണ്ടും ഒന്നിക്കുന്നത് ബിഗ് സ്‌ക്രീനിൽ കാണാൻ തമിഴ് സിനിമാ ആരാധകർ ഏറെ നാളായി കാത്തിരിക്കുകയായിരുന്നു. 1995-ലെ രാജാവിൻ പാർവയിലെ എന്ന ചിത്രത്തിലാണ് ഇരുവരും ആദ്യമായി ഒരുമിച്ചു അഭിനയിക്കുന്നത്. വിജയ് രാഷ്‌ടീയത്തിലേയ്ക്ക് കടക്കുന്നതിനു മുൻപ് ഇരുവരെയും ഒരുമിച്ച് കാണാനുള്ള തമിഴ് സിനിമ ആരാധകരുടെ ആഗ്രഹമാണ് ഈ വീഡിയോയിലൂടെ പൂവണിഞ്ഞത്.
നിലവിൽ, വെങ്കട് പ്രഭു സംവിധാനം ചെയ്യുന്ന ആരാധകർ ഏറെ പ്രതീക്ഷയോടെ കാത്തിരിക്കുന്ന സയൻസ് ഫിക്ഷൻ ചിത്രമായ ഗോട്ടിന്റെ ചിത്രീകരണത്തിലാണ് വിജയ് ഇപ്പോൾ. മോഹൻ, പ്രശാന്ത്, പ്രഭുദേവ, സ്നേഹ, ലൈല, ജയറാം, മീനാക്ഷി ചൗധരി, യോഗി ബാബു തുടങ്ങിയ വൻ താരനിരയാണ് ചിത്രത്തിൽ വിജയ്‌ക്കൊപ്പം അഭിനയിക്കുന്നത്. യുവൻ ശങ്കർ രാജയാണ് ചിത്രത്തിന് സംഗീതം ഒരുക്കുന്നത്. ഛായാഗ്രഹണം സിദ്ധാർത്ഥ നുനിയും എഡിറ്റിംഗ് ചുമതല വെങ്കട്ട് രാജനും നിർവ്വഹിക്കുന്നത്. ചിത്രം 2024 സെപ്റ്റംബർ 5 ന് ലോകമെമ്പാടുമുള്ള തിയറ്ററുകളിൽ റിലീസ് ചെയ്യും.
അജിത് കുമാറിൻ്റെ വരാനിരിക്കുന്ന ചിത്രം വിടാമുയർച്ചി, ഇൻഡസ്ട്രിയിൽ ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളിൽ ഒന്നാണ്. തൃഷ കൃഷ്ണൻ, അർജുൻ സർജ, റെജീന കസാന്ദ്ര, ആരവ്, തുടങ്ങിയ അഭിനേതാക്കളും പ്രധാന വേഷങ്ങളിൽ ചിത്രത്തിൽ അഭിനയിക്കുന്നുണ്ട്. ബോളിവുഡ് താരം സഞ്ജയ് ദത്തും ചിത്രത്തിൽ അഭിനയിക്കുന്നുണ്ടെന്നാണ് പുറത്തുവരുന്ന റിപ്പോർട്ടുകൾ. പക്ഷെ വിടാമുയർച്ചി ടീമിൽ നിന്ന് ഔദ്യോഗിക പ്രഖ്യാപനം ഇതുവരെ ഉണ്ടായിട്ടില്ല. മുമ്പ് എകെ 63 എന്നറിയപ്പെട്ടിരുന്ന ഗുഡ് ബാഡ് അഗ്ലി എന്ന ചിത്രത്തിലാണ് അജിത്ത് ഉടൻ അഭിനയിക്കുന്നത്.
