അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.പാലക്കാട് : ഐപിഎല്ലില്‍ മിന്നും ഫോമിലാണ് മലയാളി താരവും രാജസ്ഥാന്‍ റോയല്‍സ് ക്യാപ്റ്റനുമായ സഞ്ജു സാംസണ്‍. സീസണിലെ വെടിക്കെട്ട് പ്രകടനത്തിന് പിന്നാലെ താരത്തിന് ടി20 ലോകകപ്പിനുള്ള ഇന്ത്യന്‍ ടീമില്‍ സ്ഥാനം ലഭിക്കുകയും ചെയ്തിരുന്നു. ഇപ്പോള്‍ താരത്തിന്റെ ഭീമന്‍ പെയിന്റിങ്ങിന്റെ വീഡിയോ സോഷ്യല്‍ മീഡിയയില്‍ വൈറലാവുകയാണ്.
പാലക്കാട്, ഒറ്റപ്പാലം സ്വദേശിയായ സുജിത് വീടിന്റെ മേല്‍ക്കൂരയില്‍ ഒരുക്കിയ ചിത്രമാണ് സോഷ്യല്‍ മീഡിയ ഏറ്റെടുത്തിരിക്കുന്നത്. ചിത്രത്തിന്റെ ആകാശ ദൃശ്യമാണ് ആരാധകര്‍ ഏറ്റെടുത്തിരിക്കുന്നത്. ട്രെന്റിങ്ങായ ഫഹദ് ഫാസില്‍ ചിത്രം ആവേശത്തിലെ ഗാനത്തോടൊപ്പമാണ് വിഡിയോ പോസ്റ്റുചെയ്തത്.
സഞ്ജു സാംസനെയും രാജസ്ഥാന്‍ റോയല്‍സ് ടീമിനെയും ടാഗ് ചെയ്ത് പങ്കുവച്ച വീഡിയോയില്‍ സുജിത്തിനെ ഞെട്ടിച്ച് സഞ്ജു തന്നെ കമന്റുമായെത്തി. ‘ഡാ മോനെ സുജിത്തേ’ എന്നാണ് താരത്തിന്റെ കമന്റ്. മുപ്പതിനായിരത്തിലേറെ ലൈക്കുകളാണ് കമന്റിന് ലഭിച്ചത്.
നിരവധി ആരാധകരാണ് സഞ്ജുവിന്റെ കമന്റിന് മറുപടിയുമായി എത്തിയത്. രാജസ്ഥാന്റെ ഔദ്യോഗിക സോഷ്യല്‍ മീഡിയ അക്കൗണ്ടില്‍ പോസ്റ്റ് ചെയ്യാനും ആരാധകര്‍ ആവശ്യപ്പെട്ടു. അധികം വൈകാതെ വിഡിയോ രാജസ്ഥാന്‍ റോയല്‍സ് തങ്ങളുടെ ഔദ്യോഗിക അക്കൗണ്ടില്‍ പങ്കുവെച്ചു
